ໂອມິຄຣອນ ບຸກອາຊຽນ!

​ຫຼາຍປະເທດໃນອາຊຽນ ກຳລັງຜະເຊີນກັບການລະບາດຢ່າງໜັກຂອງໂຄວິດ-19, ໂດຍສະເພາະແມ່ນເຊື້ອກາຍພັນ ໂອມິຄຣອນ. ຊຶ່ງໃນສິງຄະໂປຣ໌ ພົບຜູ້ຕິດເຊື້ອກໍລະນີໃໝ່ທະລຸ 26 ພັນຄົນ, ສ່ວນຫວຽດນາມກໍພົບຜູ້ຕິດເຊື້ອກໍລະນີໃໝ່ຫຼາຍກວ່າ 55 ພັນຄົນ.

​ສຳນັກຂ່າວຕ່າງປະເທດໄດ້ລາຍງານໃນວັນທີ 23 ກຸມພາ 2022 ວ່າ: ກະຊວງສາທາລະນະສຸກສິງຄະໂປຣ໌ ໄດ້ຖະແຫຼງກ່ຽວກັບການກວດພົບຜູ້ຕິດເຊື້ອໂຄວິດ-19 ກໍລະນີໃໝ່ທີ່ພຸ່ງສູງຂຶ້ນເຖິງ 26.032 ຄົນ, ໃນນີ້ເປັນການຕິດເຊື້ອໃນປະເທດ 25.731 ຄົນ ແລະຕິດເຊື້ອນຳເຂົ້າ 301 ຄົນ; ຂະນະທີ່ຜູ້ເສຍຊີວິດຈາກໂຄວິດ-19 ກໍເພີ່ມອີກ 22 ລາຍ, ນອກນັ້ນຍັງມີຜູ້ປ່ວຍທີ່ຕ້ອງເຂົ້າຮັບການປິ່ນປົວໃນຫ້ອງ ICU 46 ຄົນ, ເພີ່ມຂຶ້ນ 2 ຄົນເມື່ອທຽບໃສ່ຕົວເລກໃນວັນຈັນຜ່ານມາ.

​ທັງນີ້, ຊາວສິງຄະໂປຣ໌ໄດ້ຮັບການສັກວັຄຊີນປ້ອງກັນພະຍາດໂຄວິດ-19 ຄົບ 2 ໂດສແລ້ວ 94% ແລະມີຜູ້ໄດ້ຮັບວັຄຊີນເຂັມກະຕຸ້ນ (ບູສເຕີຣ໌) ແລ້ວປະມານ 66% ຂອງຈຳນວນປະຊາກອນໃນປະເທດ.

​ສຳລັບສະຖານະການໂຄວິດ-19 ໃນອາຊຽນ, ສາຍພັນກາຍພັນ ໂອມິຄຣອນ ທີ່ແພ່ລະບາດໄວ ແລະຕິດເຊື້ອງ່າຍກຳລັງກາຍເປັນສາຍພັນຫຼັກຂອງການລະບາດໃນພູມີພາກ. ຂໍ້ມູນຈາກເວັບໄຊຕ໌ aseanbriefing ໄດ້ລາຍງານວ່າ: ຂະນະນີ້, ມີຫຼາຍປະເທດພົບຜູ້ຕິດເຊື້ອໂຄວິດ-19 ກໍລະນີ ໃໝ່ເພີ່ມຂຶ້ນ; ຊຶ່ງເມື່ອວັນທີ 22 ກຸມພາ, ອິນໂດນີເຊຍ ພົບຜູ້ຕິດເຊື້ອໃໝ່ 57.491 ຄົນ, ມາເລເຊຍ ຕິດເຊື້ອໃໝ່ 27.179 ຄົນ, ຫວຽດນາມ ຕິດເຊືອໃໝ່ 55.879 ຄົນ, ໄທຕິດເຊື້ອໃໝ່ 21.232 ຄົນ ແລະມຽນມາຕິດເຊື້ອໃໝ່ 2.897 ຄົນ.

แชร์