ເປີດຈຸດຂາຍປີ້ລົດໄຟລາວ-ຈີນ ທີ່ວຽງຈັນເຊັນເຕີ

ໃນວັນທີ 25 ກຸມພາ 2022, ບໍລິສັດທາງລົດໄຟລາວ-ຈີນ ໄດ້ເພີ່ມປ່ອງບໍລິການຂາຍປີ້ຈຸດທໍາອິດຢ່າງເປັນທາງການທີ່ນະຄອນຫຼວງວຽງຈັນ. ປ່ອງຂາຍປີ້ໃໝ່ນີ້ຕັ້ງຢູ່ສູນການຄ້າວຽງຈັນເຊັນເຕີຊັ້ນໜຶ່ງ (ຖະໜົນຄູວຽງ).

ຈຸດຂາຍປີ້ລົດໄຟທີ່ວຽງຈັນເຊັນເຕີ ແມ່ນໃຫ້ບໍລິການຂາຍປີ້ໂດຍສານໄປວຽງຈັນ-ບໍ່ເຕັນ ແລະວຽງຈັນ-ຫຼວງພຣະບາງ, ຊຶ່ງສາມາດຊື້ປີ້ລ່ວງໜ້າໄດ້ 3 ວັນ ລວມທັງມື້ເດີນທາງ, ຜູ້ໂດຍສານ 1 ຄົນ ສາມາດຊື້ໄດ້ 2 ປີ້. ຢ່າງໃດກໍດີ, ເພື່ອຍົກສູງປະສິດທິພາບ ແລະ ການຊໍາລະທີ່ສະດວກແກ່ຜູ້ໂດຍສານ, ບໍລິສັດທາງລົດໄຟ ໄດ້ກໍານົດການຈ່າຍເງິນຜ່ານທາງບັດທະນາຄານເຊັ່ນ: one Play, Unian play ແລະອື່ນໆ ແຕ່ບໍ່ຮັບເງິນສົດ. ຊຶ່ງຜູ້ໂດຍສານຊຶ້ປີ້ລົດໄຟຖ້ຽວໜຶ່ງ,ຈະເສຍຄ່າທໍານຽມປີ້ລະ 20.000 ກີບ.

ເວລາຂາຍປີ້, ຕອນເຊົ້າ 10.00-12.00 ໂມງ, ຕອນບ່າຍ 12.30-15.30 ໂມງ, ຜູ້ໂດຍ ສານຕ້ອງຖືບັດປະຈໍາຕົວ, ບັດຢັ້ງຢືນການສັກວັຄຊີນຄົບໂດສ. ນອກນັ້ນ, ຈຸດຂາຍປີ້ຍັງມີບ່ອນແຈ້ງຂໍ້ມູນກ່ຽວກັບຖ້ຽວລົດໄຟ,ລາຄາປີ້,ຊຶ່ງບໍ່ມີການຂາຍປີ້ຕ່າງແຂວງ ແລະປີ້ເດັກນ້ອຍ,ທັງບໍ່ຮັບສົ່ງປີ້ຄືນ (ຖ້າຢາກສົ່ງຄືນໃຫ້ໄປສະຖານີນະຄອນຫຼວງ).

ໂດຍທ່ານ ຢວນໝິ່ງຫາວ ອໍານວຍການໃຫຍ່ທາງລົດໄຟລາວ-ຈີນ, ໄດ້ກ່າວວ່າ: ເພື່ອອໍານວຍຄວາມສະດວກດ້ານການເດີນທາງໃຫ້ແກ່ປະຊາຊົນ, ຊຶ່ງໃນອະນາຄົດຍັງຈະມີແຜນການປັບປຸງລະບົບບໍລິການຂາຍປີ້ໂດຍສານແບບອອນໄລນ໌ ແລະ ເພີ່ມປ່ອງຂາຍປີ້ໃຫ້ຫຼາຍຂຶ້ນ.

ຂະນະທີ່ ຕ່າຍ ອາກາດ, ກໍໄດ້ກ່າວໃນຂະນະລໍຖ້າຊື້ປີ້ລົດໄຟຢູ່ປ່ອງຂາຍປີ້ວຽງຈັນເຊັນເຕີວ່າ: ຕົນຈະເດີນທາງໄປຫຼວງພຣະບາງ ເພື່ອຈັດຄອນເສີຣ໌ຕ (Concert) ຢູ່ທີ່ນັ້ນໃນທ້າຍອາທິດນີ້, ຊຶ່ງການເປີດຂາຍປີ້ຢູ່ທີ່ນີ້ ຖືວ່າສະດວກສະບາຍຫຼາຍ, ເພາະຢູ່ໃກ້ຕົວເມືອງ ແລະ ບໍ່ເສຍເວລາໄປຊື້ປີ້ຢູ່ສະຖານີ, ອີກຢ່າງກໍຍັງສາມາດຮັບເງິນຜ່ານການສະແກນຄິວອາຣ໌ໂຄດ, ທີ່ຖືວ່າທັນສະໄໝຂຶ້ນ ແລະເປັນການຫຼຸດຜ່ອນຄວາມສ່ຽງຕິດເຊື້ອຈາກການຈ່າຍ-ທອນເງິນ.

ຂອບໃຈຂໍ້ມູນຈາກ: CRI ປະຈຳລາວ

แชร์