ປີຜ່ານມາ ໃຫ້ອະໄພຍະໂທດແກ່ນັກໂທດ 2.403 ຄົນ

ການອະໄພຍະໂທດ ແມ່ນການປະຕິບັດນະໂຍບາຍມະນຸດສະທຳຂອງພັກ ແລະລັດຖະບານແຫ່ງ ສປປ ລາວ, ດ້ວຍການຫຼຸດຜ່ອນໂທດ ແລະປ່ອຍຕົວນັກໂທດຕາມລັດຖະດໍາລັດຂອງປະທານປະເທດໂດຍສະເພາະແມ່ນວັນຊາດທີ 2 ທັນວາ ຂອງແຕ່ລະປີ. ຊຶ່ງໃນປີ 2021 ມີນັກໂທດທີ່ໄດ້ຮັບການໃຫ້ອະໄພຍະໂທດຕາມລັດຖະດຳລັດຂອງປະທານປະເທດ ທັງໝົດ 2.403 ຄົນ ຍິງ 351 ຄົນ, ຕ່າງປະເທດ 27 ຄົນ ຍິງ 5 ຄົນ; ໃນນັ້ນ, ມີນັກໂທດທີ່ໄດ້ເງື່ອນໄຂຫຼຸດຜ່ອນໂທດ 2.005 ຄົນ ຍິງ 281 ຄົນ; ນັກໂທດທີ່ໄດ້ເງື່ອນໄຂປ່ອຍຕົວ 12 ຄົນ ຍິງ 3 ຄົນ; ນັກໂທດປະຫານຊີວິດໄດ້ຮັບອະໄພຍະໂທດເປັນໂທດຕະຫຼອດຊີວິດ 25 ຄົນ ແລະ ນັກໂທດປ່ອຍຕົວໃນໄລຍະປ້ອງກັນ, ສະກັດກັ້ນ ແລະ ຄວບຄຸມການລະບາດຂອງພະຍາດໂຄວິດ-19 ມີ 361 ຄົນ ຍິງ 58 ຄົນ.

ໂດຍທ່ານ ໄຊຊະນະ ໂຄດພູທອນ ກຳມະການສູນກາງພັກ, ຫົວໜ້າອົງການໄອຍະການປະຊາຊົນສູງສຸດ ຮອງປະທານຄະນະກໍາມະການອະໄພຍະໂທດລະດັບຊາດ ຜູ້ປະຈໍາການ, ໄດ້ລາຍງານຕໍ່ກອງປະຊຸມສະຫຼຸບວຽກງານອະໄພຍະໂທດ ປະຈຳປີ 2021 ແລະ ທິດທາງແຜນການຈຸດສຸມ ປະຈຳປີ 2022 (ຊຶ່ງໄດ້ຈັດໃນຮູບແບບປົກກະຕິ ແລະທາງໄກ) ໃນວັນທີ 23 ກຸມພາ 2022, ໂດຍການເປັນປະທານຂອງ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ,ປະທານຄະນະກໍາມະການອະໄພຍະໂທດລະດັບຊາດ,ມີທ່ານ ນາງ ເຂັມມະນີ ພົນເສນາ ກໍາມະການສູນກາງພັກ, ຮອງປະທານຄະນະກໍາມະການອະໄພຍະໂທດລະດັບຊາດ, ພ້ອມດ້ວຍບັນດາຄະນະກຳມະການອະໄພຍະໂທດລະດັບຊາດ, ກອງເລຂາຂັ້ນສູນກາງ ແລະ ທ້ອງຖິ່ນ ເຂົ້າຮ່ວມຢ່າງພ້ອມພຽງ.

ການຜ່ານບົດສະຫຼຸບໂດຍ ຫົວໜ້າອົງການໄອຍະການປະຊາຊົນສູງສຸດ,ໃນວາລະດຳເນີນກອງປະຊຸມຄັ້ງນີ້ລະບຸຕື່ມວ່າ: ຄະນະກໍາມະການອະໄພຍະໂທດແຕ່ລະຂັ້ນ ໄດ້ຊຸກຍູ້ໃຫ້ພະແນກຍຸຕິທຳໃນຂອບເຂດທົ່ວປະເທດ ໃນການເກັບຄ່າປັບໃໝ ແລະ ຄ່າເສຍຫາຍທາງແພ່ງ ທີ່ນັກໂທດຊຳລະໃນບັ້ນຄົ້ນຄວ້າສະເໜີໃຫ້ອະໄພຍະໂທດ ປະຈຳປີ 2021 ໄດ້ຈໍານວນ 4.901.721.000 ກີບ, 750.000 ບາດ (ສະກຸນເງິນໄທ), 700 ໂດລາສະຫະລັດ, ໃນນັ້ນຄ່າເສຍຫາຍທາງແພ່ງ ຈໍານວນ 866.862.000 ກີບ ໄດ້ມອບຄືນໃຫ້ໂຈດທາງແພ່ງແລ້ວ ຈຳນວນ 811.424.000 ກີບ, ຍັງຄ້າງມອບໃຫ້ໂຈດທາງແພ່ງ ຈໍານວນ 55.438.000 ກີບ ຊຶ່ງພາກສ່ວນກ່ຽວຂ້ອງຈະສືບຕໍ່ມອບໃຫ້ໂຈດທາງແພ່ງ; ສ່ວນຄ່າປັບໃໝທາງອາຍາ ຈຳນວນ 4.034.859.000 ກີບ, ຖອກເຂົ້າຄັງເງິນແຫ່ງຊາດແລ້ວຈຳນວນ 2.116.234.000 ກີບ, ຍັງຄ້າງຖອກເຂົ້າຄັງເງິນແຫ່ງຊາດ ຈໍານວນ 1.918.625.000 ກີບ ຊຶ່ງພາກສ່ວນຮັບຜິດຊອບຍັງຈະສືບຕໍ່ມອບເຂົ້າງົບປະມານຂອງລັດຕາມລະບຽບການ.

ໃນໂອກາດນີ້,ພົນເອກ ຈັນສະໝອນ ຈັນຍາລາດ ໄດ້ມີຄຳເຫັນສະຫຼຸບ ແລະໂອ້ລົມຕໍ່ກອງປະຊຸມໂດຍເນັ້ນໜັກໃຫ້ເອົາໃຈໃສ່ຄົ້ນຄວ້າກໍາແໜ້ນເນື້ອໃນຂອງມະຕິ, ຄຳສັ່ງ, ນະໂຍບາຍຂອງລັດ, ບັນດາມາດຕາຕາມລັດຖະບັນຍັດຂອງປະທານປະເທດ ແລະ ນິຕິກໍາຕ່າງໆທີ່ກ່ຽວຂ້ອງກັບວຽກງານອະໄພຍະໂທດໃຫ້ເລິກເຊິ່ງ, ຮັບປະກັນທາງດ້ານຫຼັກການລວມສູນປະຊາທິປະໄຕ ຕົກລົງເປັນໝູ່ຄະນະ, ພາຍໃຕ້ການຊີ້ນໍາ-ຕິດຕາມກວດກາຂອງຄະນະກໍາມະການອະໄພຍະໂທດລະດັບຊາດໂດຍກົງ, ຮັບປະກັນຄວາມຖືກຕ້ອງ, ໂປ່ງໃສ, ຍຸຕິທໍາ ແລະທັນເວລາ ເພື່ອໃຫ້ມີຄວາມຮັບປະກັນໃນການປະພຶດຕົວທີ່ດີຂອງນັກໂທດ, ຊຶ່ງກອງເລຂາຂອງຄະນະກໍາມະການອະໄພຍະໂທດຂັ້ນຕ່າງໆ ຕ້ອງໄດ້ປະຕິບັດສຳເລັດໜ້າທີ່ຢ່າງມີຄຸນນະພາບ.

แชร์