ທ່ານ ບົວໄລ ພານຸວົງ ໄດ້ລາຍງານການເຄື່ອນໄຫວຂອງຊາວໜຸ່ມ ຖວທ ໃນໄລຍະ 1 ປີຜ່ານມາວ່າ: ພາຍໃຕ້ການຊີ້ນໍາ-ນໍາພາຂອງຄະນະບໍລິຫານງານຊາວໜຸ່ມກະຊວງ ຖວທ, ໂດຍໄດ້ເຮັດໜ້າທີ່ ສຶກສາອົບຮົມການເມືອງແນວຄິດດ້ວຍຫຼາຍຮູບແບບ; ຂະນະທີ່ສະມາຊິກຊາວໜຸ່ມທົ່ວກະຊວງ ຖວທ ກໍມີຄວາມໜັກແໜ້ນທາງດ້ານການເມືອງ, ມີຄວາມສາມັກຄີ ແລະມີຄວາມຫ້າວຫັນຮັບໃຊ້ໜ້າທີ່ ທີ່ພັກ-ລັດ ມອບໝາຍໃຫ້. ກະຊວງ ຖວທ ມີສະມາຊິກຊາວໜຸ່ມ 1.196 ສະຫາຍ ຍິງ 570 ສະຫາຍ, ສະມາຊິກເຍົາວະຊົນທັນວາ 155 ຄົນ ຍິງ 95 ຄົນ, ໃນນີ້ ເປັນສະມາຊິກພັກ 242 ສະຫາຍ ຍິງ 91 ສະຫາຍ; ມີ 2 ຮາກຖານ ແລະ 40 ໜ່ວຍ. ຂະບວນການຊາວໜຸ່ມກະຊວງ ຖວທ ໄດ້ເປັນກຳລັງສໍາຄັນໃນການປະຕິບັດວຽກງານໃນແຕ່ລະຂົງເຂດ, ອັນພິເສດແມ່ນໄດ້ເຄື່ອນໄຫວຢ່າງແຂງ ແຮງໃນການສ້າງຂະບວນການປຸກລະດົມຕ້ານພະຍາດໂຄວິດ-19.

 

ໃນໂອກາດດັ່ງກ່າວ, ລັດຖະມົນຕີກະຊວງ ຖວທ ກໍໄດ້ສະແດງຄວາມຊົມເຊີຍຕໍ່ຄະນະນໍາ ແລະ ສະມາຊິກຊາວໜຸ່ມ ທີ່ໄດ້ພ້ອມກັນຈັດຕັ້ງປະຕິບັດຂໍ້ແຂ່ງຂັນຂອງສູນກາງຊາວໜຸ່ມປະຊາຊົນ ປະຕິວັດລາວ ໄດ້ເປັນຢ່າງດີ, ເພື່ອຮັກສາ ແລະ ເສີມຂະຫຍາຍມູນເຊື້ອດີງາມ ຈິ່ງຮຽກຮ້ອງມາຍັງຄະນະນໍາ ແລະ ສະມາຊິກຊາວໜຸ່ມກະຊວງ ຖວທ, ຈົ່ງເພີ່ມທະວີການນໍາພາວຽກງານການເມືອງ, ມີຄວາມເປັນເອກະພາບຕໍ່ແນວທາງນະໂຍບາຍຂອງພັກ-ລັດ, ມີຄວາມເຊື່ອໝັ້ນຕໍ່ການນໍາພາຂອງພັກ ແລະ ລັດ ຖະບານ, ເຕົ້າໂຮມຄວາມສາມັກຄີ ແລະ ຄວາມເປັນເອກະພາບພາຍໃນຄະນະຊາວໜຸ່ມ; ສືບຕໍ່ປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມ, ຂໍ້ແຂ່ງຂັນ 3 ດີ 4 ຮູ້ ຂອງເຍົາວະຊົນທັນວາ ໃຫ້ຖືກຕ້ອງຊັດເຈນ ສອດຄ່ອງກັບເງື່ອນໄຂຕົວຈິງ; ເອົາໃຈໃສ່ປັບປຸງລະບອບ, ລະບຽບ, ແບບແຜນວິທີເຮັດວຽກ, ກົນໄກໃຫ້ມີຄວາມສະດວກວ່ອງໄວ, ຢຶດໝັ້ນຫຼັກການລວມສູນປະຊາທິປະໄຕໃນການຄົ້ນຄວ້າ ແລະ ຕັດສິນບັນຫາ; ເອົາໃຈໃສ່ຊີ້ນໍາ-ນໍາພາວຽກງານວິຊາສະເພາະ ຕິດພັນກັບຂະບວນການຊາວໜຸ່ມໃຫ້ມີບັນຍາກາດຟົດຟື້ນ ໂດຍສະເພາະແມ່ນການປະດິດສ້າງ ແລະ ການເສີມຂະຫຍາຍກໍາລັງແຮງສັງລວມເຂົ້າໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມຕິດພັນກັບການຜັນຂະຫຍາຍ ຄຳຂວັນກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ຖວທ ທີ່ວ່າ “ການນຳພາເຂັ້ມແຂງ ການຄຸ້ມຄອງສັກສິດ ຂ່າວສານທັນສະໄໝ ວັດທະນະທໍາສີວິໄລ ທ່ອງທ່ຽວຍືນຍົງ” ໃຫ້ໄດ້ຮັບການຜັນຂະຫຍາຍ ແລະ ປາກົດຜົນເປັນຈິງ.