ມີນາ ຍົກວາລະແຫ່ງຊາດໃສ່ແຜນປະຕິບັດງານຂອງທຸກອົງການຈັດຕັ້ງ

ແຜນປະຕິບັດງານຂອງລັດຖະບານ ແຫ່ງ ສປປ ລາວ ໃນເດືອນມີນາທີ່ຈະມາເຖິງນີ້, ແມ່ນເລັ່ງໃສ່ຊຸກຍູ້ ແລະ ຕິດຕາມການຈັດຕັ້ງປະຕິບັດ 2 ວາລະແຫ່ງຊາດ ໃຫ້ເປັນຮູບປະທຳຫຼາຍຂຶ້ນ. ຊຶ່ງແຜນວຽກຈຸດສຸມດັ່ງກ່າວ ຕ້ອງຖືກນຳໄປຜັນຂະຫຍາຍເຂົ້າໃນວຽກງານຂອງທຸກຂະແໜງການ, ແນໃສ່ແກ້ໄຂຂອດຄົງຄ້າງດ້ານເສດຖະກິດ-ການເງິນ ແລະ ແກ້ໄຂປາກົດການຫຍໍ້ທໍ້ອັນມີຕົ້ນຕໍມາຈາກບັນຫາຢາເສບຕິດ.

ໂດຍທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຜູ້ປະຕິບັດວຽກງານໂຄສົກລັດຖະບານ. ໄດ້ຖະແຫຼງຂ່າວກ່ຽວກັບຜົນສຳເລັດຂອງກອງປະຊຸມລັດຖະບານ ສະໄໝສາມັນ ປະຈຳເດືອນກຸມພາ ພາຍຫຼັງດຳເນີນມາເປັນເວລາ 2 ວັນ, ຊຶ່ງກອງປະຊຸມໄດ້ປິດລົງໃນຕອນແລງຂອງວັນທີ 22 ກຸມພາ 2022 ທີ່ສໍານັກງານນາຍົກລັດຖະມົນຕີ.

ກອງປະຊຸມຄັ້ງນີ້, ດຳເນີນພາຍໃຕ້ການເປັນປະທານຂອງ ທ່ານ ພັນຄໍາ ວິພາວັນ ນາຍົກ ລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານ ເຂົ້າຮ່ວມຢ່າງພ້ອມພຽງ. ໂດຍມີການຮັບຟັງລາຍງານ ແລະ ຄົ້ນຄວ້າ, ປຶກສາຫາລືຕໍ່ 9 ເອກະສານສຳຄັນ. ໃນນັ້ນ, ໄດ້ຕົກລົງ ແລະ ມີທິດຊີ້ນຳກ່ຽວກັບບົດສະຫຼຸບຕີລາຄາການປະຕິບັດວຽກງານຈຸດສຸມ ປະຈຳເດືອນກຸມພາ ແລະ ທິດທາງແຜນວຽກຈຸດສຸມ ປະຈຳເດືອນມີນາ 2022 ຂອງລັດຖະບານ.

ສໍາລັບແຜນວຽກຈຸດສຸມ ປະຈຳເດືອນມີນານີ້, ລັດຖະບານ ຈະໄດ້ສືບຕໍ່ສຸມໃສ່ຊຸກຍູ້ ແລະ ຕິດ ຕາມການຈັດຕັ້ງປະຕິບັດ 2 ວາລະແຫ່ງຊາດ ໃຫ້ເປັນຮູບປະທໍາຫຼາຍຂຶ້້ນ ໂດຍສະເພາະແມ່ນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ການນຳໃຊ້ລົດລັດ, ການແກ້ໄຂລົດທີ່ນຳໃຊ້ບໍ່ຖືກຕ້ອງຕາມກົດໝາຍ, ການແກ້ໄຂຄວາມຫຍຸ້ງຍາກໃນການດຳເນີນທຸລະກິດ, ການຂຸດຄົ້ນແຮ່ທາດ, ການສົ່ງອອກສິນຄ້າຢູ່ດ່ານຊາຍແດນ ແລະ ບັນຫາທີ່ດິນ. ໄປຄຽງຄູ່ກັບການດໍາເນີນມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19. ໃນນັ້ນ, ຂົງເຂດປ້ອງກັນຊາດ-ປ້ອງກັນຄວາມສະຫງົບ ສືບຕໍ່ປະຕິບັດແນວທາງ ປກຊ-ປກສ ທົ່ວປວງຊົນຮອບດ້ານຢ່າງຕັ້ງໜ້າ, ໂດຍສົມທົບແໜ້ນກັບການເຄື່ອນໄຫວຂອງກໍາລັງທຸກຂັ້ນ ແລະ ການມີສ່ວນຮ່ວມຂອງປະຊາຊົນ, ທັງເພີ່ມຄວາມເອົາໃຈໃສ່ໃນການຜັນຂະຫຍາຍ ແລະ ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃຫ້ເຂົ້າສູ່ລວງເລິກ ແລະ ເປັນຮູບປະທໍາຫຼາຍຂຶ້ນ.

ຂົງເຂດເສດຖະກິດ, ສືບຕໍ່ສຸມໃສ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ປີ 2022 ແລະ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຢ່າງແຂງແຮງ ແລະ ໄດ້ຮັບຜົນດີກວ່າເກົ່າ, ໃນນີ້ ເລັ່ງທວງໃຫ້ມີການຫັນເປັນວຽກລະອຽດຂອງແຕ່ລະຂະແໜງການ; ເອົາໃຈໃສ່ແກ້ໄຂສິ່ງກີດຂວາງຕ່າງໆ ເພື່ອອຳນວຍຄວາມສະດວກໃຫ້ແກ່ການລົງທຶນພາຍໃນ ແລະ ຕ່າງປະເທດ, ທັງໃຫ້ມີການຫັນປ່ຽນຢ່າງຈະແຈ້ງ.

ເລັ່ງຈັດຕັ້ງປະຕິບັດບັນດາໂຄງການແຮ່ທາດ, ການເຮັດທົດລອງທຸລະກິດດິຈີຕອລ ແລະ ບັນດາໂຄງການທີ່ລັດຖະບານໄດ້ອະນຸຍາດໃຫ້ທົດລອງໄປແລ້ວນັ້ນ ໃຫ້ມີຄວາມຄືບໜ້າ ແລະ ມີປະສິດທິຜົນ;ສືບຕໍ່ປະຕິບັດມາດຕະການຄຸ້ມຄອງການຈັດເກັບລາຍຮັບພາສີ, ອາກອນ ແລະ ຄ່າບໍລິການຕ່າງໆ ຕາມທິດຫັນເປັນທັນສະໄໝ. ສືບຕໍ່ປະຕິບັດຄຳສັ່ງຂອງນາຍົກລັດຖະມົນຕີ ວ່າດ້ວຍການກວດກາ ແລະ ປະຕິບັດມາດຕະການຕໍ່ຜູ້ທີ່ນໍາເຂົ້າ ແລະ ນໍາໃຊ້ຍານພາຫະນະທຸກປະເພດແບບບໍ່ຖືກຕ້ອງ ໃຫ້ສໍາເລັດ, ລວມທັງເລັ່ງຜັນຂະຫຍາຍນິຕິກໍາວ່າດ້ວຍການນໍາໃຊ້ລົດລັດໃນຂອບເຂດທົ່ວປະເທດໃຫ້ເປັນຮູບປະທຳ ແລະ ສົ່ງເສີມການນໍາໃຊ້ລົດໄຟຟ້າ.

ເພີ່ມທະວີຄວາມເອົາໃຈໃສ່ໃນການສົ່ງເສີມການຜະລິດ, ການປຸງແຕ່ງ, ການຄ້າ, ການບໍລິການ ແລະ ການທ່ອງທ່ຽວ ປິ່ນອ້ອມແລວທາງເສດຖະກິດລົດໄຟລາວ-ຈີນ; ສືບຕໍ່ພົວພັນ ແລະ ປຶກສາຫາລືກັບປະເທດໃກ້ຄຽງ ເພື່ອສ້າງສະພາບແວດລ້ອມທີ່ສະດວກໃຫ້ແກ່ການນຳເຂົ້າ-ສົ່ງອອກສິນຄ້າໃຫ້ດີຂຶ້ນ; ເພີ່ມຄວາມເອົາໃຈໃສ່ຄຸ້ມຄອງ ແລະ ຮັກສາສະຖຽນລະພາບດ້ານເງິນຕາ ໃຫ້ມີຄວາມໝັ້ນທ່ຽງ ແລະ ອັດຕາແລກປ່ຽນເໜັງຕີງ ໃນລະດັບທີ່ກໍານົດໄວ້ ຕິດພັນກັບການເອົາໃຈໃສ່ຄຸ້ມຄອງການເຄື່ອນໄຫວຂອງທະນາຄານທຸລະກິດ ແລະ ສະຖາບັນການເງິນ ໃຫ້ປະຕິບັດຕາມລະບຽບການ; ສືບຕໍ່ປັບປຸງແກ້ໄຂກົນໄກການຂຶ້ນທະບຽນ ແລະ ອອກໃບຕາດິນໃນຂອບເຂດທົ່ວປະເທດ ໃຫ້ມີຄວາມສະດວກວ່ອງໄວ ແລະ ຮັບປະກັນຄວາມຖືກຕ້ອງ; ສືບຕໍ່ປັບປຸງ ແລະ ຍົກສູງຄຸນນະພາບການບໍລິການຜູ້ໂດຍສານທາງລົດໄຟ ແລະ ການບໍລິການຂົນສົ່ງສິນຄ້າໃຫ້ສະດວກ ແລະ ວ່ອງໄວ.

ຂົງເຂດວັດທະນະທຳ-ສັງຄົມ, ໃຫ້ເລັ່ງໃສ່ສືບຕໍ່ເປີດການຮຽນ-ການສອນ ໃນສະຖານການສຶກສາ ແລະ ປຸກລະດົມນັກຮຽນ-ນັກສຶກສາ ຕາມເກນອາຍຸ ທີ່ກະຊວງສາທາລະນະສຸກກຳນົດໃຫ້ໄປຮັບການສັກວັຄຊີນ ໃຫ້ຫຼາຍຂຶ້ນ; ພ້ອມທັງ ປັບປຸງວັດຈະນານຸກົມ ພາສາລາວ ໃຫ້ສຳເລັດ; ສືບຕໍ່ເອົາໃຈໃສ່ຊຸກຍູ້ການປະຕິບັດພາລະບົດບາດຂອງຂະແໜງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຕິດພັນກັບການກຽມຄວາມພ້ອມຮອບດ້ານ ເພື່ອຕ້ອນຮັບນັກທ່ອງທ່ຽວເຂົ້າມາປະເທດ.

ຂົງເຂດການປົກຄອງ ແລະ ຍຸຕິທໍາ, ສືບຕໍ່ກະກຽມຄວາມພ້ອມຮອບດ້ານຂອງບັນດາຮ່າງກົດໝາຍສ້າງໃໝ່ ແລະ ຮ່າງກົດໝາຍສະບັບປັບປຸງ ທີ່ຂະແໜງການຕົນຮັບຜິດຊອບ ຕາມແຜນການສ້າງ ແລະ ປັບປຸງກົດໝາຍ ປະຈໍາປີ 2022 ຂອງສະພາແຫ່ງຊາດ ເພື່ອໃຫ້ທັນນໍາສະເໜີກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ໄດ້ພິຈາລະນາຕາມແຜນທີ່ວາງໄວ້. ສືບຕໍ່ສຸມໃສ່ແກ້ໄຂບັນຫາຕ່າງໆທີ່ພົວພັນເຖິງຂໍ້ຂັດແຍ່ງໃນສັງຄົມ, ລວມທັງການຈັດຕັ້ງປະຕິບັດຄໍາຕັດສິນຂອງສານ ແລະ ອື່ນໆ ໃຫ້ໄດ້ຮັບຜົນດີກວ່າເກົ່າ; ສືບຕໍ່ສຸມໃສ່ກະກຽມ ແລະ ດຳເນີນກອງປະຊຸມທົ່ວປະເທດ ເພື່ອສະຫຼຸບຕີລາຄາການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາ ຕິດພັນກັບການຜັນຂະຫຍາຍວຽກງານ 3 ສ້າງ ເຂົ້າສູ່ລວງເລິກ.

แชร์