ສົ່ງເສີມຄວາມຫຼາກຫຼາຍ ຂະຫຍາຍໂອກາດແກ່ໄວໜຸ່ມ ມີສ່ວນຮ່ວມໃນທຸລະກິດ

ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ຮ່ວມກັບບັນດາຫົວໜ່ວຍທຸລະກິດລາວ, ໄດ້ຈັດເວທີສົນທະນາສົ່ງເສີ່ມຄວາມຫຼາກຫຼາຍ ແລະ ການມີສ່ວນຮ່ວມ (D&I) ໃນທຸລະກິດ ເພື່ອສ້າງຄວາມເຂົ້າໃຈກ່ຽວກັບຜົນປະໂຫຍດ, ການປະຕິບັດ ແລະ ຜົນກຳໄລ ໂດຍນໍາໃຊ້ວິທີການແບບມີສ່ວນຮ່ວມສໍາລັບບ່ອນເຮັດວຽກ ແລະ ສະພາບແວດລ້ອມທີ່ເອື້ອອໍານວຍທາງທຸລະກິດມາໃຊ້. ເພື່ອສ້າງຄວາມຮັບຮູ້ກ່ຽວກັບຫຼັກການ D&I ແລະ ຜົນປະໂຫຍດໃຫ້ແກ່ວິສາຫະກິດທີ່ດໍາເນີນທຸລະກິດ ຢູ່ ສປປ ລາວ, ແນໃສ່ເສີມສ້າງຄວາມຍືດຍຸ່ນຂອງທຸລະກິດ ຫຼັງຟື້ນຕົວຈາກການລະບາດຂອງພະຍາດ ໂຄວິດ-19 ແລະ ນໍາເອົາທ່າແຮງດ້ານປະຊາກອນໄວໜຸ່ມມາພັດທະນາໃຫ້ເກີດການຈ້າງງານຢ່າງຫຼວງຫຼາຍ.

ເວທີດັ່ງກ່າວຈັດຂຶ້ນເມື່ອອາທິດທີ່ຜ່ານມາ, ໂດຍທ່ານ ທະນົງສິນ ກັນລະຍາ ຮອງປະທານ ສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ກ່າວວ່າ: ການລະບາດຂອງພະຍາດໂຄວິດ-19 ໄດ້ສົ່ງຜົນກະທົບຕໍ່ຂະແໜງການທ່ອງທ່ຽວ, ບໍລິການ ແລະ ຂະແໜງການຜະລິດ. ຊຶ່ງທຸລະກິດຫຼາຍຂະແໜບໍ່ພຽງແຕ່ສູນເສຍລາຍໄດ້, ເພາະຍັງກະທົບໃສ່ດ້ານຊັບພະຍາກອນມະນຸດ ແລະ ສູນເສຍພະນັກງານທີ່ມີຄວາມສາມາດອີກດ້ວຍ. ເພື່ອຊ່ວຍແກ້ໄຂບັນຫາດັ່ງກ່າວ, ພວກເຮົາກຳລັງພິຈາລະນານະວັດຕະກໍາພາຍໃນ, ທ່າອຽງຂອງສາກົນ ແລະ ການປະຕິບັດທີ່ດີທີ່ສຸດ ທີ່ບັນດາທຸລະກິດລາວສາມາດນຳມາປັບໃຊ້ໄດ້, ເພື່ອຊ່ວຍໃຫ້ທຸລະກິດສາມາດຟື້ນຕົວຈາກຜົນກະທົບຂອງການລະບາດ ແລະ ຊຸກຍູ້ການເຕີບໂຕທາງດ້ານເສດຖະກິດຂອງປະເທດ.

ຢ່າງໃດກໍຕາມ, ໃນໄລຍະ 2 ປີທີ່ຜ່ານມາ ການແພ່ລະບາດຂອງພະຍາດໂຄວິດ-19 ໄດ້ສົ່ງຜົນກະທົບຕໍ່ທຸລະກິດເກືອບທັງໝົດໃນໂລກ. ເຮັດໃຫ້ລະບົບຕ່ອງໂສ້ຂອງການສະໜອງຢຸດສະງັກ, ຄວາມຕ້ອງການທາງດ້ານຜະລິດຕະພັນ ແລະ ການບໍລິການຫຼຸດລົງ, ອີກທັງການປິດທຸລະກິດຕາມຄໍາສັ່ງຂອງລັດຖະບານ ແລະ ການຫັນປ່ຽນພະນັກງານ. ຊຶ່ງໃນປີ 2021 ຢູ່ ສປປ ລາວ ປະມານ 5,5% ຂອງທຸລະກິດແມ່ນປິດກິດຈະການຢ່າງຖາວອນ ແລະ 33% ປິດກິດຈະການຊົ່ວຄາວ; ສ່ວນບັນດາທຸລະກິດທີ່ຍັງດໍາເນີນກໍປະສົບກັບບັນຫາລາຍໄດ້ຫຼຸດລົງ 65%. ຂະນະທີ່ການພິສູດຂອງສາກົນໄດ້ສະແດງໃຫ້ເຫັນວ່າ 70% ຂອງທຸລະກິດທີ່ມີຄວາມຫຼາກຫຼາຍ ແມ່ນມີທ່າອຽງໃນການເຂົ້າເຖິງຕະຫຼາດໃໝ່ ແລະ ໄດ້ຮັບຜົນກໍາໄລເປັນເງິນຫຼາຍກວ່າ 2,3 ເທົ່າ, ຊຶ່ງຫຼາຍກວ່າທຸລະກິດທີ່ບໍ່ມີການຈ້າງງານພະນັກງານທີ່ມາຈາກກຸ່ມຄົນທີ່ຫຼາກຫຼາຍ.

ທາງດ້ານທ່ານ ນາງ ແຄັດເທີຣີນ ເຟືອງ ຮອງຜູ້ຕາງໜ້າອົງການສະປະປະຊາຊາດ ເພື່ອການພັດທະນາ ປະຈໍາ ສປປ ລາວ, ກໍໄດ້ກ່າວວ່າ: ການລະບາດຂອງພະຍາດໂຄວິດ-19 ເຮັດໃຫ້ເກີດມີການຫວ່າງງານສະເລ່ຍຈາກ 2% ເປັນ 22% ໃນ ສປປ ລາວ, ຊຶ່ງມີຫຼາຍກວ່າ 5 ແສນຄົນສູນເສຍວຽກເຮັດງານທຳ ຫຼື ຫາວຽກເຮັດບໍ່ໄດ້. ໃນນີ້ ແມ່ຍິງ, ຄົນພິການ ແລະ ໄວໜຸ່ມ ເປັນກຸ່ມຄົນຮັບຜົນກະທົບຫຼາຍທີ່ສຸດ. ຊຶ່ງໃນຂະນະທີ່ເສດຖະກິດຂອງລາວເລີ່ມຟື້ນຕົວຄືນ, ກໍຈະເປັນໂອກາດດີໃຫ້ແກ່ນັກທຸລະກິດໃນການເລືອກເອົາຄົນທີ່ເກ່ງ ແລະ ໂດດເດັ່ນຈາກກຸ່ມປະຊາກອນລາວທີ່ມີຄວາມຫຼາກຫຼາຍ ແລະ ບັນດາບໍລິສັດທີ່ນໍາເອົາຫຼັກການ D&I ມາໃຊ້ກໍຈະເປັນຜູ້ນໍາໜ້າໃນການແຂ່ງຂັນ.

แชร์