ສານຊີ້ ຄະດີພົ້ນເດັ່ນໃນປີຜ່ານມາແມ່ນຢາເສບຕິດ

ປີຜ່ານມາມີຄະດີອາຍາເກີດຂຶ້ນຫຼາຍຮູບແບບ, ໃນນັ້ນ ຄະດີຢາເສບຕິດມີຫຼາຍກວ່າ 1.200 ເລື່ອງ ແລະ ເປັນສະຖິຕິທີ່ສູງກວ່າລາຍຄະດີອື່ນໆ.

ປະເດັນດັ່ງກ່າວຖືກລາຍງານຕໍ່ກອງປະຊຸມສະຫຼຸບການເຄື່ອນໄຫວວຽກງານປະຈຳປີ 2021 ແລະ ທິດທາງແຜນການ ປີ 2022 ຂອງສານປະຊາຊົນ, ຊຶ່ງຈັດຂຶ້ນໃນວັນທີ 1 ມີນາ 2022 ທີ່ນະ ຄອນຫຼວວຽງຈັນ. ໂດຍການເປັນປະທານຂອງ ທ່ານ ນາງ ວຽງທອງ ສີພັນດອນ ຄະນະເລຂາທິ ການສູນກາງພັກ, ເລຂາຄະນະບໍລິຫານງານພັກ ປະທານສານປະຊາຊົນສູງສຸດ, ມີຮອງປະທານ, ປະທານສານປະຊາຊົນພາກ, ປະທານສານປະຊາຊົນແຂວງ ແລະ ສານເຂດທົ່ວປະເທດ ເຂົ້າຮ່ວມ.

ທ່ານ ຄຳພັນ ບຸນພາຄົມ ຮອງປະທານສານປະຊາຊົນສູງສຸດ, ໄດ້ຜ່ານບົດສະຫຼຸບການເຄື່ອນ ໄຫວວຽກງານປະຈຳປີ 2021 ແລະ ທິດທາງແຜນການປະຈຳປີ 2022 ຂອງສານປະຊາຊົນ, ຊຶ່ງປັດຈຸບັນສານປະຊາຊົນທົ່ວປະເທດ ມີພະນັກງານທັງໝົດ 1.928 ຄົນ ຍິງ 717 ຄົນ. ໃນນີ້ ມີຜູ້ພິພາກສາ 558 ຄົນ ຍິງ 113 ຄົນ, ຜູ້ຊ່ວຍຜູ້ພິພາກສາ 476 ຄົນ ຍິງ 173 ຄົນ, ຈ່າສານ 153 ຄົນ ຍິງ 71 ຄົນ. ໃນ 1 ປີຜ່ານມາ ມີຄະດີຢູ່ສານປະຊາຊົນ ແລະ ສານທະຫານແຕ່ລະຂັ້ນໃນທົ່ວປະເທດ ຊຶ່ງຄະດີຄ້າງມາແຕ່ທ້າຍປີ 2020 ມີ 2.905 ເລື່ອງ (ອາຍາ 820 ເລື່ອງ, ແພ່ງ 1427 ເລື່ອງ, ການຄ້າ 304 ເລື່ອງ, ຄອບຄົວ 269 ເລື່ອງ, ສານທະຫານ 12 ເລື່ອງ), ຄະດີເຂົ້າໃໝ່ໃນ ປີ 2021 ມີ 5.187 ເລື່ອງ; ລວມທັງໝົດ 8.092 ເລື່ອງ; ໄດ້ພິຈາລະນາແກ້ໄຂ 4.801 ເລື່ອງ; ຍັງຄ້າງ ຫຼື ພວມເກັບກໍາຂໍ້ມູນ 3.291 ເລື່ອງ.

ຄະດີຢູ່ສານຂັ້ນຕົ້ນ (ເຂດ, ແຂວງ-ນະຄອນຫຼວງ, ສານທະຫານພາກ) ມີຄະດີຄ້າງມາແຕ່ປີ 2020 ຈໍານວນ 2.233 ເລື່ອງ (ອາຍາ 688, ແພ່ງ 1.002, ການຄ້າ 250, ຄອບຄົວ 223, ແຮງງານ 25, ເດັກ 35, ສານທະຫານ 10); ເຂົ້າໃໝ່ໃນປີ 2021 ຈໍານວນ 4.315 ເລື່ອງ; ລວມທັງໝົດ 6.548 ເລື່ອງ; ແກ້ໄຂໄດ້ 4.032 ເລື່ອງ, ຜ່ານການແກ້ໄຂຄະດີຂອງສານຂັ້ນຕົ້ນແລ້ວ, ຄູ່ຄວາມໃຊ້ສິດຂໍອຸທອນຕາມກົດໝາຍ 558 ເລື່ອງ, ຄູ່ຄວາມພໍໃຈສົ່ງໄປຈັດຕັ້ງປະຕິບັດ 3.474 ເລື່ອງ ແລະ ຄະດີທີ່ພວມສືບຕໍ່ເກັບກໍາຂໍ້ມູນ ແລະ ຄົ້ນຄວ້າພິຈາລະນາ (ຄະດີຍັງຄ້າງ) 2.516 ເລື່ອງ.

ສຳລັບຄະດີຢູ່ສານຂັ້ນຕົ້ນເຂດ, ພົ້ນເດັ່ນກວ່າໝູ່ໃນຄະດີອາຍາ ແມ່ນລັກຊັບພົນລະເມືອງ 257 ເລື່ອງ, ຄະດີແພ່ງແມ່ນສັນຍາກູ້ຍືມ 172 ເລື່ອງ, ຄະດີຄອບຄົວ ແມ່ນສາຍຜົວ-ເມຍຂໍຢ່າຮ້າງ 203 ເລື່ອງ. ສ່ວນຄະດີຢູ່ສານຂັ້ນຕົ້ນແຂວງ-ນະຄອນຫຼວງວຽງຈັນ, ພົ້ນເດັ່ນກວ່າໝູ່ໃນຄະດີອາຍາ ແມ່ນຢາເສບຕິດ 1.271 ເລື່ອງ, ຄະດີແພ່ງແມ່ນສັນຍາກູ້ຢືມ 33 ເລື່ອງ, ຄະດີການຄ້າແມ່ນສັນຍາກູ້ຢືມ 88 ເລື່ອງ, ຄະດີຄອບຄົວແມ່ນຢ່າຮ້າງ 42 ເລື່ອງ, ຄະດີເດັກແມ່ນຢາເສບຕິດ 62 ເລື່ອງ. ຂະນະທີ່ສານທະຫານ 3 ພາກ, ມີຄະດີທັງໝົດ 46 ເລື່ອງ, ແກ້ໄຂໄດ້ 33 ເລື່ອງ, ຄະດີທີ່ພົ້ນເດັ່ນແມ່ນ ຢາເສບຕິດ 19 ເລື່ອງ.

แชร์