2022 ແລະ 2024 ສປປ ລາວ ເປັນເຈົ້າພາບ ແລະປະທານຈັດປະຊຸມຂອບທະຫານອາຊຽນ

ກະຊວງປ້ອງກັນປະເທດ, ໄດ້ກະກຽມໃຫ້ແກ່ການເປັນເຈົ້າພາບ ແລະ ປະທານຈັດບັນດາກອງປະຊຸມໃນຂອບທະຫານອາຊຽນ ໃນປີ 2022 ແລະ 2024. ດັ່ງນັ້ນ, ເມື່ອວັນທີ 28 ກຸມພາຜ່ານມາຈິ່ງໄດ້ຈັດກອງປະຊຸມເຜີຍແຜ່ຂໍ້ຕົກລົງ,ໂດຍການເປັນປະທານຂອງ ພົນຕີ ວົງຄໍາ ພົມມະກອນ ຮອງລັດຖະມົນຕີກະຊວງປ້ອງກັນປະເທດ, ມີຄະນະນໍາບັນດາກົມໃຫຍ່, ຫ້ອງວ່າການກະຊວງ ແລະພາກສ່ວນກ່ຽວຂ້ອງເຂົ້າຮ່ວມ.

ທັງນີ້, ພົນຈັດຕະວາ ແກ່ນຈັນ ນັນທະລັງສີ ຫົວໜ້າກົມພົວພັນຕ່າງປະເທດ ກະຊວງປ້ອງກັນປະເທດ, ໄດ້ຜ່ານບັນດາຂໍ້ຕົກລົງເພື່ອກະກຽມໃຫ້ແກ່ການເປັນເຈົ້າພາບ ແລະ ປະທານຈັດກອງປະຊຸມໃນຂອບທະຫານອາຊຽນຂອງກອງທັບປະຊາຊົນລາວ ໃນປີ 2022 ແລະ 2024. ໃນນີ້, ມີຂໍ້ຕົກລົງວ່າດ້ວຍການແຕ່ງຕັ້ງຄະນະຊີ້ນໍາລວມ, ກອງເລຂາ, ບັນດາອະນຸກຳມະການກະກຽມໃຫ້ແກ່ການເປັນເຈົ້າພາບ ແລະປະທານຈັດກອງປະຊຸມລັດຖະມົນຕີປ້ອງກັນປະເທດອາຊຽນ ຄັ້ງທີ 18, ອາ ຊຽນ-ບວກ ຄັ້ງທີ 11 ແລະ ກອງປະຊຸມປິ່ນອ້ອມອື່ນໆໃນປີ 2024; ຂໍ້ຕົກລົງຂອງກະຊວງປ້ອງກັນປະເທດວ່າດ້ວຍການກະກຽມ ແລະຈັດຕັ້ງກອງປະຊຸມຜູ້ບັນຊາການທະຫານອາກາດອາຊຽນ (AACC) ຄັ້ງທີ 19; ຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການກະກຽມ ແລະຈັດຕັ້ງກອງປະຊຸມໜ່ວຍງານວິຊາການດ້ານການສຶກສາ ແລະການຝຶກອົບຮົມຂອງທະຫານອາກາດອາຊຽນ (AAFET-WG Meeting) ຄັ້ງທີ 9, ພ້ອມນີ້ກໍໄດ້ສະເໜີບົດກ່ຽວກັບການຮ່ວມມືພາຍໃຕ້ຂອບກອງປະຊຸມລັດຖະມົນຕີປ້ອງກັນປະເທດອາຊຽນ-ບວກ, ກອງປະຊຸມຜູ້ບັນຊາການທະຫານສູງສຸດ ແລະກອງປະຊຸມເວທີພາກພື້ນອາຊຽນ.

ໃນວາລະດຽວກັນ, ຮອງລັດຖະມົນຕີກະຊວງປ້ອງກັນປະເທດກໍໄດ້ຍົກໃຫ້ເຫັນວ່າ: ການເປັນເຈົ້າພາບຈັດກອງປະຊຸມຄັ້ງນີ້, ບໍ່ພຽງແຕ່ເປັນການປະຕິບັດສິດ ແລະ ພັນທະຂອງການເປັນປະເທດສະມາຊິກຂອງອາຊຽນເທົ່ານັ້ນ; ແຕ່ຍັງເປັນໂອກາດໃຫ້ແກ່ການສົ່ງເສີມການພົວພັນຮ່ວມມືລະຫວ່າງບັນດາປະເທດສະມາຊິກອາຊຽນ ແລະ ອາຊຽນ-ບວກ, ທັງເປັນການຍົກສູງບົດບາດຂອງ ສປປ ລາວ ໂດຍສະເພາະແມ່ນ ກອງທັບປະຊາຊົນລາວໃນເວທີລະດັບພາກພື້ນ ແລະສາກົນ. ທັງເປັນໂອກາດອັນດີໃຫ້ແກ່ກອງທັບເຮົາໃນການໂຄສະນາແນວທາງນະໂຍບາຍຂອງ ພັກ-ລັດ ແລະ ຍາດແຍ່ງເອົາຜົນປະໂຫຍດມາສູ່ປະເທດຊາດກໍຄືກອງທັບປະຊາຊົນລາວ.

ຂອບໃຈຂໍ້ມູນຈາກ: ໜັງສືພິມກອງທັບ

แชร์