ອັດຕະປື ຝຶກອົບຮົມວາງແຜນການເງິນ ການບັນຊີ ສຳລັບ SME

ພະແນກອຸດສະຫະກຳ ແລະ ການຄ້າແຂວງອັດຕະປື, ໄດ້ສໍາເລັດການຈັດຊຸດຝຶກອົບຮົມວຽກງານວາງແຜນທຸລະກິດ, ການເງິນ ແລະ ການບັນຊີ ສໍາລັບວິສາຫະກິດຂະໜາດນ້ອຍ ແລະ ຂະໜາດກາງ (SME) ເພື່ອສ້າງຄວາມເຂັ້ມແຂງເພີ່ມຂຶ້ນໃຫ້ແກ່ການດຳເນີນທຸລະກິດ.

ຊຸດຝຶກອົບຮົມຄັ້ງນີ້, ຈັດຂຶ້ນເມື່ອວັນທີ 28 ກຸມພາ 2022 ທີ່ຫ້ອງປະຊຸມພະແນກກະສິກໍາແລະ ປ່າໄມ້ແຂວງອັດຕະປື, ໂດຍການເປັນປະທານຂອງ ທ່ານ ໂອພາດ ວົງມາຈຽງ ຮອງຫົວໜ້າພະແນກອຸດສາຫະກຳ ແລະ ການຄ້າແຂວງ, ມີທ່ານ ບຸນກອງ ໄຊຍະແສງ ຮອງປະທານສະພາການຄ້າ ແລະ ອຸດສາຫະກຳ, ພ້ອມທັງວິທະຍາກອນ ແລະ ສຳມະນາກອນຈາກຫົວໜ່ວຍທຸລະກິດອ້ອມຂ້າງແຂວງເຂົ້າຮ່ວມ.

ຮອງຫົວໜ້າພະແນກອຸດສະຫະກຳ ແລະ ການຄ້າແຂວງອັດຕະປື, ໄດ້ຍົກໃຫ້ເຫັນຈຸດປະສົງ ແລະ ເປົ້າໝາຍຂອງການຈັດຝຶກອົບຮົມໃນຄັ້ງນີ້, ຊຶ່ງປະຕິບັດຕາມແຜນພັດທະນາເສດຖະກິດ-ສັງຄົມຂອງແຂວງ ແລະ ແຜນພັດທະນາວິສາຫະກິດຂະໜາດນ້ອຍ ແລະ ກາງ ທີ່ໄດ້ສໍາເລັດການຜັນຂະຫຍາຍການສ້າງແຜນນະໂຍບາຍຊຸກຍູ້ສົ່ງເສີມ ແລະພັດທະນາວິສາຫະກິດຂະໜາດນ້ອຍ ແລະກາງຂອງແຂວງ. ໂດຍໄດ້ຄັດເລືອກເອົາ 5 ນະໂຍບາຍເພື່ອນຳມາສົ່ງເສີມ SME ພາຍໃນແຂວງເຊັ່ນ: ນະໂຍບາຍສ້າງສະພາບແວດລ້ອມທີ່ເອື້ອອຳນວຍໃຫ້ແກ່ການສ້າງ ແລະ ດຳເນີນທຸລະກິດ; ນະໂຍບາຍສົ່ງເສີມເພີ່ມຜະລິດຕະພາບ, ເທຄໂນໂລຢີ ແລະນະວັດຕະກຳ; ນະໂຍບາຍສົ່ງເສີມການເຂົ້າຫາແຫຼ່ງທຶນ; ນະໂຍບາຍເຂົ້າເຖິງ ແລະ ຂະຫຍາຍຕະຫຼາດ ແລະ ນະໂຍບາຍສ້າງ ແລະພັດທະນາຜູ້ປະກອບກິດຈະການໃໝ່.

ທັງນີ້, ແຂວງອັດຕະປື ໄດ້ຂຶ້ນທະບຽນວິສາຫະກິດສຳລັບວິສາຫະກິດຂະໜາດນ້ອຍ ແລະກາງ ຈຳນວນທັງໝົດ 2.425 ຫົວໜ່ວຍ. ຊຶ່ງປີ 2022 ນີ້, ມີການເພີ່ມຂຶ້ນຂອງວິສາຫະກິດຂະໜາດນ້ອຍ ແລະກາງ 172 ຫົວໜ່ວຍ. ສຳລັບເປົ້າໝາຍຫຼັກຂອງການຈັດຝຶກອົບຮົມກໍເພື່ອໃຫ້ຜູ້ປະກອບການ SME ເຂົ້າໃຈໃນວິທີການຄຸ້ມຄອງ, ການວາງແຜນທຸລະກິດການເງິນ ແລະການບັນຊີເງິນສົດ. ຊຶ່ງວາລະຝຶກອົບຮົມຈະດໍາເນີນເປັນເວລາ 5 ວັນ (28 ກຸມພາ-4 ມີນາ).

แชร์