ເຈົ້າໜ້າທີ່ຊີ້ແຈງບັນຫາຕາມແລວທາງລົດໄຟ ລາວ-ຈີນ ຜ່ານຫຼວງນ້ຳທາ

ພັທ ບຸນຮັກ ເຢີມມະລີ ຫົວໜ້າຫ້ອງການກອງບັນຊາການ, ຄະນະກອງເສນາຊ່ວຍວຽກຂັ້ນແຂວງຫຼວງນໍ້າທາ ໃຫ້ຮູ້ວ່າ: ຍັງມີຄວາມຫຍຸ້ງຍາກຕໍ່ການແກ້ໄຂບັນຫາປະຊາຊົນທີ່ຖືກຜົນກະທົບໃນການກໍ່ສ້າງເສັ້ນທາງລົດໄຟ, ຍັງມີບາງກຸ່ມຄົນສ້າງກະແສປັ່ນປ່ວນ, ຮຽກຮ້ອງຄ່າຊົດເຊີຍ, ນໍາພາປະຊາຊົນຄັດຄ້ານບໍ່ຍອມຍ້າຍໄປຢູ່ບ້ານຈັດສັນທີ່ທາງບໍລິສັດໄດ້ກໍ່ສ້າງໄວ້ໃຫ້ ແລະ ບັນຫາປະຊາຊົນລ່ວງເຂົ້າເຂດສະຫງວນທາງລົດໄຟເພື່ອໄປສວນ, ໄປເຮັດການຜະລິດ, ອີກທັງການປ່ອຍປະສັດລ້ຽງໃຫ້ເຂົ້າໄປໃນເຂດທາງລົດໄຟ ແລະ ອື່ນໆ.

ສຳລັບເສັ້ນທາງລົດໄຟລາວ-ຈີນ ເລີ່ມແຕ່ບໍ່ເຕັນ ຫາ ນະຄອນຫຼວງວຽງຈັນ, ມີຄວາມຍາວທັງໝົດ 409 ກິໂລແມັດ; ສະເພາະແລວທາງລົດໄຟຜ່ານແຂວງຫຼວງນ້ຳທາ ມີຄວາມຍາວທັງໝົດ 16,9 ກິໂລແມັດ, ມີ 2 ສະຖານີ (ສະຖານີບໍ່ເຕັນ ແລະ ສະຖານີນາເຕີຍ). ພາຍຫຼັງເສັ້ນທາງລົດໄຟໄດ້ເປີດ ນໍາໃຊ້ຢ່າງເປັນທາງການ, ເຈົ້າໜ້າທີ່ກອງບັນຊາການ ປກສ ແຂວງຫຼວງນໍ້າທາ ກໍຄືກໍາລັງຕໍາຫຼວດລົດໄຟ, ກໍໄດ້ປະຕິບັດໜ້າທີ່ເພື່ອຮັກສາຄວາມສະຫງົບຕາມແລວທາງດັ່ງກ່າວ ຈິ່ງຮູ້ໄດ້ສະພາບ ແລະ ສາເຫດຂອງບັນຫາຫຍຸ້ງຍາກທີ່ເກີດຂຶ້ນ.

ພັທ ບຸນຮັກ ເຢີມມະລີ, ເປີດເຜີຍຕື່ມວ່າ: ຍັງມີອີກຫຼາຍກໍລະນີທີ່ເກີດຂຶ້ນ, ຊຶ່ງສ່ວນໃຫຍ່ແມ່ນເກີດຢູ່ຫ່າງໄກຈາກສະຖານີ; ສ່ວນຢູ່ສະຖານີລົດໄຟບໍ່ເຕັນ ແລະ ນາເຕີຍ ກໍເຫັນວ່າຂອດປະສານງານລະຫວ່າງເຈົ້າໜ້າທີ່ກັບພະນັກງານບໍລິສັດທາງລົດໄຟຈີນ ຍັງພົບຄວາມຫຍຸ້ງຍາກ, ເນື່ອງຈາກພະນັກງານບໍລິສັດຍັງບໍ່ທັນເຫັນບົດບາດສຳຄັນຂອງເຈົ້າໜ້າທີ່, ຍັງຫ່າງເຫີນການພົວພັນຮ່ວມມື ແລະ ມີລັກສະນະເມີນເສີຍຕໍ່ການສະເໜີຕ່າງໆຂອງເຈົ້າໜ້າທີ່ຕໍາຫຼວດລົດໄຟ, ອີກທັງບ່ອນພັກເຊົາໃຫ້ເຈົ້າໜ້າຢູ່ສະຖານີລົດໄຟ ກໍຍັງບໍ່ທັນພຽງພໍກັບສະພາບຕົວຈິງ. ຊຶ່ງໃນລະຍະຜ່ານມາ, ທາງບໍລິສັດໄດ້ປະຊຸມຮ່ວມກັບພາກສ່ວນກ່ຽວຂ້ອງຂອງຝ່າຍລາວ ແລະ ໄດ້ຕົກລົງມອບຫໍພັກໃຫ້ເຈົ້າໜ້າທີ່ຕຳຫຼວດລົດໄຟ, ແຕ່ໃນຕົວຈິງທາງພະນັກງານບໍລິສັດທີ່ຮັບຜິດຊອບຢູ່ສະຖານີລົດໄຟກໍມອບຫ້ອງພັກໃຫ້ພຽງບາງຫ້ອງເທົ່ານັ້ນ, ເຮັດໃຫ້ບ່ອນພັກເຊົາຂອງເຈົ້າໜ້າທີ່ບໍ່ພຽງພໍ; ຢູ່ສະຖານີລົດໄຟທັງ 2 ແຫ່ງກໍຍັງບໍ່ທັນມີໂຕະຕັ່ງ, ອຸປະກອນເທຄນິຄຕ່າງໆໃນການຮັບໃຊ້ວຽກວິຊາສະເພາະ, ຕຽງນອນ, ບ່ອນຄົວກິນ, ພາຫະນະຮັບໃຊ້ ແລະ ອື່ນໆກໍບໍ່ພຽງພໍ; ສ່ວນການເຄື່ອນໄຫວແກ້ໄຂວຽກງານວິຊາສະເພາະຕ່າງໆ ແລະ ການແກ້ໄຂຊີວິດການເປັນຢູ່ຂອງພະນັກງານທີ່ປະຕິບັດໜ້າທີ່ຢູ່ສະຖານີລົດໄຟ, ກໍຍັງບໍ່ທັນສາ ມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງສະພາບຕົວຈິງເພາະມີຄວາມຫຍຸ້ງຍາກດ້ານງົບປະມານ ແລະ ພະນັກງານຕຳຫຼວດລົດໄຟສ່ວນໃຫຍ່ກໍຍັງບໍ່ທັນເຂົ້າໃຈແຈ້ງຕໍ່ພາລະບົດບາດ, ໜ້າທີ່ ແລະ ຂອບເຂດສິດຂອງຕົນ, ເຮັດໃຫ້ພະນັກງານຈໍານວນໜຶ່ງຍັງລະເລີຍຕໍ່ການປະຕິບັດໜ້າທີ່.

ທັງນີ້, ຫົວໜ້າຫ້ອງການກອງບັນຊາການ, ຄະນະກອງເສນາຊ່ວຍວຽກຂັ້ນແຂວງຫຼວງນໍ້າທາ, ຈິ່ງຂໍສະເໜີໃຫ້ກົມຕຳຫຼວດລົດໄຟ ເປັນໃຈກາງປະສານງານກັບບໍລິສັດກ່ຽວຂ້ອງ ແລະ ພະນັກງານຂອງບໍລິສັດທີ່ປະຈຳຢູ່ແຕ່ລະສະຖານີ, ໃຫ້ເພີ່ມທະວີການຮ່ວມມືປະສານງານ ແລະ ອຳນວຍຄວາມສະດວກໃນການເຄື່ອນໄຫວປະຕິບັດໜ້າທີ່ຂອງຕຳຫຼວດລົດໄຟໃຫ້ຫຼາຍຂຶ້ນ ແລະ ຖ້າເປັນໄປໄດ້ກໍຢາກສະເໜີໃຫ້ທາງບໍລິສັດຊ່ວຍຕອບສະໜອງທາງດ້ານອຸປະກອນເທຄນິຄຕ່າງໆ ເພື່ອຮັບໃຊ້ວຽກງານປ້ອງກັນຄວາມສະຫງົບ ແລະ ທີ່ສໍາຄັນແມ່ນຢາກໃຫ້ກົມຕໍາຫຼວດທາງລົດໄຟ ເປີດການຝຶກອົບຮົມໃຫ້ເຈົ້າໜ້າທີ່ຕຳຫຼວດລົດໄຟຢູ່ແຂວງຫຼວງນໍ້າທາ, ເພື່ອເຮັດໃຫ້ພະນັກງານຜູ້ປະຕິບັດຕົວຈິງມີຄວາມຮູ້ຄວາມສາມາດຂຶ້ນກວ່າເກົ່າ.

ຂອບໃຈຂໍ້ມູນຈາກເພຈ: ຄວາມສະຫງົບ

แชร์