ກຽມສ້າງສາງສີນຄ້າຄົບວົງຈອນ ທີ່ໄຊຍະບູລີ

ຜ່ານຂັ້ນຕອນລົງນາມບົດບັນທຶກຄວາມເຂົ້າໃຈ (MOU) ເພື່ອສຶກສາຄວາມເປັນໄປໄດ້ໃນການພັດທະນາກໍ່ສ້າງ ແລະ ໃຫ້ບໍລິການລະບົບສາງຄົບວົງຈອນ, ຈຸດພັກສິນຄ້າ ແລະ ຄ່ຽນຖ່າຍຕູ້ຄອນເທນເນີຣ໌ ຂາເຂົ້າ-ຂາອອກ (ICD) ພ້ອມພັດທະນາດ້ານການຄ້າ ແລະ ບໍລິການຕິດພັນກັບການສົ່ງເສີມທ່ອງທ່ຽວໃນຂອບເຂດດ່ານສາກົນ ນໍ້າເຫືອງ ເມືອງແກ່ນທ້າວ, ດ່ານສາກົນ ພູດູ່ ເມືອງປາກລາຍ, ດ່ານສາກົນ ນໍ້າເງິນ ເມືອງເງິນ ແລະ ດ່ານສາກົນ ປາງມອນ ເມືອງຄອບ ແຂວງໄຊຍະບູລີ.

ພິທີເຊັນ MOU ຈັດຂຶ້ນເມື່ອຕອນບ່າຍຂອງວັນທີ 22 ກຸມພາ 2022 ທີ່ຫ້ອງວ່າການແຂວງໄຊຍະບູລີ, ຊຶ່ງຝ່າຍອົງການປົກຄອງແຂວງລົງນາມໂດຍ ທ່ານ ຄໍາເຜີຍ ສິດທະວົງ ຮອງຫົວໜ້າພະແນກແຜນການ ແລະ ການລົງທຶນ ແລະ ຝ່າຍບໍລິສັດ ລົງນາມໂດຍ ທ່ານ ໂຊກໄຊ ສົມໃຈນຶກ ອໍານວຍການບໍລິສັດໂຊກໄຊຈະເລີນຂົນສົ່ງ ຈໍາກັດ, ໂດຍການເຂົ້າຮ່ວມເປັນສັກຂີພິຍານຂອງ ທ່ານ ສົມຈິດ ຈັນທະວົງ ຮອງເຈົ້າແຂວງໄຊຍະບູລີ, ມີພະນັກງານຈາກພະແນກການກ່ຽວຂ້ອງເຂົ້າຮ່ວມ.

ເປົ້າໝາຍຂອງໂຄງການດັ່ງກ່າວກໍເພື່ອປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມ, ເພື່ອເປັນທ່າແຮງດຶງດູດນັກລົງທຶນເຂົ້າມາສູ່ເຂດເສດຖະກິດໃໝ່ຢູ່ບັນດາດ່ານສາກົນຕາມຊາຍແດນແຂວງໄຊຍະບູລີ ແລະ ເພື່ອຈະໄດ້ສຶກສາຄວາມເປັນໄປໄດ້ໃນການພັດທະນາກໍ່ສ້າງ ແລະ ໃຫ້ບໍລິການລະບົບສາງຄົບວົງຈອນ, ຈຸດພັກສິນຄ້າ ແລະ ຄ່ຽນຖ່ານຕູ້ຄອນເທນເນີຣ໌ ຂາເຂົ້າ-ຂາອອກ (ICD) ໄປຄຽງຄູ່ກັບການພັດທະນາດ້ານການຄ້າ ແລະ ບໍລິການທີ່ຕິດພັນກັບການສົ່ງເສີມການທ່ອງທ່ຽວໃນຂອບເຂດດ່ານສາກົນ, ຊຶ່ງຈະເປັນການສົ່ງເສີມການຄ້າ-ການລົງທຶນຕາມເຂດຊາຍແດນໃຫ້ຂະຫຍາຍຕົວຍິ່ງໆຂຶ້ນ.

แชร์