ກຽມຂຶ້ນທະບຽນແຮງງານແບບທັນສະໄໝ ແລະຄຸ້ມຄອງອາກອນລາຍໄດ້ ເພື່ອຄວາມເປັນທຳແກ່ທຸກຝ່າຍ

ການຂຶ້ນທະບຽນແຮງງານໂດຍເຊື່ອມຕໍ່ລະບົບບໍລິຫານແບບທັນສະໄໝ ແລະ ລະບົບຄຸ້ມຄອງລາຍຮັບສ່ວຍສາອາກອນ, ຈະຊ່ວຍໃຫ້ການເຄື່ອນໄຫວຂອງຕະຫຼາດແຮງງານລາວສອດຄ່ອງກັບເປົ້າໝາຍພັດທະນາແຮງງານ ແລະ ການຕອບສະໜອງແຮງງານໃຫ້ແຕ່ລະຂະແໜງການໄດ້ຢ່າງມີປະສິດທິຜົນ. ນອກນັ້ນ, ຍັງຈະເຮັດໃຫ້ພາກລັດສາມາດໃຫ້ຄວາມຊ່ວຍເຫຼືອທັນການໃນກໍລະນີເກີດເຫດຕ່າງໆ, ທັງສາມາດເກັບລາຍຮັບຈາກອາກອນເງິນເດືອນ ແລະ ອາກອນລາຍໄດ້ດີຂຶ້ນກວ່າເກົ່າ.

ປະເດັນດັ່ງກ່າວຖືເປັນຫົວຂໍ້ຫຼັກຂອງການຈັດກອງປະຊຸມປຶກສາຫາລືກ່ຽວກັບການເຊື່ອມຕໍ່ລະບົບບໍລິຫານຖານຂໍໍ້ມູນແຮງງານແບບທັນສະໄໝ (LMIS) ແລະ ລະບົບຄຸ້ມຄອງລາຍຮັບສ່ວຍສາອາກອນ (TaxRIS) ເມື່ອວັນທີ 1 ມີນາ 2022 ທີ່ກະຊວງການເງິນ, ໂດຍການເປັນປະທານຮ່ວມຂອງ ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ແລະ ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງງານ ແລະ ສະຫວັດດີການສັງຄົມ, ມີບັນດາຮອງລັດຖະມົນຕີ, ບັນດາກົມ, ຫ້ອງການ ແລະ ອົງການ, ພ້ອມດ້ວຍພະນັກງານຫຼັກແຫຼ່ງຂອງສອງກະຊວງ ເຂົ້າຮ່ວມ.

ເປົ້າໝາຍຫຼັກໆຂອງການເຊື່ອມຕໍ່ຖານຂໍໍ້ມູນແບບທັນສະໄໝ ລະຫວ່າງ ກະຊວງການເງິນ ກັບ ກະຊວງແຮງງານ ແລະ ສະຫວັດດີການສັງຄົມ, ກໍເພື່ອຮູ້ທັນການປ່ຽນແປງສະພາບກ່ຽວກັບຄວາມຕ້ອງການ ແລະ ການສະໜອງແຮງງານ; ຕິດຕາມການມີລາຍຮັບຂອງແຮງງານລາວ ແລະ ແຮງງານຕ່າງປະເທດ ໃຫ້ເປັນໄປຕາມຄວາມຈິງຫຼາຍທີ່ສຸດ, ເພື່ອການປະຕິບັດພັນທະດ້ານອາກອນລາຍໄດ້ຢ່າງເໝາະສົມ; ເປົ້າໝາຍແມ່ນຜູ້ອອກແຮງງານລາວໃນທົ່ວປະເທດທັງໃນ ແລະ ນອກລະບົບເສດຖະກິດ. ຊຶ່ງນອກລະບົບລວມມີແຮງງານໃນຄົວເຮືອນ, ຜູ້ປະກອບອາຊີບອິດສະຫຼະຄ້າຂາຍອອນໄລນ໌, ຜູ້ເຮັດວຽກແບບກິນຕາມຜະລິດຕະພັນ, ອີກທັງຜູ້ອອກແຮງງານຕ່າງປະເທດທີ່ຖືກຕ້ອງ ແລະ ຍັງບໍ່ຖືກຕ້ອງຕາມກົດໝາຍ.

ພ້ອມດຽວກັນນີ້, ກໍເພື່ອໃຫ້ມີທະບຽນ ແລະ ປະຫວັດການເຮັດວຽກພ້ອມລາຍລະອຽດທີ່ເຊື່ອຖືໄດ້; ມີປະຫວັດການຈ່າຍປະກັນສັງຄົມ, ປະຫວັດການຈ່າຍອາກອນລາຍໄດ້; ມີຄວາມສະດວກໃນການສ້າງ ຫຼື ຍົກເລີກສັນຍາແຮງງານ; ມີຄວາມສະດວກໃນການສະໝັກວຽກ ແລະ ເຂົ້າຖິງຂໍ້ມູນຂ່າວສານຕະຫຼາດແຮງງານ; ມີເລກປະຈຳຕົວຜູ້ເສຍອາກອນ ເພື່ອຢັ້ງຢືນສະຖານະຢ່າງຖືກ ຕ້ອງ; ເພືອ່ເຮັດໃຫ້ຜູ້ອອກແຮງງານໄດ້ຮັບການຄຸ້ມຄອງຕາມກົດໝາຍແຮງງານ, ໄດ້ຮັບການຊ່ວຍ ເຫຼືອຢ່າງທັນການໃນກໍລະນີເກີດເຫດຕ່າງໆທີ່ມີຜົນກະທົບຕໍ່ໜ້າວຽກ.

ຂໍ້ມູນແຮງງານແບບທັນສະໄໝ, ຈະຊ່ວຍໃຫ້ການພັດທະນາ ແລະ ຕອບສະໜອງແຮງງານໃນຕະຫຼາດຖືກເປົ້າໝາຍ, ທີ່ສຳຄັນແມ່ນຈະຊ່ວຍໃຫ້ພາກລັດສາມາດຈັດເກັບລາຍຮັບຈາກອາກອນເງິນເດືອນ ແລະ ອາກອນລາຍໄດ້ໃນມູນຄ່າທີ່ເໝາະສົມກັບຈຳນວນແຮງງານຕົວຈິງ. ຊຶ່ງຈະຊ່ວຍໃຫ້ແຮງງານທຸກຄົນໃນລະບົບເສດຖະກິດຂອງປະເທດໄດ້ຮັບການປົກປ້ອງ ແລະ ຄຸ້ມຄອງຕາມກົດໝາຍ, ຊຶ່ງຈະເຮັດໃຫ້ສັງຄົມມີຄວາມສະຫງົບ ແລະ ປອດໄພ.

ຢ່າງໃດກໍດີ, ອີງຕາມສະຖິຕິຜ່ານມາກໍມີການຄາດຄະເນວ່າ: ໃນ 2 ປີຈະສາມາດຂຶ້ນທະບຽນໃຫ້ຜູ້ອອກແຮງງານໄດ້ປະມານ 1,5 ລ້ານຄົນ, ຊຶ່ງມີຜູ້ທີ່ໄດ້ຮັບເງິນເດືອນສູງກວ່າ 1,3 ລ້ານກີບ (ໜຶ່ງລ້ານສາມແສນກີບ) ໃນນັ້ນ, ຜູ້ທີ່ຕ້ອງຈ່າຍອາກອນຈະກວມຫຼາຍກວ່າ 50% ຂອງຜູ້ອອກແຮງງານທັງໝົດ.

แชร์