ສວນປູກກາເຟ ສົມໄຊຈະເລີນ ຍົກສູງຄຸນນະພາບ ແລະປະລິມານ

ທ່ານ ສົມໄຊ ລຸນທະປັນຍາ ປະທານບໍລິສັດສົມໄຊຈະເລີນສົ່ງເສີມການກະເສດຈໍາກັດຜູ້ດຽວ, ໄດ້ໃຫ້ຄວາມເຫັນຕໍ່ນັກຂ່າວໜັງສືພິມເສດຖະກິດ-ສັງຄົມ ໃນໂອກາດເປີດງານເທສະການກະເຟ-ຊາ ຫວ່າງແລ້ວນີ້ບໍລິສັດສົມໄຊຈະເລີນການກະເສດທີ່ຕັ້ງຢູ່ບ້ານພັດທະນາສະໜາມ ໄຊນະຄອນປາກເຊ ແຂວງຈຳປາສັກ ເປັນບໍລິສັດໜຶ່ງທີ່ໂດດເດັ່ນໃນການປູກກາເຟຊຶ່ງໄດ້ເລີ່ມຕົ້ນສ້າງສວນກາເຟແບບໃໝ່ທີ່ເນັ້ນຍົກສູງຄຸນນະພາບ ແລະປະລິມານຫຼາຍເພື່ອປ້ອນຕະຫຼາດ, ຊຶ່ງເພິ່ນໄດ້ເລີ່ມປູກກາເຟມາແຕ່ໃນປີ 2012 ໂດຍການປູກໄປເທື່ອລະນ້ອຍ ແລະຖອດຖອນບົດຮຽນໄປນຳ, ມາຮອດປະຈຸບັນສາມາດປູກກາເຟໄດ້ 135 ເຮັກຕາ, ໃນນັ້ນເກັບກ່ຽວຜົນຜະລິດໄດ້ 100 ກວ່າເຮັກຕາ, ໃນປີ 2018 ພວກເຮົາ ສາມາດເກັບຜົນຜະລິດໄດ້ 1.700 ໂຕນ, 2019 ເກັບຜົນຜະລິດໄດ້ 2.000 ພັນ ໂຕນ ແລະປີ 2021 ແມ່ນໄດ້ຜົນຜະລິດ ສະໝໍ່າສະເໝີ 2.000 ພັນໂຕນ, ຊຶ່ງສະເລ່ຍໄດ້ຜົນຜະລິດຢູ່ປະມານ 20 ໂຕນຕໍ່ ເຮັກຕາ, ນັ້ນຖືວ່າເປັນການປູກກາເຟທີ່ມີສະມັດຕະພາບສູງຖ້າທຽບໃສ່ບາງປະເທດ.

ທ່ານກ່າວຕື່ມອີກວ່າ: ຕະຫຼອດໄລຍະເວລາ 3 ປີຜ່ານມາສາມາດເກັບກູ້ໄດ້ບໍ່ຫຼຸດ 15-20 ໂຕນຕໍ່ເຮັກຕາ, ຊຶ່ງເປັນຜົນສໍາເລັດຂອງບໍລິສັດເມື່ອທຽບໃສ່ຊາວສວນປູກໂດຍທົ່ວໄປແມ່ນໄດ້ຜົນຜະລິດພຽງແຕ່ 4-5 ໂຕນຕໍ່ເຮັກຕາ, ສະນັ້ນເມື່ອບໍລິສັດມີຜົນສຳເລັດປູກກາເຟແລ້ວ, ຕົກມາໃນປີ 2021 ບໍ ລິສັດໄດ້ເລີ່ມໂຄງການສົ່ງເສີມພັດທະນາກາເຟສະມັດຕະພາບສູງຕິດພັນກັບການຕະຫຼາດຕ່າງປະເທດ, ໂດຍການປຸກລະດົມປະຊາຊົນເຂົ້າມາຮ່ວມໂຄງການ, ປະຈຸບັນມີສະມາຊິກ 200 ກວ່າຄອບ ຄົວ, ມີເນື້ອທີ່ສວນກາເຟ 200 ກວ່າເຮັກຕາ, ພາຍໃນ 10 ໝູ່ບ້ານທີ່ນອນໃນ 2 ເມືອງຄື: ເມືອງປາກຊ່ອງ 6 ໝູ່ບ້ານ ແລະເມືອງເຫຼົ່າງາມ 1 ໝູ່ບ້ານ, ຊຶ່ງພາຍ ຫຼັງທີ່ປະຊາຊົນເຂົ້າຮ່ວມໂຄງການພົ້ນຜ່ານມາໄດ້ 1 ປີ ເຫັນວ່າສວນກາເຟຂອງສະມາຊິກສາມາດເກັບຜົນຜະລິດໄດ້ສູງຂຶ້ນ ແລະຕົ້ນກາເຟກໍ່ຂຽວງາມ ແລະພ້ອມທີ່ຈະໃຫ້ຜົນຜະລິດສູງໃນປີຕໍ່ໆ ໄປ, ຖ້າທຽບເປັນເປີເຊັນແມ່ນໃຫ້ຜົນຜະລິດສູງເຖິງ 30%.

ທ່ານປະທານບໍລິສັດສົມໄຊຈະເລີນສົ່ງເສີມການກະເສດຈໍາກັດຍັງໃຫ້ຮູ້ຕື່ມ: ໃນສົກປີ 2021 ຜ່ານມາບໍລິສັດສາມາດເກັບຜົນຜະລິດໄດ້ 2 ພັນກວ່າໂຕນ, ສະເລ່ຍ 20 ໂຕນຕໍ່ເຮັກຕາ, ສ່ວນຜົນຜະລິດຂອງສະມາຊິກໃນປີ 2022 ນີ້ ຄາດວ່າຈະໄດ້ຜົນຜະລິດຢູ່ປະມານ 2 ພັນກວ່າໂຕນ, ສະເລ່ຍຖືກຢູ່ປະມານ 10 ໂຕນຕໍ່ເຮັກຕາ ແລະບໍລິສັດຈະພະຍາຍາມເຮັດໃຫ້ສວນກາເຟຂອງສະມາຊິກສາມາດໃຫ້ຜົນຜະລິດສູງຂຶ້ນໃນແຕ່ລະປີ ແລະຈະປຸກລະດົມໃຫ້ປະຊາຊົນຜູ້ທີ່ປູກກາເຟເຂົ້າຮ່ວມໂຄງການໃນປີນີ້ເນັ້ນຂຶ້ນບໍ່ໃຫ້ຫຼຸດ 1 ພັນເຮັກຕາ.

 

ຂ່າວ: ໂພທິລາດ 

แชร์