ນະຄອນຫຼວງ ຂະຫຍາຍອີກ 3 ສາຂາ ຂຶ້ນທະບຽນພາຫະນະ ແລະ ການຂັບຂີ່

ເຫັນໄດ້ຄວາມສໍາຄັນ ແລະ ຈໍາເປັນໃນໄລຍະໃໝ່ ຕໍ່ວຽກງານຂຶ້ນທະບຽນພະຫານະ ແລະ ການຂັບຂີ່. ດັ່ງນັ້ນ, ກອງຄຸ້ມຄອງພາຫະນະ ແລະ ການຂັບຂີ່, ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ຈິ່ງໄດ້ຂະຫຍາຍສາຂາຢູ່ 3 ເມືອງຄື: ສາຂາເມືອງຫາດຊາຍຟອງ, ເມືອງໄຊທານີ ແລະ ນາຊາຍທອງ ເພື່ອຍົກລະດັບບໍລິການໃຫ້ມີຄວາມວ່ອງໄວ, ໂປ່ງໃສ, ທັນສະໄໝ ແລະ ຕອບສະໜອງໄດ້ຄວາມຕ້ອງການຂອງສັງຄົມ.

ສຳລັບຫ້ອງການຄຸ້ມຄອງພາຫະນະ ແລະ ການຂັບຂີ່ ທັງ 3 ສາຂາປະກອບມີ: ຫ້ອງການເຮັດວຽກພະນັກງານ, ຫ້ອງປະຊຸມ, ຫ້ອງລະບົບເກັບກໍາຂໍ້ມູນ (ເຊີຣ໌ຟເວີຣ໌), ຫ້ອງການບໍລິການ, ຫ້ອງລໍຖ້າຂອງແຂກ, ຫ້ອງການອາກອນ, ຫ້ອງການຄັງເງິນ, ຫ້ອງການຊັບສິນນະຄອນຫຼວງວຽງຈັນ, ຫ້ອງຕຳຫຼວດຕິດປ້າຍ, ມີເສັ້ນທາງເພື່ອເຂົ້າກວດກາເທຄນິຄ 3 ຊ່ອງ. ໃນເບື້ອງຕົ້ນແມ່ນຈະເປີດນຳໃຊ້ກ່ອນ 1 ຊ່ອງ ຊຶ່ງໄດ້ປະກອບເຄື່ອງກວດກາເທຄນິຄທັນສະໄໝ ສາມາດໃຫ້ບໍລິການລົດເບົາ, ລົດບັນທຸກ ແລະ ລົດໂດຍສານ. ໃນນັ້ນປະກອບມີເຄື່ອງກວດກາສຽງ, ຄວັນ, ລະບົບໄຟ, ແສງສະຫວ່າງ, ລະບົບເບກ, ຊ່ວງລ່າງ ແລະ ສູນຕັ້ງລໍ້. ຊຶ່ງອຸປະກອນປະກອບເຂົ້າຢູ່ໃນສູນລ້ວນເປັນເຄື່ອງທີ່ທັນສະໄໝ ແລະ ໄດ້ມາດຕະຖານສາກົນ.

ທັງນີ້, ທ່ານ ໂອໃດ ໄຊສິດ ຮອງຫົວໜ້າກອງຄຸ້ມຄອງພາຫະນະ ແລະການຂັບຂີ່, ຫົວໜ້າສາຂາເມືອງຫາດຊາຍຟອງ ໄດ້ໃຫ້ສຳພາດຕໍ່ສື່ໃນວັນທີ 28 ກຸມພາ 2022 ວ່າ: ເພື່ອຮັບປະກັນແກ່ການດຳເນີນງານຂອງກອງຄຸ້ມຄອງພາຫະນະ ແລະ ການຂັບຂີ່ ໃຫ້ມີຄວາມສະຫງົບປອດໄພ 100%, ທັງເປັນການຕ້ານ ແລະ ສະກັດກັ້ນປາກົດການຫຍໍ້ທໍ້ຕ່າງໆ. ຈິ່ງໄດ້ປັບປຸງ ແລະ ສ້າງລະບົບກົນໄກປະສານງານ, ແບບແຜນວິທີເຮັດວຽກຢ່າງມີວິທະຍາສາດໃຫ້ດີຂຶ້ນເລື້ອຍໆ ແລະ ຂະຫຍາຍຈຸດບໍລິການຂຶ້ນທະບຽນ, ການກວດກາເທຄນິຄ, ທັງຂະຫຍາຍການຈັດສອບເສັງການຂັບຂີ່ຢູ່ຮາກຖານບັນດາເມືອງທີ່ມີເງື່ອນໄຂໃຫ້ໄດ້ 3 ແຫ່ງຄື: ເມືອງໄຊທານີ, ເມືອງໄຊເສດຖາ ແລະ ເມືອງຫາດຊາຍຟອງ. ແນໃສ່ເຮັດໃຫ້ການກວດກາເທຄນິຄ, ຂຶ້ນທະບຽນພາຫະນະ ແລະ ສອບເສັງໃບຂັບຂີ່ໄດ້ຢ່າງທົ່ວເຖິງ ແລະ ສ້າງລະບົບຖານຂໍ້ມູນກັບພາກສ່ວນທີ່ກ່ຽວຂ້ອງຂອງພາກລັດໃນການເຊື່ອມໂຍງການຂຶ້ນທະບຽນ, ສອບເສັງໃບຂັບຂີ່. ເພື່ອເຮັດໃຫ້ການຄຸ້ມຄອງ, ບໍລິຫານ ແລະ ການບໍລິການມີປະສິດທິ ພາບສູງ ໂດຍນໍາໃຊ້ລະບົບ ICT ເພື່ອຄຸ້ມຄອງຖານຂໍ້ມູນພາຫະນະ ແລະ ເຊື່ອມໂຍງຂໍ້ມູນພາຫະນະ ແລະ ການຂັບຂີ່ ໃຫ້ເຊື່ອມຈອດກັນໃນທົ່ວປະເທດ, ໂດຍນຳໃຊ້ເທຄໂນໂລຢີທີ່ທັນສະໄໝກ້າວໜ້າເຂົ້າໃນການຄຸ້ມຄອງເກັບລາຍຮັບຕາມກົນໄກປະຕູດຽວ ແລະ ການຈ່າຍເງິນຜ່ານລະບົບທະນາຄານເພື່ອປ້ອງກັນບໍ່ໃຫ້ລາຍຮັບຕົກເຮ່ຍເສຍຫາຍ.

ຂອບໃຈຂໍ້ມູນຈາກ: ສຳນັກຂ່າວສານປະເທດລາວ

แชร์