ລາຄານໍ້າມັນດິບປັບເພີ່ມ ຄາດເຖິງ 115 ໂດລາຕໍ່ບາຣ໌ເຣລ

ມີການປັບຂຶ້ນລາຄານໍ້າມັນດິບເວສຕ໌ເທ໊ກຊັສ ແລະ ເບຣນທ໌, ເພາະຕະຫຼາດເກີດຄວາມກັງວົນຕໍ່ລະບົບຕ່ອງໂສ້ການສະໜອງນໍ້າມັນດິບຣັສເຊຍ. ຊຶ່ງທະນາຄານເພື່ອການລົງທຶນຂ້າມຊາດ ແລະບໍລິສັດໃຫ້ບໍລິການທາງການເງິນຂອງອະເມຣິກາ (ໂກລດ໌ແມນແຊຄສ໌) ໄດ້ຄາດຄະເນວ່າ: ລາຄານໍ້າມັນດິບເບຣນທ໌ອາດຈະເພີ່ມຂຶ້ນຈຸລະດັບ 115 ໂດລາສະຫະລັດຕໍ່ບາຣ໌ເຣລ ພາຍໃນ 1 ເດືອນ.

ສຳນັກຂ່າວຕ່າງປະເທດຊຶ່ງລາຍງານໃນຕອນເຊົ້າມື້ນີ້, ໄດ້ລະບຸປັດໄຈທີ່ເຮັດໃຫ້ມີການປັບຂຶ້ນລາຄານ້ຳມັນດິບໃນຕະຫຼາດໂລກແມ່ນໄດ້ຮັບຜົນກະທົບມາຈາກການຂ້ຳບາດທາງທຸລະກຳການເງິນຂອງຊາດຕາເວັນຕົກ, ຊຶ່ງອາດສົ່ງຜົນກະທົບຮຸນແຮງຕໍ່ການສົ່ງອອກນ້ຳມັນຂອງຣັສເຊຍ. ທັງນີ້, ໂກລດ໌ແມນແຊຄສ໌ ໄດ້ຄາດການວ່າ: ລາຄານ້ຳມັນດິບເບຣນທ໌ຕໍ່ບາຣ໌ເຣລ (1 ບາຣ໌ເຣລ ມີປະມານ 160 ລິດ) ອາດຈະພຸ່ງຂຶ້ນແຕະລະດັບ 115 ໂດລາສະຫະລັດ ພາຍໃນໄລຍະເວລາ 1 ເດືອນ.

ລາຍງານດຽວກັນໃຫ້ຮູ້ຕື່ມວ່າ: ຜູ້ສົ່ງອອກນ້ຳມັນ ແລະ ຊາດພັນທະມິດ (ໂອເປກພລັສ)ໄດ້ປັບຫຼຸດຕົວເລກຄາດຄະເນຕ່ອງໂສ້ການສະໜອງນ້ຳມັນດິບສ່ວນເກີນໃນປີ 2022 ຫຼຸດລົງ 0,2ລ້ານບາຣ໌ເຣລຕໍ່ວັນ ສູ່ລະດັບ 1,1 ລ້ານບາຣ໌ເຣລຕໍ່ວັນ; ທາງດ້ານຕະຫຼາດໂລກກໍຈົດຈໍ່ລໍຟັງຜົນການປະຊຸມໂອເປກໃນມື້ອື່ນ ກ່ຽວກັບນະໂຍບາຍການຜະລິດສຳລັບເດືອນເມສາ 2022, ຊຶ່ງຜູ້ຄ້ານ້ຳມັນໃນຕະຫຼາດໂລກກໍຄາດຫວັງວ່າທາງກຸ່ມໂອເປກຈະຄົງມະຕິປັບເພີ່ມການຜະລິດທີ່ 4ແສນບາຣ໌ເຣລຕໍ່ວັນ.

ຂະນະທີ່ສະຫະລັດ ແລະ ບັນດາປະເທດທີ່ບໍລິໂພກນໍ້າມັນລາຍໃຫຍ່, ກໍໄດ້ມີການຫາລືແລະ ພິຈາລະນາກ່ຽວກັບຄວາມເປັນໄປໄດ້ໃນການຂາຍນໍ້າມັນຈາກຄັງສຳຮອງນໍ້າມັນດິບເຊີງຍຸດທະສາດ (SPR) ເພີ່ມເຕີມປະມານກວ່າ 70 ລ້ານບາຣ໌ເຣລ ຫຼັງຈາກທີ່ລາຄານໍ້າມັນດິບປັບຕົວຂຶ້ນຢ່າງຕໍ່ເນື່ອງ.

แชร์