ຮອງນາຍົກ ຕິດຕາມວຽກງານທີ່ຕິດພັນທາງລົດໄຟລາວ-ຈີນ ຢູ່ອຸດົມໄຊ ແລະຫຼວງນໍ້າທາ

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ພ້ອມດ້ວຍຄະນະ, ໄດ້ເຄື່ອນໄຫວຊຸກຍູ້ວຽກງານທີ່ແຂວງອຸດົມໄຊ ແລະຫຼວງນໍ້າທາ, ໂດຍໄດ້ຕິດຕາມກວດກາກິດຈະການຕ່າງໆທີ່ຕິດພັນກັບໂຄງການກໍ່ສ້າງເສັ້ນທາງລົດໄຟ ລາວ-ຈີນ ແລະຈຸດຄ່ຽນຖ່າຍສິນຄ້າ, ພ້ອມຢ້ຽມຢາມໂອ້ລົມປະຊາຊົນທີ່ບ້ານຈັດສັນໃໝ່ນາເຕີຍ.

ການເຄື່ອນໄຫວວຽກງານຂອງຄະນະຮອງນາຍົກລັດຖະມົນຕີ ມີຂຶ້ນເມື່ອວັນທີ 2 ມີນາ 2002, ເລີ່ມຕົ້ນທີ່ແຂວງອຸດົມໄຊ ຊຶ່ງໄດ້ຮັບການຕ້ອນຮັບໂດຍ ທ່ານ ບຸນຄົງ ຫຼ້າຈຽມພອນ ເຈົ້າແຂວງອຸດົມໄຊ, ພ້ອມດ້ວຍຄະນະນໍາຂອງແຂວງ ແລະ ພະນັກງານທີ່ກ່ຽວຂ້ອງ. ໂດຍທ່ານຮອງນາຍົກລັດຖະມົນຕີ, ໄດ້ໃຫ້ທິດຊີ້ນຳໃນການແກ້ບັນຫາຄົງຄ້າງທີ່ຈະຕ້ອງສືບຕໍ່ແກ້ໄຂ, ໂດຍສະເພາະແມ່ນບັນຫາທີ່ສົ່ງຜົນກະທົບຕໍ່ຊີວິດການເປັນຢູ່ ແລະການເຮັດການຜະລິດຂອງປະຊາຊົນ ແລະ ໄປເບິ່ງຈຸດທີ່ກຳລັງປັບປຸງເພື່ອບໍລິການຄ່ຽນຖ່າຍສິນຄ້າ ສຳລັບການຂົນສົ່ງຜ່ານເສັ້ນທາງລົດໄຟ, ຈຸດປັບປຸງຍົກລະດັບຂົວ ແລະ ເສັ້ນທາງເກົ່າ ເພື່ອສາມາດຮອງຮັບການຂົນສົ່ງສິນຄ້າເຂົ້າ-ອອກຈຸດຄ່ຽນຖ່າຍ, ຈຸດທີ່ມີແຜນຕໍ່ເຕີມສະຖານີລົດໄຟໂດຍສານເພື່ອຮອງຮັບແຂກວີໄອພີ (VIP) ແລະ ການບໍລິການອື່ນໆທີ່ປິ່ນອ້ອມ.

ໂດຍ ທ່ານ ສອນໄຊ ສີພັນດອນ, ໄດ້ແນະນຳທຸກພາກສ່ວນກ່ຽວຂ້ອງຈົ່ງສົມທົບກັນຄົ້ນຄວ້າອອກແບບຢ່າງລະອຽດ, ຈະແຈ້ງ, ສົມເຫດສົມຜົນ ແລ້ວນຳສະເໜີຕາມຂັ້ນຕອນ ແລະ ລະບຽບການ, ຊຶ່ງການອອກແບບຕ້ອງໃຫ້ກົມກຽວ, ເປັນລະບົບຄົບຊຸດ, ຮັບປະກັນໃຫ້ແກ່ການບໍລິການທີ່ສະດວກ, ວ່ອງໄວ, ມີປະສິດທິພາບ ແລະປະສິດທິຜົນ. ສຳຄັນກໍຄືເມື່ອກິດຈະການກໍ່ສ້າງສຳເລັດ, ກໍຈະຊ່ວຍເຮັດໃຫ້ການແຈກຢາຍ ແລະຂົນສົ່ງສິນຄ້າໂດຍທາງລົດໄຟມີຄວາມສະດວກ, ວ່ອງໄວ, ທັງຫຼຸດຜ່ອນສະພາບແອອັດຂອງລົດບັນທຸກໄດ້ຢ່າງຫຼວງຫຼາຍ.

ໃນຕອນບ່າຍ ຂອງວັນດຽວກັນ, ທ່ານຮອງນາຍົກລັດຖະມົນຕີພ້ອມຄະນະ, ກໍໄດ້ເດີນທາງໄປທີ່ແຂວງຫຼວງນໍ້າທາ, ໂດຍການຕ້ອນຮັບຂອງ ທ່ານ ອ່ອນຈັນ ຄຳພາວົງ ຮອງເຈົ້າແຂວງໆຫຼວງນໍ້າທາ, ພ້ອມດ້ວຍພະນັກງານທີ່ກ່ຽວຂ້ອງ. ທັງນີ້, ຄະນະຮອງນາຍົກ ໄດ້ໄປເບິ່ງຈຸດຄ່ຽນຖ່າຍສິນຄ້າທີ່ຂົນສົ່ງໂດຍທາງລົດໄຟ ລາວ-ຈີນ ຢູ່ເຂດນາເຕີຍ, ເມືອງ ແລະແຂວງຫຼວງນໍ້າທາ; ຢ້ຽມຢາມບ້ານຈັດສັນໃໝ່ນາເຕີຍ,ທີ່ເປັນໂຄງການຊົດເຊີຍແກ່ປະຊາຊົນທີ່ຖືກຜົນກະທົບຈາກໂຄງການກໍ່ສ້າງເສັ້ນທາງລົດໄຟ ລາວ-ຈີນ. ຊຶ່ງໃນໂອກາດນີ້, ກໍໄດ້ພົບປະໂອ້ລົມປະຊາຊົນໂດຍໄດ້ຮັບຟັງລາຍງານຫຍໍ້ກ່ຽວກັບສະພາບການຈັດສັນ ແລະຊົດເຊີຍຜົນກະທົບໃຫ້ແກ່ປະຊາຊົນຈາກຄະນະຮັບຜິດຊອບປະສານງານການໄກ່ເກ່ຍ ແລະ ຊົດເຊີຍຜົນກະທົບຈາກໂຄງການກໍ່ສ້າງເສັ້ນ ທາງລົດໄຟ ລາວ-ຈີນ ແຂວງຫຼວງນໍ້າທາ ແລະ ເປີດໂອກາດໃຫ້ປະຊາຊົນໄດ້ປະກອບຄຳຄິດເຫັນຮ່ວມກັນ.

ໃນວາລະດຽວກັນ, ທ່ານຮອງນາຍົກລັດຖະມົນຕີກໍໄດ້ນຳເອົາຄວາມຢ້ຽມຢາມຖາມຂ່າວ, ຄວາມເປັນຫ່ວງເປັນໃຍ ແລະ ສາມັກຄີຮັກແພງຂອງສູນກາງພັກ ແລະ ລັດຖະບານມາຍັງປະຊາຊົນທີ່ຖືກຜົນກະທົບ ແລະຕີລາຄາສູງຕໍ່ຄວາມເສຍສະຫຼະຂອງປະຊາຊົນ, ໂດຍສະເພາະກໍແມ່ນດິນດອນຕອນຫຍ້າ ແລະ ຜົນປະໂຫຍດຂອງຕົນເພື່ອປະກອບສ່ວນສ້າງສາພັດທະນາວຽກງານລວມຂອງຊາດ. ຂະນະດຽວກັນ, ກໍໄດ້ເນັ້ນໜັກໃຫ້ພາກສ່ວນກ່ຽວຂ້ອງເປັນຕົ້ນແມ່ນຄະນະຮັບຜິດຊອບປະສານງານ ໄກ່ເກ່ຍ ແລະ ຊົດເຊີຍຜົນກະທົບ, ຈົ່ງສືບຕໍ່ຄົ້ນຄວ້າແກ້ໄຂຂໍ້ສະເໜີຕ່າງໆຂອງປະຊາຊົນດ້ວຍວິທີການທີ່ເໝາະສົມ, ບົນພື້ນຖານຮັບປະກັນຄວາມສະຫງົບ ແລະ ຍືນຍົງ; ໃຫ້ປະຊາຊົນມີຄວາມອຸ່ນອຽນທຸ່ນທ່ຽງ, ເຊື່ອໝັ້ນຕໍ່ແນວທາງນຳພາຂອງພັກ-ລັດ, ບັນຫາໃດໄດ້ຮັບຄວາມເປັນທຳ ແລະສົມເຫດສົມຜົນແລ້ວ, ກໍຮຽກຮ້ອງໃຫ້ພ້ອມພຽງກັນຕັດສີນໃຈຮັບເອົາ, ຜ່ອນສັ້ນຜ່ອນຍາວເຊິ່ງກັນແລະກັນ, ຫຼີກລ່ຽງແນວຄິດປຽບທຽບຊັ່ງຊາ ແລະ ອື່ນໆ ແລະຮຽກຮ້ອງໃຫ້ປະຊາຊົນທີ່ຍົກຍ້າຍເຂົ້າໄປຢູ່ບ້ານຈັດສັນໃໝ່ ຈິ່ງຄຳນຶງເຖິງການຮັກສາສຸຂະອະນາໄມ, ເອົາໃຈໃສ່ພັດທະນາທີ່ຢູ່ອາໄສໃຫ້ກາຍເປັນບ້ານຕົວແບບດ້ານການພັດທະນາ. ຊຶ່ງປະຈຸບັນເຫັນວ່າໂຄງລ່າງພື້ນຖານຂອງບ້ານແມ່ນຄົບຖ້ວນຕາມມາດຖານເງື່ອນໄຂທີ່ກຳນົດໄວ້, ຊຶ່ງກໍຍັງພຽງແຕ່ຄວາມເອົາໃຈໃສ່ຂອງຜູ້ຢູ່ອາໄສທີ່ຈະຕ້ອງພ້ອມກັນພັດທະນາດ້ານອື່ນໆໃຫ້ສົມຄູ່ກັນ .

แชร์