ສປປ ລາວ ພົບຜູ້ຕິດເຊື້ອ ໂອມິຄຣອນ 65 ຄົນ

ມາຮອດປັດຈຸບັນ, ມີຜູ້ຕິດເຊື້ອພະຍາດໂຄວິດ-19 ສາຍພັນ ໂອມິຄຣອນ ໃນ ສປປ ລາວ 65 ຄົນ. ໂດຍກະຊວງສາທາລະນະສຸກ, ໄດ້ສະແດງຄວາມກັງວົນຕໍ່ສະຖານະການແພ່ເຊື້ອທີ່ອາດຈະເກີດຂຶ້ນໃນອະນາຄົດ.

ໂດຍທ່ານ ວິສິດ ຄຳລືຊາ ຫົວໜ້າສູນສື່ສານເພື່ອສຸຂະພາບ ແລະ ສຸຂະສຶກສາ, ກະຊວງສາທາ ລະນະສຸກ ແລະ ດຣ ພອນປະດິດ ສັງໄຊຍະລາດ ຫົວໜ້າສູນວິເຄາະ ແລະ ລະບາດວິທະຍາກະຊວງສາທາລະນະສຸກ, ໄດ້ຖະແຫຼງໃນວັນທີ 1 ມີນາ 2022 ທີ່ສູນສື່ສານເພື່ອສຸຂະພາບ ແລະ ສຸຂະສຶກສາ, ກະຊວງສາທາລະນະສຸກ ຮ່ວມກັບ ອົງການອະນາໄມໂລກປະຈຳລາວ.

ທັງນີ້, ຫົວໜ້າສູນວິເຄາະ ແລະ ລະບາດວິທະຍາ ໄດ້ໃຫ້ຮູ້ວ່າ: ສະພາບລະບາດຂອງພະຍາດໂຄວິດ-19 ໃນ ສປປ ລາວ ມາຮອດວັນທີ 28 ກຸມພາ 2022, ໄດ້ເກັບຕົວຢ່າງມາກວດທັງໝົດ 1.349.025 ຕົວຢ່າງ, ມີການຢັ້ງຢືນຕິດເຊື້ອທັງໝົດ 142.609 ຄົນ, ປິ່ນປົວຫາຍດີ 117.711 ຄົນ, ກຳລັງປິ່ນປົວ 24.277 ຄົນ ແລະ ເສຍຊີວິດ 621 ລາຍ.

ຢ່າງໃດກໍຕາມ, ການກວດພົບເຊື້ອໂຄວິດ-19 ກາຍພັນສາຍພັນ ໂອມິຄຣອນ 65 ຄົນ, ກໍຮຽກຮ້ອງໃຫ້ທົ່ວສັງຄົມຈົ່ງມີສະຕິລະວັງຕົວເນື່ອງຈາກການກວດພົບຜູ້ຕິດເຊື້ອສ່ວນຫຼາຍແມ່ນບໍ່ໄດ້ຮັບການສັກວັຄຊີນ. ຂະນະທີ່ລາຍງານຜູ້ເສຍຊີວິດສ່ວນຫຼາຍກໍບໍ່ໄດ້ສັກວັຄຊີນເຊັ່ນດຽວກັນ, ນອກນັ້ນກໍແມ່ນຜູ້ອາຍຸສູງ ແລະຜູ້ມີພະຍາດປະຈຳຕົວ.

แชร์