ຈີນ ສະແດງຈຸດຢືນແກ້ບັນຫາ ຣັສເຊຍ-ຢູເຄຣນ ດ້ວຍແນວທາງການທູດ

ສປ ຈີນ ຍິນດີ ແລະສະໜັບສະໜູນທຸກຄວາມພະຍາຍາມຂອງແນວທາງການທູດ, ພ້ອມຮຽກຮ້ອງທຸກຝ່າຍທີ່ກ່ຽວຂ້ອງເດີນໜ້າການເຈລະຈາ ແລະຫາລື, ລວມເຖິງສະແຫວງຫາແນວທາງທີ່ສົມເຫດສົມຜົນເພື່ອຈັດການກັບຂໍ້ກັງວົນຂອງກັນແລະກັນ,ບົນພື້ນຖານຄວາມສະເໝີພາບ ແລະເຄົາລົບເຊິ່ງກັນແລະກັນ.

ອີງຕາມລາຍງານຂ່າວຕ່າງປະເທດຊຶ່ງອ້າງການເປີດເຜີຍຂອງສຳນັກຂ່າວຊິນຫົວ ເມື່ອວັນທີ 22 ກຸມພາ 2022 ວ່າ: ທ່ານ ຈາງ ຈວິນ ຜູ້ແທນຖາວອນ ສປ ຈີນ ປະຈຳສະຫະປະຊາຊາດ(UN) ໄດ້ກ່າວຕໍ່ກອງປະຊຸມສຸກເສີນຄະນະມົນຕີຄວາມໝັ້ນຄົງແຫ່ງສະຫະປະຊາຊາດ ໂດຍລະບຸວ່າ: ຈີນຕິດຕາມສະຖານະການຫຼ້າສຸດໃນຢູເຄຣນຢ່າງໃກ້ຊິດ ແລະ ໄດ້ສະແດງຈຸດຢືນຂອງຕົນຢ່າງຊັດເຈນໃນການປະຊຸມຄະນະມົນຕີຄວາມໝັ້ນຄົງແຫ່ງສະຫະປະຊາຊາດໃນສອງຄັ້ງກ່ອນໜ້ານີ້. ໂດຍຢໍ້າວ່າ “ທຸກຝ່າຍທີ່ກ່ຽວຂ້ອງຕ້ອງໃຊ້ຄວາມຢັບຢັ້ງຊັ່ງໃຈ ແລະຫຼີກລ່ຽງການກະທຳໃດໆທີ່ອາດຈະທະວີຄວາມຕຶງຄຽດຍິ່ງຂຶ້ນ”.

ໂດຍທ່ານຈາງ ໄດ້ກ່າວຕື່ມວ່າ: ສະຖານະການໃນປັດຈຸບັນຂອງຢູເຄຣນເປັນຜົນຈາກປັດໄຈອັນສັບຊ້ອນຫຼາຍປະການ, ຊຶ່ງຈີນກຳນົດຈຸດຢືນຂອງຕົນເອງຕາມຂໍ້ດີຂອງປະເດັນນັ້ນໆສະເໝີມາ ແລະເຊື່ອວ່າທຸກປະເທດຄວນແກ້ໄຂຂໍ້ພິພາດລະຫວ່າງປະເທດດ້ວຍສັນຕິວິທີຕາມວັດຖຸປະສົງ ແລະຫຼັກການຂອງກົດບັດແຫ່ງສະຫະປະຊາຊາດ.

แชร์