ມອບ-ຮັບໜ້າທີ່ ຄະນະບໍລິຫານງານສະມາຄົມມິດຕະພາບລາວກັບຕ່າງປະເທດ

ພິທີມອບ-ຮັບໜ້າທີ່ ຄະນະບໍລິຫານງານສະມາຄົມມິດຕະພາບຂອງລາວກັບຕ່າງປະເທດ ລະຫວ່າງ ຊຸດເກົ່າ ແລະ ຊຸດໃໝ່, ໄດ້ຈັດຂຶ້ນໃນວັນທີ 24 ກຸມພາ 2022 ທີ່ສູນຮ່ວມມືສາກົນ ແລະ ຝຶກອົບຮົມ (ICTC) ນະຄອນຫຼວງວຽງຈັນ. ໂດຍການເປັນປະທານຂອງ ສະຫາຍ ທອງສະຫວັນ ພົມວິຫານ ກຳມະການສູນກາງພັກ, ເລຂາຄະນະພັກ ຫົວໜ້າຄະນະພົວພັນຕ່າງປະເທດສູນກາງພັກ, ມີບັນດາສະຫາຍປະທານ ແລະ ຄະນະບໍລິຫານງານສະມາຄົມມິດຕະພາບຂອງລາວກັບຕ່າງປະເທດ ຊຸດເກົ່າ ແລະ ຊຸດໃໝ່, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໃນພິທີ, ສະຫາຍ ດວງຕາ ຈູມພາວັນ ຫົວໜ້າກົມຄຸ້ມຄອງ-ພະນັກງານ ຕາງໜ້າຄະນະຈັດຕັ້ງສູນກາງພັກ, ໄດ້ຜ່ານມະຕິຕົກລົງຂອງ ຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງຄະນະບໍລິຫານງານສະມາຄົມມິດຕະພາບລາວກັບຕ່າງປະເທດ ຈຳນວນ 17 ສະມາຄົມຄື: ສະມາຄົມມິດຕະພາບ ລາວ-ຫວຽດນາມ, ລາວ-ສປປ ເກົາຫຼີ, ລາວ-ຄິວບາ, ລາວ-ຣັສເຊຍ, ລາວ-ຍີ່ປຸ່ນ, ລາວ-ສ.ເກົາຫຼີ, ລາວ-ໄທ ເພື່ອມິດຕະພາບ, ລາວ-ກຳປູເຈຍ, ລາວ-ເຢຍຣະມັນ, ລາວ-ຮັງກາຣີ, ລາວ-ອິນເດຍ, ລາວ-ສີລັງກາ, ລາວ-ມົງໂກເລຍ, ລາວ-ມຽນມາ, ລາວ-ອິນໂດນີເຊຍ, ລາວ-ອັງກິດ ແລະ ລາວ-ອາເຊີຣ໌ໄບຈານ.

ໃນວາລະດຽວກັນ, ກໍໄດ້ມີພິທີເຊັນບົດບັນທຶກມອບ-ຮັບໜ້າທີ່ລະຫວ່າງ ປະທານສະມາຄົມມິດຕະພາບຂອງລາວກັບຕ່າງປະເທດ ຜູ້ເກົ່າ ແລະ ຜູ້ໃໝ່ ໂດຍການເປັນສັກຂີພິຍານ ຂອງ ສະຫາຍ ທອງສະຫວັນ ພົມວິຫານ ແລະ ພາກສ່ວນກ່ຽວຂ້ອງ.

ທັງນີ້, ຫົວໜ້າຄະນະພົວພັນຕ່າງປະເທດສູນກາງພັກ ກໍໄດ້ໂອ້ລົມຕໍ່ພິທີ, ໂດຍສະແດງຄວາມຊົມເຊີຍຜົນງານຂອງສະຫາຍປະທານ ແລະ ຄະນະບໍລິຫານງານສະມາຄົມມິດຕະພາບຊຸດເກົ່າ ທີ່ໄດ້ສຸມສະຕິປັນຍາ, ເຫື່ອແຮງ ນຳພາ-ຊີ້ນຳການເຄື່ອນໄຫວວຽກງານການທູດປະຊາຊົນ ໃຫ້ມີຜົນສຳເລັດຫຼາຍດ້ານ, ໂດຍສະເພາະການເຄື່ອນໄຫວສ້າງກິດຈະກໍາຕ່າງໆເພື່ອສົ່ງເສີມສາຍພົວພັນມິດຕະພາບ ແລະ ການຮ່ວມມືທາງການເມືອງ, ການຕ່າງປະເທດ, ການສຶກສາ-ກີລາ, ສາທາລະນະສຸກ, ວັດທະນະທຳ-ສັງຄົມ, ການທ່ອງທ່ຽວ, ເສດຖະກິດ-ການຄ້າ, ການລົງທຶນ, ວິທະຍາສາດ-ເທຄນິຄ, ດ້ານມະນຸດສະທຳ, ດ້ານການກຸສົນ ແລະ ໄດ້ຍາດແຍ່ງເອົາການຊ່ວຍເຫຼືອຈາກຕ່າງປະເທດເປັນຈຳນວນຫຼວງຫຼາຍມາຊ່ວຍ ສປປ ລາວ. ພ້ອມນັ້ນ, ກໍໄດ້ມີຄຳເຫັນຊີ້ນຳໃຫ້ປະທານ ແລະ ຄະນະບໍລິຫານງານສະມາຄົມມິດຕະພາບຂອງລາວກັບຕ່າງປະເທດຊຸດໃໝ່ ສືບຕໍ່ປະຕິບັດໜັາທີ່ສໍາຄັນ ແລະ ມີກຽດນີ້, ເພື່ອນໍາພາການເຄື່ອນໄຫວວຽກງານການທູດປະຊາຊົນຢ່າງຫ້າວຫັນ ຕາມພາລະບົດບາດ, ຂອບເຂດສິດ ແລະ ໜ້າທີ່ ທີ່ພັກ-ລັດ ມອບໝາຍໃຫ້. ເພື່ອປະກອບສ່ວນປົກປັກຮັກສາ ແລະ ເສີມຂະ ຫຍາຍສາຍພົວພັນມິດຕະພາບອັນດີງາມ ແລະ ການຮ່ວມມືລະຫວ່າງປະຊາຊົນລາວກັບຕ່າງປະເທດໃຫ້ນັບມື້ແໜ້ນແຟ້ນ ແລະ ຈະເລີນງອກງາມ, ເພື່ອພ້ອມກັນສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ.

แชร์