ລັດຖະບານ ຜ່ອນຄາຍມາດຕະການເຂົ້າ-ອອກ ສປປ ລາວ

ລັດຖະບານແຫ່ງ ສປປ ລາວ, ໄດ້ປັບມາດຕະການໃໝ່ເພື່ອອຳນວຍຄວາມສະດວກໃຫ້ແກ່ນັກການທູດ, ນັກລົງທຶນ, ນັກທຸລະກິດ, ຊ່ຽວຊານ, ວິຊາການ, ແຮງງານ, ນັກທ່ອງທ່ຽວຕາມແຜນທ່ອງທ່ຽວສີຂຽວ ແລະ ຄົນລາວທີ່ຈະກັບຄືນປະເທດ. ທັງນີ້, ທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຮອງຫົວໜ້າຄະນະສະເພາະກິດຕອບໂຕ້ໂຄວິດ-19, ຜູ້ປະຈໍາການ, ໄດ້ຖະແຫຼງກ່ຽວກັບທິດຊີ້ນຳໃນການດັດປັບບາງມາດຕະການເຂົ້າ-ອອກ ສປປ ລາວ ນັບແຕ່ວັນທີ 2 ມີນາ ເປັນຕົ້ນໄປ.

ໂດຍລັດຖະບານ, ໄດ້ມອບໃຫ້ກະຊວງການຕ່າງປະເທດ ເປັນຜູ້ອອກວີຊາໃຫ້ບັນດາກຸ່ມເປົ້າໝາຍເຊັ່ນ: ນັກການທູດ, ພະນັກງານອົງການຈັດຕັ້ງສາກົນທີ່ນອນໃນເຄືອຂ່າຍຂອງອົງການສະຫະປະຊາຊາດ, ອົງການຈັດຕັ້ງສາກົນທີ່ໄດ້ຮັບເອກະສິດ ແລະ ອະພິສິດທາງການທູດ, ກຸ່ມນັກທຸລະກິດ, ນັກລົງທຶນ, ຄົນຕ່າງປະເທດທີ່ເປັນຊ່ຽວຊານ, ວິຊາການ, ແຮງງານ, ພໍ່ຄ້າຊາວຂາຍ, ນັກສຶກສາ, ຄົນເຊື້ອຊາດລາວ ແລະ ຄອບຄົວຂອງພົນລະເມືອງລາວ ທີ່ໄດ້ລົງທະບຽນ QR-Code (Vaccine ID) ໃນເວ໊ບໄຊຕ໌ laogreenpass.gov.la ໂດຍບໍ່ຜ່ານຄະນະສະເພາະກິດຕອບໂຕ້ໂຄວິດ-19. ນອກນັ້ນ, ຄະນະສະເພາະກິດຍັງຍົກເລີກການໃສ່ອຸປະກອນຕິດຕາມທາງການແພດສໍາລັບທຸກກຸ່ມເປົ້າໝາຍ ແລະ ຫັນໄປນຳໃຊ້ລະບົບ QR Code ຂອງ Lao KYC.

ໃນການຈໍາກັດບໍລິເວນສຳລັບຜູ້ທີ່ຈະເດີນທາງເຂົ້າມາ ສປປ ລາວ ແມ່ນໃຫ້ຄົບ 7 ວັນ ແລະລໍຖ້າຜົນກວດອີກ 2 ວັນ. ສຳລັບນັກທ່ອງທ່ຽວເປັນກຸ່ມ, ນັກທຸລະກິດ ແລະ ນັກລົງທຶນ, ແມ່ນໃຫ້ຈຳກັດບໍລິເວນເພື່ອລໍຖ້າຜົນກວດພຽງ 48 ຊົ່ວໂມງ, ເມື່ອຜົນກວດເປັນລົບກໍສາມາດເຄື່ອນໄຫວກິດຈະກຳຕ່າງໆ ແຕ່ຕ້ອງປະຕິບັດມາດຕະການປ້ອງກັນ ແລະ ຄວບຄຸມການຕິດເຊື້ອຢ່າງເຂັ້ມງວດ. ສໍາລັບຄ່າໃຊ້ຈ່າຍໃນການຈໍາກັດບໍລິເວນ ແລະ ຄ່າກວດ ແມ່ນໃຫ້ຜູ້ເດີນທາງເຂົ້າປະເທດຮັບຜິດຊອບເອງ ແລະ ໃຫ້ບຸກຄົນທີ່ອາໄສຢູ່ ສປປ ລາວ ແລະ ບຸກຄົນທີ່ເດີນທາງເຂົ້າມາ ສປປ ລາວ ດໍາເນີນການຕິດຕັ້ງ ແລະ ລົງທະບຽນໂປຣແກຣມ (ແອພ) LaoKYC ໃນໂທລະສັບມືຖືຂອງຕົນ ເພື່ອໃຊ້ບໍລິການ“ລາວ ສູ້ສູ້”  ແລະ ສະໝັກສ້າງລະຫັດວັຄຊີນ (Vaccine ID) ເພື່ອໃຊ້ເປັນບັດຢັ້ງຢືນການສັກວັຄຊີນ ແລະ ສະຖານະຄວາມສ່ຽງຂອງຕົນ ໃນເວລາເຄື່ອນໄຫວ, ເດີນທາງ, ເຂົ້າໄປສໍານັກງານຂອງລັດ, ໂຮງງານ, ຮ້ານຄ້າ, ຮ້ານອາຫານ ແລະ ສະຖານທີ່ຕ່າງໆ. ໃຫ້ສໍານັກງານຂອງລັດ, ໂຮງງານ, ຮ້ານຄ້າ, ຮ້ານອາຫານ, ສະຖານທີ່ສາທາລະນະຕ່າງໆ ແລະ ຜູ້ໃຫ້ບໍລິການໂດຍສານ (ເຮືອບິນ, ເຮືອໂດຍສານ, ລົດໄຟ, ແລະ ລົດໂດຍສານຕ່າງໆ) ຕ້ອງຕິດຕັ້ງ QR-Code ເພື່ອໃຫ້ສະແກນ, ໂດຍນໍາໃຊ້ບໍລິການ “ລາວສູ້ສູ້” ແລະ ມີການກວດ QR-Code (Vaccine ID) ກ່ອນອະນຸຍາດໃຫ້ເຂົ້າໃຊ້ບໍລິການ.

ຢ່າງໃດກໍຕາມ, ລັດຖະບານ ກໍຈະສືບຕໍ່ປະເມີນສະພາບການ, ທົບທວນ ແລະ ດັດປັບມາດຕະການໃຫ້ເໝາະສົມກັບສະພາບຕົວຈິງຕື່ມ. ຫາກກໍລະນີມີການປ່ຽນແປງ, ກໍຈະແຈ້ງໃຫ້ຊາບເປັນແຕ່ລະໄລຍະ.

แชร์