ປກສ ໄກສອນ ພົມວິຫານ ເຜີຍປະຕິບັດການມ້າງຄະດີຢາເສບຕິດ

ນີ້ເປັນອີກໜຶ່ງຮູບປະທຳຂອງການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ໂດຍເຈົ້າໜ້າທີ່ຕໍາຫຼວດໜ່ວຍງານສະກັດກັ້ນ-ຕ້ານຢາເສບຕິດ ປກສ ນະຄອນໄກສອນ ພົມວິຫານ ແຂວງສະຫວັນນະເຂດ, ໄດ້ທັບມ້າງກຸ່ມແກ້ງເຄື່ອນໄຫວຜິດກົດໝາຍເມື່ອລະຫວ່າງວັນທີ 11-16 ກຸມພາ 2022 ຊຶ່ງສາມາດຈັບຕົວເປົ້າໝາຍພ້ອມຂອງກາງຈຳນວນຫຼາຍ.

ລາຍງານຂ່າວຂອງກຳລັງປ້ອງກັນຄວາມສະຫງົບໃນວັນທີ 23 ກຸມພາ ໃຫ້ຮູ້ວ່າ: ເມື່ອວັນທີ 11 ກຸມພາ 2022 ຕໍາຫຼວດໄດ້ເຂົ້າກັກຕົວເປົ້າໝາຍຄ້າ-ຂາຍຢາເສບຕິດ 2 ຄົນ, ຊື່ທ້າວ ບຸນທະວີ ຫຼື (ແອນ້ອຍ) ອາຍຸ 19 ປີ ຫວ່າງງານຢູ່ບ້ານໂພນສະຫວ່າງເໜືອ ນະຄອນໄກສອນ ພົມວິຫານ, ພ້ອມຂອງກາງຢາບ້າ 88 ເມັດ, ໂທລະສັບ 1 ໜ່ວຍ ແລະ ລົດຈັກເວັບໄອ ສີຟ້າດຳ ປ້າຍທະບຽນສະຫວັນນະເຂດ ຍດ 4737, ທ້າວ ແອັດດີ້ ອາຍຸ 32 ປີ ຫວ່າງງານ ຢູ່ບ້ານໂພນສະຫວ່າງເໜືອ ນະຄອນໄກສອນ ພົມວິຫານ ພ້ອມຂອງກາງຢາບ້າ 8 ຖົງ ເທົ່າກັບ 1.600 ເມັດ, ໂທລະສັບ 1 ໜ່ວຍ, ຈຸດກັກຕົວພວກກ່ຽວແມ່ນຢູ່ເສັ້ນທາງເຂດບ້ານໂນນສະຫວາດ ນະຄອນໄກສອນ ພົມວິຫານ.

ລາຍງານຂ່າວດຽວກັນໃຫ້ຮູ້ຕື່ມວ່າ: ເມື່ອວັນທີ 16 ກຸມພາ 2022, ເຈົ້າໜ້າທີ່ກໍໄດ້ກັກຕົວເປົ້າໝາຍຄ້າ-ຂາຍຢາບ້າ ໄດ້ເພີ່ມອີກ 4 ຄົນຄື: ທ້າວ ຢູລາ (ນ້ອຍ) ອາຍຸ 23 ປີ ກຳມະກອນ ຢູ່ບ້ານ ສີບຸນເຮືອງ ເມືອງຈຳພອນ, ພັກເຊົາຢູ່ບ້ານໂພນສະຫວ່າງເໜືອ ນະຄອນໄກສອນ ພົມວິຫານ, ຈຸດກັກຕົວຢູ່ຂອບເຂດປ່າຊ້າຫຼວງ ບ້ານໂນນສະຫວາດ ພ້ອມຂອງກາງຢາບ້າ 100 ເມັດ. ຜ່ານການສອບສວນຜູ້ກ່ຽວຮັບສາລະພາບວ່າ: ຢາບ້າຈຳນວນດັງກ່າວຊື້ມາຈາກທ້າວ ວັນມະນີ ຫຼື (ໂກ້) ອາຍຸ 45 ປີ ກຳມະກອນ ຢູ່ບ້ານໜອງຜື ນະຄອນໄກສອນ ພົມວິຫານ.

ມາຮອດເວລາ 15:20 ໂມງຂອງວັນດຽວກັນ, ກໍໄດ້ເຂົ້າກັກຕົວທ້າວ ວັນມະນີ ຫຼື (ໂກ້) ໄດ້ຢູ່ເຮືອນຂອງຜູ້ກ່ຽວ ພ້ອມຂອງກາງຢາບ້າ 31 ເມັດ, ໂທລະສັບ 1 ໜ່ວຍ, ລົດຈັກ 1 ຄັນ. ຜ່ານການສອບສວນຜູ້ກ່ຽວໄດ້ຮັບສາລະພາບວ່າ: ຢາບ້າທີ່ມາຂາຍແມ່ນຊື້ມາຈາກທ້າວ ສຸລິຍາ ຫຼື (ຕຸກ) ອາຍຸ 32 ປີ ກຳມະກອນ, ບ້ານຫົວເມືອງເໜືອ ນະຄອນໄກສອນ ພົມວິຫານ, ແຕ່ມາພັກເຊົາຢູ່ບ້ານອຸດົມວິໄລ ນະຄອນໄກສອນ ພົມວິຫານ.

ຮອດເວລາ 15:40 ໂມງຂອງວັນດຽວກັນ, ຈິ່ງເຂົ້າກັກຕົວທ້າວ ສຸລິຍາ ຫຼື (ຕຸກ) ໄດ້ຢູ່ຫ້ອງເຊົ່າຢູ່ບ້ານອຸດົມວິໄລ, ພ້ອມຂອງກາງຢາບ້າ 2 ຖົງ ເທົ່າກັບ 394 ເມັດ, ຢາໄອສ 14 ຖົງນ້ອຍ,ໂທລະສັບ 2 ໜ່ວຍ ແລະ ໃນເວລາ 18:00 ໂມງຂອງວັນດຽວກັນ, ທາງເຈົ້າໜ້າທີ່ກໍໄດ້ກັກຕົວທ້າວ ກິດຕ້າ ອາຍຸ 22 ປີ ຫວ່າງານ ບ້ານໂພນສະຫວ່າງໃຕ້ ນະຄອນໄກສອນ ພົມວິຫານ, ຢູ່ເຮືອນຂອງຜູ້ກ່ຽວ ພ້ອມຂອງກາງຢາບ້າ 11 ຖົງ ເທົ່າກັບ 2.097 ເມັດ, ໂທລະສັບ 1 ໜ່ວຍ.

ໂດຍເຈົ້າໜ້າທີ່ ໄດ້ນຳຕົວພວກຜູ້ກ່ຽວພ້ອມຂອງກາງຢາບ້າ ເຂົ້າໄປສົ່ງໃຫ້ ປກສ ນະຄອນໄກສອນ ພົມວິຫານ ເພື່ອທຳການສືບສວນ-ສອບສວນ ຕາມລະບຽບກົດໜາຍ.

แชร์