9 ໄວໜຸ່ມລາວ ແລະ 1 ຊາຍຊາວຈີນ ຖືກກັກຕົວຖານເຜີຍແຜ່ພາບລາມົກ

ປກສ ເມືອງສີສັດຕະນາກ, ສົມທົບກັບບ້ານດອນນົກຂຸ້ມໄດ້ເຂົ້າແກ້ໄຂເຫດເຜີຍແຜ່ພາບລາມົກຜ່ານລະບົບອອນໄລນ໌ ຢູ່ເຮືອນເລກທີ 044 ໜ່ວຍ 2 ບ້ານດອນນົກຂຸ້ມ ເມືອງສີສັດຕະນາກ ນະຄອນຫຼວງວຽງຈັນ.

ລາຍງານຂ່າວຂອງກຳລັງ ປກສ ນວ, ເມື່ອວັນທີ 2 ກຸມພາ 2022 ລະບຸວ່າ: ປະຕິບັດການດັ່ງກ່າວມີຂຶ້ນເມື່ອເວລາ 15:05 ໂມງຂອງວັນທີ 24 ກຸມພາຜ່ານມາ. ຊຶ່ງຜ່ານການເຂົ້າກວດຄົ້ນເຄຫາສະຖານ, ພົບເຫັນກຸ່ມໄວລຸ້ນກໍາລັງຖ່າຍພາບ ແລະວິດີໂອເຜີຍແຜ່ການມີເພດສຳພັນຜ່ານທາງສື່ສັງຄົມອອນໄລນ໌ ຜ່ານແອພ BIGO LIVE, ໃນນັ້ນມີທັງໝົດ 10 ຄົນ, ຍິງ 6 ຄົນຄື: 1. ນາງ ຊັນນີ້ ອາຍຸ 21 ປີ ເຈົ້າຂອງເຮືອນເຊົ່າ, 2. ນາງ ນໍ້າເຜິ້ງ ອາຍຸ 21 ປີ, 3. ນາງ ໄຂ່ມຸກ ອາຍຸ 23 ປີ, 4. ນາງ ຕຸກຕາ ອາຍຸ 22 ປີ, 5. ນາງ ຈີງ ອາຍຸ 18 ປີ, 6. ນາງ ມຸກ ອາຍຸ 20 ປີ, 7. ທ້າວ ໄພທູນ ອາຍຸ 19 ປີ, 8. ທ້າວ ແສງເພັດ ອາຍຸ 32 ປີ, 9. ທ້າວ ມິ້ກກີ້ ອາຍຸ 19 ປີ ແລະ 10. ທ້າວ ຫວັງ ມິງຄາຍ (WANG Mingkai) ອາຍຸ 36 ປີ ເຊື້ອຊາດ-ສັນຊາດຈີນ ອາຊີບຄ້າຂາຍ, ພັກເຊົາຢູ່ໂຮງແຮມສືສວນ ບ້ານວັດໄຕນ້ອຍທົ່ງ ເມືອງສີໂຄດຕະບອງ ນະຄອນຫຼວງວຽງຈັນ.

ລາຍງານຂ່າວດຽວກັນໃຫ້ຮູ້ຕື່ມວ່າ: ພັທ ສຸບັນໄຊ ບຸນມາວົງ ຫົວໜ້າພະແນກຕຳຫຼວດ ປກສ ເມືອງສີສັດຕະນາກ ໄດ້ເປີດເຜີຍໃນເບື້ອງຕົ້ນກ່ຽວກັບເຫດການເຜີຍແຜ່ພາບລາມົກຜ່ານລະບົບອອນໄລນ໌ ຢູ່ບ້ານດອນນົກຂຸ້ມ, ຊຶ່ງແມ່ນທ້າວ ຫວັງ ມິງຄາຍ ກັບນາງ ຊັນນີ ເປັນແຟນກັນ ແລະປະກອບອາຊີບຄ້າຂາຍທາງອອນໄລນ໌, ເຊົ່າເຮືອນຢູ່ບ້ານດອນນົກຂຸ້ມ ເມືອງສີສັດຕະນາກ. ທັງສອງໄດ້ພາກັນຊັກຊວນເອົາຍິງສາວລາວ ແລະ ຊາຍໜຸ່ມມາຖ່າຍພາບ ແລະ ວິດີໂອລາມົກ, ພ້ອມທັງຖ່າຍທອດສົດຜ່ານແອພ BIGO LIVE ສ່ວນຜູ້ສະແດງຈະໄດ້ຮັບຄ່າຕອບແທນເປັນເງິນເດືອນ.

ຫຼັງຈາກເຈົ້າໜ້າທີ່ໄດ້ເຂົ້າແກ້ໄຂ, ກໍໄດ້ນຳຕົວພວກກ່ຽວໄປກັກກັນຕາມມາດຕະການປ້ອງກັນ, ຄວບຄຸມການແພ່ລະບາດພະຍາດໂຄວິດ-19, ເມື່ອຮອດກຳນົດຈິ່ງຈະນຳຕົວໄປດຳເນີນຄະດີຕາມກົດໝາຍ. 

แชร์