ຮັບຮອງຫັດຖະກຳຜ້າໄໝບ້ານໂພໄຊ ເປັນສິນຄ້າໂອດ໊ອບແຫ່ງຊາດ

ຫົວໜ່ວຍຫັດຖະກຳຜ້າໄໝລາວ ບ້ານໂພໄຊ (ປາກມູດ) ນະຄອນຫຼວງພຣະບາງ, ໄດ້ຮັບການຢັ້ງຢືນເປັນສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດ, ຊຶ່ງນັບເປັນສິນຄ້າໂອດ໊ອບ ອັນດັບທີ 7ຂອງນະຄອນຫຼວງພຣະບາງ.

ເຂົ້າຮ່ວມໃນພິທີຮັບຮອງເອົາຫົວໜ່ວຍສິນຄ້າ ເປັນຜະລິດຕະພັນໜຶ່ງເມືອງໜຶ່ງຜະລິດຕະພັນແຫ່ງຊາດ, ຊຶ່ງຈັດຂຶ້ນເມື່ອບໍ່ດົນມານີ້ ທີ່ບ້ານໂພໄຊ (ປາກມູດ) ໂດຍທ່ານ ວຽງທອງ ຫັດສະຈັນ ເຈົ້ານະຄອນຫຼວງພຣະບາງ,ທ່ານ ສຸລິໄຊ ຫົງສາຄອນ ຮອງຫົວໜ້າພະແນກອຸດສາຫະກຳ ແລະການຄ້າແຂວງ, ບັນດານັກວິຊາການຈາກຫ້ອງການອ້ອມຂ້າງນະຄອນ ແລະ ຫ້ອງການອຸດສາຫະກຳ ແລະ ການຄ້າເມືອງປາກອູ, ຈອມເພັດ ແລະ ເມືອງຊຽງເງິນ.

ທັງນີ້, ທ່ານ ສົມຫວັງ ພົມມະກອນ ຫົວໜ້າຫ້ອງການອຸສາຫະກຳ ແລະ ການຄ້າ ນະຄອນຫຼວງພະບາງ, ໄດ້ລາຍງານວ່າ: ປັດຈຸບັນ, ຢູນະຄອນຫຼວງພຣະບາງ ມີສິນຄ້າໜຶ່ງເມືອງໜຶ່ງຜະລິດຕະພັນ 6 ຫົວໜ່ວຍຄື: ກະຕ່ານໍ້າກ້ຽງ, ສູນຫັດຖະກໍາຜານົມ, ຫັດຖະກໍາເຈ້ຍສາ, ກາເຟຂີ້ເຫງັນ, ແກະ ສະຫຼັກໄມ້, ຫັດຖະກໍາປັກດິ້ງ ແລະ ຫຼ້າສຸດກໍໄດ້ຮັບອະນຸມັດອີກໜຶ່ງຫົວໜ່ວຍຄື ຫັດຖະກຳຜ້າໄໝລາວ ບ້ານໂພນໄຊ (ປາກມູດ) ຂອງທ່ານ ນາງ ໂຊກທະວີ ວົງພະຈັນ.

• 23/02/2022