ລັດຖະມົນຕີອອສເຕຣເລຍ ຢ້ຽມຢາມ ສປປ ລາວ

ໂດຍຕອບສະໜອງຕາມຄຳເຊີນຂອງ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ດັ່ງນັ້ນ ທ່ານ ນາງ ມາຣີສ ເພນ (Marise Payne) ລັດຖະມົນຕີກະຊວງການຕ່າງປະເທດ ແລະລັດຖະມົນຕີຮັບຜິດຊອບວຽກງານແມ່ຍິງ ແຫ່ງ ອອສເຕຣເລຍ,ພ້ອມດ້ວຍຄະນະຈິ່ງໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນລະຫວ່າງວັນທີ 24-25 ກຸມພາ 2022, ເພື່ອສືບຕໍ່ສົ່ງເສີມສາຍພົວພັນມິດຕະພາບ ແລະການຮ່ວມມືດີງາມ, ທັງເປັນການສະເຫຼີມສະຫຼອງວັນແຫ່ງການສ້າງຕັ້ງສາຍພົວພັນການທູດອັນຍາວນານ ແລະ ຕໍ່ເນື່ອງລະຫວ່າງສອງປະເທດ ຄົບຮອບ 70 ປີ.

ທັງນີ້, ທ່ານ ນາງ ມາຣີສ ເພນ ໄດ້ພົບປະສອງຝ່າຍກັບ ທ່ານ ສະເຫຼີມໄຊ ກົມມະສິດ, ໂດຍທັງສອງຝ່າຍໄດ້ຕີລາຄາສູງຕໍ່ສາຍພົວພັນດີງາມ ແລະ ຕໍ່ເນື່ອງຂອງສອງຊາດຕະຫຼອດ 70 ປີ ທີ່ຜ່ານມາ. ພ້ອມນີ້, ກໍໄດ້ມີການແລກປ່ຽນ ແລະ ປຶກສາຫາລືກ່ຽວກັບການຮ່ວມມືສອງຝ່າຍທີ່ຜ່ານມາ ແລະ ທິດທາງແຜນການຮ່ວມມືໃນຕໍ່ໜ້າ; ເປັນຕົ້ນແມ່ນ ການຊ່ວຍເຫຼືອຂອງອອສເຕຣເລຍ ແກ່ ສປປ ລາວ ໃນການຮັບມື ແລະ ແກ້ໄຂສະພາບລະບາດຂອງພະຍາດໂຄວິດ 19, ການຊ່ວຍສ້າງຊັບພະຍາ ກອນມະນຸດ, ປ້ອງກັນຊາດ, ການຄ້າ ແລະ ການລົງທຶນ, ພື້ນຖານໂຄງລ່າງ, ກະສິກໍາ ແລະ ບັນຫາລະເບີດທີ່ຍັງບໍ່ທັນແຕກ (UXO). ພ້ອມນັ້ນ, ທັງສອງຝ່າຍຍັງໄດ້ໃຫ້ຄໍາໝັ້ນສັນຍາທີ່ຈະເຮັດວຽກຮ່ວມກັນ ໃນກອບການຮ່ວມມືອາຊຽນ ໃນໂອກາດ ທີ່ ສປປ ລາວ ເປັນປະເທດປະສານງານການພົວ ພັນ ອາຊຽນ-ອອສເຕຣເລຍ (2021- 2024) ຊຶ່ງອອສເຕຣເລຍ ກໍໃຫ້ຄຳໝັ້ນສັນຍາວ່າຈະສະໜັບສະໜູນແກ່ການກະກຽມຄວາມພ້ອມຂອງ ສປປ ລາວ ໃນການເປັນປະທານອາຊຽນ ປີ 2024. ໃນວາລະດຽວກັນ, ຍັງໄດ້ປຶກສາຫາລືກ່ຽວກັບບັນຫາພາກພື້ນ ແລະສາກົນທີ່ທັງສອງຝ່າຍມີຄວາມສົນໃຈຮ່ວມກັນ.

ໃນໂອກາດການຢ້ຽມຢາມ ສປປ ລາວ ຢ່າງເປັນທາງການໃນຄັ້ງນີ້, ທ່ານ ນາງ ມາຣີສ ເພນ ກໍໄດ້ມີໂອກາດເຂົ້າຢ້ຽມຂໍ່ານັບ ທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ, ທີ່ສໍານັກງານນາຍົກລັດຖະມົນຕີ ໃນວັນທີ 24 ກຸມພາ 2022, ຊຶ່ງທ່ານໄດ້ຢໍ້າຄືນທີ່ຈະສືບຕໍ່ໃຫ້ການຊ່ວຍເຫຼືອ ສປປ ລາວ ໃນບັນດາໂຄງການຮ່ວມມືສອງຝ່າຍທີ່ຈັດຕັ້ງປະຕິບັດໃນຜ່ານມາ, ຂະນະທີ່ທ່ານນາຍົກລັດຖະມົນຕີ ແຫ່ງ ສປປ ລາວ, ກໍໄດ້ຕີລາຄາສູງຕໍ່ການຢ້ຽມຢາມ ສປປ ລາວ ຢ່າງເປັນທາງການໃນຄັ້ງນີ້, ຊຶ່ງຖືເປັນນິມິດໝາຍອັນດີໃນການສົ່ງເສີມຄວາມຮ່ວມມືຂອງສອງປະເທດໃນອະນາຄົດ ແລະ ໄດ້ສະເໜີຝ່າຍອອສເຕຣເລຍ ໃຫ້ຄວາມຊ່ວຍເຫຼືອ ສປປ ລາວ ໃນການຈັດຕັ້ງແຜນພັດທະນາເສດຖະກິດແຫ່ງຊາດ 5 ປີ ຄັ້ງທີ 9 (2021-2025), ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ, ລວມທັງການສະເໜີໃຫ້ຝ່າຍອອສເຕຣເລຍ ພິຈາລະນານຳເຂົ້າແຮງງານຈາກ ສປປ ລາວ.

ໃນວັນທີ 25 ກຸມພາ 2022, ທ່ານ ນາງ ມາຣີສ ເພນ ໄດ້ກ່າວປາຖະກະຖາໃນຫົວຂໍ້: ສະເຫຼີມສະຫຼອງ 70 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ອອສເຕຣເລຍ,ທີ່ສູນການຮ່ວມມື ແລະ ການຝຶກອົບຮົມສາກົນ (ICTC) ເຂົ້າຮ່ວມໂດຍ ທ່ານ ໂພໄຊ ໄຂຄໍາພິທູນຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ທ່ານ Paul Kelly, ເອກອັກຄະລັດຖະທູດອອສເຕຣເລຍ ປະຈໍາ ສປປ ລາວ, ມີບັນດາຜູ້ຕາງໜ້າຈາກກະຊວງການຕ່າງປະເທດ, ຄະນະພົວ ພັນຕ່າງປະເທດສູນກາງພັກ, ຄະນະໂຄສະນາອົບຮົມສູນກາງພັກ ແລະ ສະຖາບັນການເມືອງ ແລະ ການປົກຄອງແຫ່ງຊາດ. ຊຶ່ງທ່ານ ນາງ ມາຣີສ ເພນ ກໍໄດ້ຢໍ້າຄືນທີ່ຈະສືບຕໍ່ໃຫ້ການຊ່ວຍເຫຼືອບັນດາໂຄງການຕ່າງໆທີ່ກໍາລັງຈັດຕັ້ງປະຕິບັດຢູ່ ສປປ ລາວ ຂອງອອສເຕຣເລຍ, ເປັນຕົ້ນແມ່ນ ໂຄງການຄຸນນະພາບ ແລະ ເຂົ້າເຖິງການສຶກສາ ຢູ່ ສປປ ລາວ ໂຄງການທີ 2 (Basic Education Quality and Access in Lao PDR), ສູນລາວ-ອອສເຕຣເລຍ ເພື່ອສະໜັບສະໜູນການພັດທະນາເສດຖະກິດ ແລະ ສັງຄົມ, ໂຄງການຄູ່ຮ່ວມມືແມ່ນໍ້າຂອງ-ອອສເຕຣເລຍ (Mekong-Australia Partnership), ຄະນະກໍາມະການແມ່ນໍ້າຂອງ (MRC) ແລະ ໂຄງການຄູ່ຮ່ວມມືດ້ານພື້ນຖານໂຄງລ່າງ (Partnership for Infrastructure program). ໃນວັນດຽວກັນນີ້, ທ່ານຍັງໄດ້ພົບປະກັບ ທ່ານ ທອງສະຫວັນ ພົມວິຫານ ຫົວໜ້າຄະນະພົວພັນຕ່າງປະເທດສູນກາງພັກ, ເພື່ອປຶກສາຫາລືກ່ຽວກັບທິດທາງການຮ່ວມມືໃນຕໍ່ໜ້າ.

ໃນທ່າມກາງບັນຍາກາດທີ່ທັງສອງປະເທດຮ່ວມກັນສະເຫຼີມສະຫຼອງ 70 ປີ ແຫ່ງການສ້າງຕັ້ງສາຍພົວພັນການທູດຄົບຮອບໃນຄັ້ງນີ້, ທັງສອງຝ່າຍໄດ້ເຫັນດີດ້ານຫຼັກການທີ່ຈະຍົກລະດັບສາຍພົວພັນຂອງສອງປະເທດອັນຍາວນານ ແລະຕໍ່ເນື່ອງຕະຫຼອດ 7 ທົດສະວັດທີ່ຜ່ານເປັນການພົວພັນຮ່ວມມືແບບຮອບດ້ານ (Comprehensive Partnership).

ຂອບໃຈຂໍ້ມູນຈາກ: ກົມການຂ່າວ ກະຊວງການຕ່າງປະເທດ

แชร์