ຖວທ ແຂວງວຽງຈັນ ນຳສະເໜີຜົນງານໃນໜຶ່ງປີຜ່ານມາ

ໃນໄລຍະໜຶ່ງປີຜ່ານມາ, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງວຽງຈັນ, ໄດ້ພ້ອມກັນຈັດຕັ້ງປະຕິບັດຕາມພາລະບົດບາດໃນການເປັນເສນາທິການໂຄສະນາເຜີຍແຜ່ແນວທາງ, ແຜນນະໂຍບາຍຂອງພັກ, ລະບຽບກົດໝາຍຂອງລັດຜ່ານພາຫະນະສື່ມວນຊົນ ແລະລະບົບໂທລະໂຄ່ງເຮັດໃຫ້ສັງຄົມໄດ້ຮັບຮູ້ຂໍ້ມູນຂ່າວສານຢ່າງກ້ວາງຂວາງ ແລະວ່ອງໄວ, ໄດ້ສ້າງບ້ານວັດທະນະທຳ, ສຳຫຼວດສະຖານທີ່ອັນເປັນມໍລະດົກທາງທຳມະຊາດ, ວັດຖຸບູຮານ ແລະວາງແຜນຟື້ນຟູການທ່ອງທ່ຽວ, ເພື່ອຊຸກຍູ້ການຜະລິດທີ່ຕິດພັນກັບພາກບໍລິການ ແລະອື່ນໆ, ຊຶ່ງໄດ້ປະກອບສ່ວນເຮັດໃຫ້ການພັດທະນາເສດຖະກິດ-ສັງຄົມຂອງແຂວງວຽງຈັນ ມີທ່າກ້າວຂະຫຍາຍຕົວ.

ໂດຍທ່ານ ນາງ ອິ່ນຄຳ ພັນດາລາ ກໍາມະການພັກແຂວງ, ຫົວໜ້າພະແນກ ຖວທ ແຂວງວຽງຈັນ, ໄດ້ຫຼຸບການຈັດຕັ້ງປະຕິບັດວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວໃນປີ 2021 ແລະ ທິດທາງແຜນການປີ 2022 ຕໍ່ກອງປະຊຸມວຽກງານ ຖວທ ແຂວງ ຊຶ່ງຈັດຂຶ້ນເມື່ອວັນທີ 25 ກຸມພາ 2022 ທີ່ໂຮງແຮມອໍາມາລີ ເມືອງວັງວຽງ, ໂດຍການເຂົ້າຮ່ວມຂອງ ທ່ານ ນາງ ສວນສະຫວັນ ວິຍາເກດ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ຄໍາພັນ ສິດທິດໍາພາ ເຈົ້າແຂວງວຽງຈັນ, ມີພະແນກການກ່ຽວຂ້ອງ, ຫົວໜ້າຫ້ອງການ ຖວທ 11 ເມືອງທົ່ວແຂວງ ແລະຜູ້ປະກອບການທ່ອງທ່ຽວຂອງແຂວງ.

ໃນບົດສະຫຼຸບດຽວກັນເຜີຍໃຫ້ຮູ້ວ່າ: ປັດຈຸບັນທົ່ວແຂວງມີລະບົບໂທລະໂຄ່ງ 289 ແຫ່ງ, ມີສະຖານີວິທະຍຸກະຈາຍສຽງ 2 ແຫ່ງ, ໄດ້ປັບປຸງສ້ອມແປງຫ້ອງອ່ານຂ່າວ, ປະກອບພາຫະນະ,ອຸປະກອນຖ່າຍທໍາໂດຍໄດ້ຮັບທຶນສົ່ງເສີມວິຊາການຈາກແຂວງ ມູນຄ່າ 240 ລ້ານກວ່າກີບ. ຢ່າງໃດກໍຕາມ, ເນື່ອງຈາກການລະບາດຂອງພະຍາດໂຄວິດ-19 ປັດຈຸບັນໜັງສືພິມແຂວງວຽງຈັນ ຈິ່ງໄດ້ໂຈະການຜະລິດຊົ່ວຄາວ.

ໃນປີຜ່ານມາ, ສາມາດສ້າງຄອບຄົວວັດທະນະທໍາໄດ້ 2481 ຄອບຄົວ, ສ້າງບ້ານວັດທະນະທໍາໄດ້ 19 ບ້ານ, ສ້າງກຸ່ມບ້ານວັດທະນະໄດ້ 1 ກຸ່ມ, ກົມກອງແບບຢ່າງວັດທະນະທໍາໄດ້ 2 ກົມກອງ,ປະຈຸບັນທົ່ວແຂວງມີບ້ານວັດທະນະທໍາທັງໝົດ 410 ບ້ານ, ກວມເອົາ 97% ຂອງຈໍານວນບ້ານທັງໝົດ, ໄດ້ສໍາຫຼວດແຫຼ່ງມໍລະດົກທາງທຳມະຊາດ, ສະຖານທີ່ມໍລະດົກທາງດ້ານວັດທະນະທໍາ, ປະຕິວັດສາດວັດຖຸບູຮານ 12 ແຫຼ່ງ, ຄຸ້ມຄອງການເຄື່ອນໄຫວຂອງໜ່ວຍສິນລະປະການສະແດງ, ສົ່ງເສີມໃຫ້ສູນວັດທະນະທໍາ ແລະ ສົ່ງເສີມພອນສະຫວັນຂອງເດັກນ້ອຍຊຶ່ງໄດ້ຈັດກິດຈະກໍາໃນທຸກໆວັນເສົາ ແລະ ວັນອາທິດ; ຍ້ອນເຫັນໄດ້ຄວາມສໍາຄັນຂອງວຽກງານດັ່ງກ່າວ, ການນໍາແຂວງຈິ່ງໄດ້ຈັດຊື້ດົນຕີສາກົນ, ດົນຕີພື້ນເມືອງໃຫ້ ມູນຄ່າ 87 ລ້ານກີບ. ປັດຈຸບັນ, ທຸລະກິດທ່ອງທ່ຽວໃນແຂວງວຽງຈັນ ສາມາດເປີດຄືນໄດ້ປະມານ 80% ແລະ ກຳລັງພັດທະນາໂຄງການທ່ອງທ່ຽວເຂື່ອນນໍ້າງື່ມ1 ເມືອງແກ້ວອຸດົມ ໃນມູນຄ່າ 6.500.000 ໂດລາສະຫະລັດ ແລະ ຢູ່ເມືອງວັງວຽງມູນຄ່າ 15.000.000 ໂດລາ.

ໃນໂອກາດນີ້, ທ່ານເຈົ້າແຂວງວຽງຈັນກໍໄດ້ມອບເຄື່ອງດົນຕີ ແລະ ອຸປະກອນສື່ມວນຊົນໃຫ້ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ. ໃນໂອກາດດຽວກັນ, ກໍໄດ້ມີພິທີມອບ-ຮັບລາງວັນມາດຕະຖານການທ່ອງທ່ຽວອາຊຽນ (ໂຮງແຮມຂຽວອາຊຽນ, ຫ້ອງປະຊຸມອາຊຽນ) ໃຫ້ແກ່ໂຮງແຮມແກຣນວັງວຽງ (ອຳມາລີ ວັງວຽງ) ແລະ ລ່ອງງື່ມວິວ ຣີສອດ , ມອບ-ຮັບໃບຢັ້ງຢືນ ແລະ ກາໝາຍປ້າຍດາວ (ໂຮງແຮມ 4 ດາວ) ໃຫ້ແກ່ໂຮງແຮມແກຣນວັງວຽງ (ອຳມາລີ ວັງວຽງ), ໃຫ້ກຽດມອບໂດຍ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ.

แชร์