ຖວທ ມອບໃບຢັ້ງຢືນມາດຕະຖານ “ລາວປອດໄພ”
ເມື່ອວັນທີ 28 ກຸມພາ 2022, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດພິທີມອບໃບຢັ້ງຢືນ ລາວເຊຟ (LaoSafe) ຫຼື ລາວປອດໄຟ ໃຫ້ແກ່ຄູຝຶກສຳລັບຂະແໜງອາຫານ ແລະ ເຄື່ອງດື່ມ 6 ທ່ານ, ໃບຢັ້ງຢືນໃຫ້ຜູ້ປະເມີນສຳລັບຂະແໜງອາຫານ ແລະ ເຄື່ອງດື່ມ 8 ທ່ານ, ໃບຢັ້ງຢືນໃຫ້ຄູຝຶກສຳລັບພະນັກງານນຳທ່ຽວ ແລະ ພະນັກງານຂັບລົດ 5 ທ່ານ ແລະ ໃບຢັ້ງຢືນໃຫ້ຂະແໜງສາຍການບິນ 2 ທ່ານ.
ໂຄງການລາວເຊຟ ໄດ້ເລີ່ມຈັດຕັ້ງປະຕິບັດທົດລອງຢ່າງເປັນທາງການຢູ່ນະຄອນຫຼວງວຽງຈັນ, ທັງນີ້ກໍໄດ້ບັນລຸຂີດໝາຍສໍາຄັນທໍາອິດຂອງໂຄງການ ນັ້ນກໍຄື: ການອອກໃບຢັ້ງຢືນໃຫ້ແກ່ຄູຝຶກ ແລະ ຜູ້ປະເມີນ ສໍາລັບຂະແໜງການຍ່ອຍເຊັ່ນ ບໍລິການອາຫານ ແລະ ເຄື່ອງດື່ມ, ພະນັກງານນໍາທ່ຽວ ແລະພະນັກງານຂັບລົດຮັບສົ່ງນັກທ່ອງທ່ຽວ. ສ່ວນຄູຝຶກ ແລະຜູ້ປະເມີນສໍາລັບຂະແໜງສະຖານທີ່ພັກແຮມພວມຢູ່ໃນໄລຍະການກະກຽມ. ຊຶ່ງຄູຝຶກລາວເຊຟແມ່ນເຮັດໜ້າທີ່ຝຶກອົບຮົມໃຫ້ແກ່ທຸລະກິດບໍລິການອາຫານ ແລະເຄື່ອງດື່ມ, ພ້ອມທັງພະນັກງານນໍາທ່ຽວ ແລະພະນັກງານຂັບລົດຂົນສົ່ງນັກທ່ອງທ່ຽວເພື່ອກະກຽມຂະບວນການປະເມີນລາວເຊຟຂອງຂະແໜງການຍ່ອຍນັ້ນເອງ.
ເຂົ້າຮ່ວມໃນພິທີຄັ້ງນີ້ໂດຍ ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ໜູນພັນ ອຸດສາ ຫົວໜ້າກົມອາຊີວະສຶກສາກະຊວງສຶກສາທິການ ແລະກີລາ, ທ່ານ ແຊມ ສະຣາຍເນີ ຮັກສາການເອກອັກຄະລັດຖະທູດລັກເຊມເບິຣ໌ກ ປະຈໍາລາວ ແລະ ທ່ານ ຄຣິສຕຽນແອັງເລີ ຮອງອໍານວຍການອົງການຮ່ວມມືເພື່ອການພັດທະນາແຫ່ງປະເທດສະວິຕເຊີຣ໌ແລນດ໌ ປະຈໍາລາວ.
