ລັດຖະມົນຕີ ຫົວໜ້າ ຫສນຍ ພົບປະພະນັກງານກົມຄົ້ນຄວ້າ-ສັງລວມ ແລະກົມເລຂາ

ໃນວັນທີ 23 ກຸມພາ 2022,ທ່ານ ອາລຸນໄຊ ສູນນະລາດ ລັດຖະມົນຕີ ຫົວໜ້າຫ້ອງວ່າການສຳນັກງານນາຍົກລັດຖະມົນຕີ (ຫສນຍ), ໄດ້ພົບປະໂອ້ລົມພະນັກງານກົມຄົ້ນຄວ້າ-ສັງລວມ ແລະກົມເລຂາ ຂອງ ຫສນຍ. ທັງນີ້, ກໍໄດ້ຮັບຟັງລາຍງານກ່ຽວກັບສະພາບການຈັດຕັ້ງປະຕິບັດວຽກງານພົ້ນເດັ່ນ, ຂໍ້ສະດວກ, ຂໍ້ຄົງຄ້າງ ແລະ ການສະເໜີຂອງທັງສອງກົມ,ພ້ອມປຶກສາຫາລືແລກປ່ຽນບົດຮຽນໃນການປັບປຸງ,ສ້າງວິໄສທັດ ແລະພ້ອມກັນສ້າງການຫັນປ່ຽນທີ່ຕັ້ງໜ້າດ້ວຍການຍົກສູງປະສິດທິພາບ ແລະ ປະສິດທິຜົນໃນການປະຕິບັດໜ້າທີ່ການເມືອງ, ກໍຄືການປະຕິບັດພາລະບົດບາດໃນການເປັນເສນາທິການຮັບໃຊ້ທ່ານນາຍົກລັດຖະມົນຕີ ແລະ ຄະນະລັດຖະບານໃຫ້ໄດ້ຮັບຜົນດີ.

ໂອກາດນີ້, ຫົວໜ້າກົມຄົ້ນຄວ້າ-ສັງລວມ ແລະ ຮັກສາການຫົວໜ້າກົມເລຂາ, ກໍໄດ້ລາຍງານກ່ຽວກັບສະພາບການຈັດຕັ້ງປະຕິບັດວຽກງານຮອບດ້ານພາຍໃນກົມ. ພ້ອມນີ້, ລັດຖະມົນຕີ ຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ກໍເປີດໂອກາດໃຫ້ພະນັກງານທີ່ເຂົ້າຮ່ວມໄດ້ປະກອບຄຳຄິດຄຳເຫັນແລກປ່ຽນເຊິ່ງກັນແລະກັນເພີ່ມຕື່ມ. ຢ່າງໃດກໍດີ, ເພື່ອເສີມຂະຫຍາຍມູນເຊື້ອອັນດີງາມ, ຜົນງານ ແລະບົດຮຽນທີ່ຖອດຖອນໄດ້ໃນໄລຍະຜ່ານມາໃຫ້ມີຜົນສຳເລັດໃໝ່ຍິ່ງໃຫຍ່ກວ່າເກົ່າ;ທ່ານ ອາລຸນໄຊ ສູນນະລາດ ໄດ້ຮຽກຮ້ອງໃຫ້ພະນັກງານທົ່ວກົມຄົ້ນຄວ້າ-ສັງລວມ ແລະ ກົມເລຂາ ຕ້ອງພ້ອມກັນບຸກທະລຸສ້າງບາດກ້າວຫັນປ່ຽນໃໝ່, ໂດຍເນັ້ນໜັກໃຫ້ເພີ່ມຄວາມເປັນເຈົ້າການຂອງຕົນ ເພື່ອສ້າງການຫັນປ່ຽນໃໝ່ທີ່ແຂງແຮງ, ປັບປຸງສະພາບແວດລ້ອມພາຍໃນອົງການໃຫ້ມີບັນຍາກາດທີ່ດີຢ່າງຕໍ່ເນື່ອງ; ຄົ້ນຄວ້າປັບປຸງກົງຈັກການຈັດຕັ້ງ ແລະ ໂຄງປະກອບບຸກຄະລາກອນ ໃຫ້ແທດກັບຕຳແໜ່ງງານ ແລະ ຄວາມຮູ້ຄວາມສາມາດ, ໄປຄຽງຄູ່ກັບການກໍ່ສ້າງພະນັກງານກັບທີ່, ຊອກໃຫ້ເຫັນໄດ້ວຽກດີ-ຄົນເກັ່ງ,ວຽກຈິງ-ຄົນແທ້. ການສ້າງຄວາມເປັນແບບຢ່າງນຳໜ້າ ແລະບຸກທະລຸການຫັນປ່ຽນໃໝ່; ພະນັກງານທຸກຄົນຕ້ອງເຂັ້ມງວດໃນການປະຕິບັດລະບຽບວິໄນຂອງຫ້ອງວ່າການສຳນັກງານນາຍົກລັດຖະມົນຕີ; ສືບຕໍ່ຮັດແໜ້ນຄວາມສາມັກຄີພາຍໃນໃຫ້ເປັນປຶກແຜ່ນແໜ້ນໜາ, ຈິງໃຈຕຳນິ, ຊ່ວຍເຫຼືອເຊິ່ງກັນ ແລະ ກັນ ດ້ວຍການສ້າງຄວາມເປັນເອກະພາບ ເປັນຕົ້ນແມ່ນຄວາມເປັນເອກະພາບທາງດ້ານແຜນການ, ການວາງໂຄງປະກອບການຈັດຕັ້ງ ແລະ ບຸກຄະລາກອນ; ຄວາມເປັນເອກະພາບໃນການແກ້ໄຂບັນຫາທີ່ລະອຽດອ່ອນ; ເມື່ອມີຄວາມເປັນເອກະພາບກັນແລ້ວກໍຕ້ອງມີຄວາມຮັບຜິດຊອບຕໍ່ຜົນໄດ້, ຜົນເສຍໃນການປະຕິບັດໜ້າທີ່ການເມືອງຂອງຕົນ.

ທັງນີ້,ກໍເພື່ອສ້າງບາດລ້ຽວໃໝ່ໃຫ້ມີການຫັນປ່ຽນຢ່າງແຂງແຮງ, ເລິກເຊິ່ງ, ຮອບດ້ານບົນຈິດໃຈຮັບປະກັນໃຫ້ຫ້ອງວ່າການສຳນັກງານນາຍົກລັດຖະມົນຕີເຮັດສຳເລັດໜ້າທີ່ຕາມຄຳຂວັນ 3 ດີ (ເສນາທິການທີ່ດີ, ປະສານງານທີ່ດີ ແລະບໍລິການຮັບໃຊ້ທີ່ດີ) ທັງເປັນອົງການທີ່ມີຄວາມທັນສະໄໝ, ວ່ອງໄວ, ທັນການສົມກັບເປັນໃຈກາງການປະສານງານ, ເປັນຜູ້ບໍລິການຮັບໃຊ້ຂັ້ນເທິງ ແລະປະຊາຊົນຢ່າງແທ້ຈິງ.

แชร์