ເຜີຍ 4 ເປົ້າໝາຍໃຫຍ່ໃນໂຄງການຮັກສາສຸຂະພາບຂັ້ນຕົ້ນ ແລະສົ່ງເສີມສຸຂະພາບແບບເຊື່ອມສານ

ກອງປະຊຸມໂຄງການຮັກສາສຸຂະພາບຂັ້ນຕົ້ນ ແລະ ການສົ່ງເສີມສຸຂະພາບແບບເຊື່ອມສານ (IPCHP) ຊຶ່ງຈັດຂຶ້ນເມື່ອວັນທີ 23 ກຸມພາ 2022, ທີ່ຫ້ອງປະຊຸມສະຫະພັນແມ່ຍິງແຂວງຫຼວງພຣະບາງ ໄດ້ຄົ້ນຄວ້າ ແລະ ຮັບເອົາແຜນການປີ 2022, ສະຫຼຸບການຈັດຕັ້ງປະຕິບັດການເຄື່ອນໄຫວກິດຈະກໍາໃນ 2 ເດືອນຜ່ານມາ ແລະ ຮັບຮອງເອົາແຜນໄຕຣມາດ 2 ປະຈໍາເດືອນເມສາ-ມິຖຸນາ ປີ 2022 ແລະ ເລັ່ງໃສ່ 4 ເປົ້າໝາຍໃຫຍ່ ເພື່ອເຮັດໃຫ້ວຽກງານຮັກສາສຸຂະພາບຂອງປະຊາຊົນມີປະສິດທິຜົນຍິ່ງຂຶ້ນ.

ເປັນປະທານກອງປະຊຸມຄັ້ງນີ້ໂດຍ ທ່ານ ພູທອນ ເມືອງປາກ ປະທານອົງການກາແດງລາວ, ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພຣະບາງ, ທ່ານ ຊັງມາກ ໂຕເມ ຫົວໜ້າອົງການກາແດງສະວິຕປະຈໍາລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ສຳລັບ 4 ເປົ້າໝາຍໃຫຍ່ທີ່ໂຄງການຮັກສາສຸຂະພາບຂັ້ນຕົ້ນ ແລະ ການສົ່ງເສີມສຸຂະພາບແບບເຊື່ອມສານ ຈະເລັ່ງໃສ່ຈັດຕັ້ງປະຕິບັດປະກອບມີ: 1) ການເຂົ້າເຖິງການບໍລິການສຸຂະພາບ ແລະ ການບໍລິການດ້ານສຸຂະພິບານ, ການຈັດຫານໍ້າສະອາດ ໄດ້ຮັບການປັບປຸງດີຂຶ້ນ. 2) ປັບປຸງຄຸນນະພາບຂອງການບໍລິການສາທາລະນະສຸກ ແລະ ສຸຂະອະນາໄມ ແລະ ການຈັດຫານໍ້າສະອາດຢູ່ໃນໂຮງຮຽນ, ຢູ່ຂັ້ນບ້ານເພີ່ມຂຶ້ນ. 3) ພຶດຕິກໍາທີ່ດີຕໍ່ສຸຂະພາບ ແລະ ຄວາມປອດໄພໄດ້ຖືກປະຕິບັດໂດຍຊາວໜຸ່ມ-ເຍົາວະຊົນ ແລະ ປະຊາຊົນ ກຸ່ມເປົ້າໝາຍ ແລະ 4) ຂີດຄວາມສາມາດຂອງຄູ່ຮ່ວມງານໃນການຈັດຕັ້ງປະຕິບັດຫຼັກໃນການເຊື່ອມສານ RMNCAH&N ແລະ ການບໍລິການສົ່ງເສີມສຸຂະພາບເພີ່ມຂຶ້ນ.

ຂອບໃຈຂໍ້ມູນຈາກ: ຂ່າວສານຫຼວງພຣະບາງ

แชร์