ເຊີນທ່ຽວງານ​​ຜະລິດຕະພັນລາວ

ຂໍເຊີນມວນຊົນເຂົ້າທ່ຽວຊົມງານຜະລິດຕະພັນລາວ “Made in Lao 2022” ຊຶ່ງຈັດຂຶ້ນໃນລະຫວ່າງວັນທີ 19-28 ກຸມພາ 2022 ນີ້ ທີ່ສູນການຄ້າລາວ-ໄອເຕັກ (ຕຶກເກົ່າ), ນະຄອນ​ຫຼວງວຽງຈັນ, ​ພາຍໃຕ້ຄຳຂວັນ “ລາວທ່ຽວລາວຊົມໃຊ້ຜະລິດຕະພັນລາວໃນວິຖີຊີວິດໃໝ່”.​

ພິທີເປີດງານຢ່າງ​ເປັນ​ທາງ​ການ​ໄດ້​ຈັດ​ຂຶ້ນເມື່ອວັນທີ 23 ກຸມພາ 2022​ ທີ່ສູນການຄ້າລາວ-ໄອເຕັກຕຶກເກົ່າ, ​ໃຫ້​ກຽດເຂົ້າຮ່ວມໂດຍ​ທ່ານ ພັນຄໍາ ວິພາວັນ ນາຍົກລັດຖະມົນຕີ, ທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະການຄ້າ, ທ່ານ ອຸເດດ ສຸວັນນະວົງ ປະທານສະພາການຄ້າ ແລະອຸດສາຫະກຳແຫ່ງຊາດລາວ​ (ສຄອຊ)​, ພ້ອມດ້ວຍພາກສ່ວນທີ່ກ່ຽວຂ້ອງ.

ທ່ານ ນາງ ຈັນທະຈອນ ວົງໄຊ ຮອງປະທານ ສຄອຊ ໄດ້ກ່າວວ່າ: ເຖິງແມ່ນວ່າຈະພົບກັບການລະບາດພະຍາດໂຄວິດ-19,​ ແຕ່ຈາກການຮ່ວມແຮງຮ່ວມໃຈຂອງພາກທຸລະກິດກໍສາມາດຈັດງານນີ້ຂຶ້ນໄດ້. ຊຶ່ງຜະລິດຕະພັນຕົ້ນຕໍທີ່ນໍາມາວາງສະແດງໃນຄັ້ງນີ້ລວມມີຫັດຖະກຳແຜ່ນແພ, ເຄື່ອງປະດັບ, ໄມ້ແກະສະຫຼັກ, ເຟີນີເຈີຣ໌, ກະສິກຳ, ອຸດສາຫະກຳທົ່ວໄປ, ອຸດສາຫະກໍາປຸງແຕ່ງ, ເຄື່ອງດື່ມ ແລະ ອາຫານ, ຮູບພາບ ສິລະປະວັດທະນາທຳ, ການບໍລິການ ແລະ ອື່ນໆ. ສ່ວນສິນຄ້າຊຶ່ງເປັນຍີ່ຫໍ້ທີ່ມີຊື່ສຽງເຂົ້າຮ່ວມວາງສະແດງໃນຄັ້ງນີ້ນອກຈາກ ເບຍລາວ ແລ້ວ, ກໍຍັງມີກາເຟສີນຸກແລະ ກາເຟດາວ, ນອກນັ້ນ ຍັງມີຫັດຖະກຳແຜ່ນແພຂອງແຕ່ລະແຂວງ, ເບຍຫຼວງພຣະບາງ, ໝາກຂາມປ້ອມອົບແຫ້ງແກ້ວສະຫວັນ, ເຫຼົ້າບາກາ, ຊາບູຮານຜົ້ງສາລີ, ນໍ້າມັນງາໄຊຍາມອນອຸດົມໄຊ, ໄວນ໌ໝາກເຜິ້ງ, ເຂົ້າໄກ່ນ້ອຍຊຽງຂວາງ, ຜະລິດຕະພັນຍີ່ຫໍ້ ຍອດຊຳ ແຂວງຊຳເໜືອ, ຜະລິດຕະພັນຍີ່ຫໍ້ ອີ່ຫຼີ, ຍີ່ຫໍ້ບ້ານບ້ານ, ຫັດຖະກຳໄມ້ປູກ, ເຂົ້າຍີ່ຫໍ້ ສາຍບົວແຂວງຄຳມ່ວນ, ຫັດຖະກໍຫວາຍແຂວງວຽງຈັນ, ໝໍ້ແປງໄຟຟ້າ ແຂວງບໍລິຄຳໄຊ, ເຫຼົ້າເກດສະໜາ ແຂວງຈຳປາສັກ, ຜະລິດຕະພັນໜຶ່ງເມືອງໜຶ່ງຜະລິດຕະພັນ, ພ້ອມທັງຜະລິດຕະພັນໃໝ່ໆທີ່ພາກລັດ ແລະ ອົງການຈັດຕັ້ງສາກົນສົ່ງເສີມ, ບໍລິສັດສົ່ງເສີມການຂາຍ ແລະ ອື່ນໆ. ຊຶ່ງເຊື່ອໝັ້ນວ່າງານໃນຄັ້ງນີ້ຈະເປັນນິມິດໝາຍອັນສໍາຄັນທີ່ຊ່ວຍກະຕຸ້ນການໃຊ້ຈ່າຍ, ການທ່ອງທ່ຽວ ແລະ ການລົງທຶນຈາກຕ່າງປະເທດໃຫ້ນັບມື້ນັບຫຼາຍຂຶ້ນ.

แชร์