ຫ້ອງວ່າການສູນກາງພັກ ແຕ່ງຕັ້ງສັບຊ້ອນພະນັກງານ

ການແຕ່ງຕັ້ງສັບຊ້ອນພະນັກງານໃນຄັ້ງນີ້, ມີຂຶ້ນໃນວາລະດຳເນີນກອງປະຊຸມເຊື່ອມຊຶມຜົນສໍາເລັດກອງປະຊຸມໃຫຍ່ຂອງອົງຄະນະພັກຫ້ອງວ່າການສູນກາງພັກ ຄັ້ງທີ VII ແລະປະກາດການຈັດຕັ້ງພາຍໃນຫ້ອງວ່າການສູນກາງພັກ (ຫສພ), ພາຍໃຕ້ການເປັນປະທານຂອງ ສະຫາຍ ທອງສະລິດ ມັງໜໍ່ເມກ ຄະນະເລຂາທິການສູນກາງພັກ, ເລຂາອົງຄະນະພັກຫ້ອງວ່າການສູນກາງພັກ, ຫົວໜ້າຫ້ອງວ່າການສູນກາງພັກ, ມີຜູ້ຕາງໜ້າຄະນະຈັດຕັ້ງສູນກາງພັກ,ຄະນະປະຈຳພັກ, ຄະນະພັກ, ຄະນະກົມ ແລະພະນັກງານຂັ້ນພະແນກຂອງຫ້ອງວ່າການສູນກາງພັກເຂົ້າຮ່ວມ.

ກອງປະຊຸມຊຶ່ງຈັດຂຶ້ນໃນວັນທີ 22 ກຸມພາ 2022, ໄດ້ພ້ອມກັນເຊື່ອມຊຶມຜົນສໍາເລັດກອງປະຊຸມໃຫຍ່ຂອງອົງຄະນະພັກຫ້ອງວ່າການສູນກາງພັກ ຄັ້ງທີ VII, ຜ່ານແຜນດໍາເນີນງານຂອງຄະນະບໍລິຫານງານພັກ ຫ້ອງວ່າການສູນກາງພັກ ສະໄໝທີ VII ແລະ ຜ່ານມະຕິວ່າດ້ວຍການແບ່ງຄວາມຮັບຜິດຊອບພາຍໃນຄະນະບໍລິຫານງານຫ້ອງວ່າການສູນກາງພັກ, ເພື່ອເປັນເອກະພາບໃນການຜັນຂະຫຍາຍ,ໂດຍຫັນເປັນໂຄງການ, ແຜນງານລະອຽດໃຫ້ສອດຄ່ອງ, ແທດຕົວຈິງ ແລະຕອບສະໜອງໄດ້ຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່, ທັງເປັນບ່ອນອີງໃຫ້ແກ່ການຕິດຕາມ, ກວດກາຄວາມຮັບຜິດຊອບ ແລະ ການຕີລາຄາຄວາມສາມາດນຳພາລວມ ໃນການນຳພາ-ຊີ້ນຳ ແຕ່ລະຂົງເຂດວຽກງານໃຫ້ມີການຫັນປ່ຽນ ແລະ ເຕີບໃຫຍ່ເຂັ້ມແຂງຍິ່ງຂຶ້ນ.

ກອງປະຊຸມ ໄດ້ຜ່ານມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງ ສະຫາຍ ຜາຄຳ ອິນແສງ ຄະນະປະຈໍາພັກ ເປັນຮອງຫົວໜ້າຫ້ອງວ່າການສູນກາງພັກ, ທັງເປັນຜູ້ຊ່ວຍວຽກ ສະຫາຍເລຂາທິການໃຫຍ່ຄະນະບໍລິຫານງານສູນກາງພັກ; ຜ່ານມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງ ແລະ ສັບຊ້ອນພະນັກງານຂັ້ນກົມ ແລະ ມະຕິຕົກລົງ ຂອງຄະນະປະຈໍາພັກຫ້ອງວ່າການສູນກາງພັກ ວ່າດ້ວຍການແຕ່ງຕັ້ງເລຂາໜ່ວຍພັກ ປະກອບມີ: ສະຫາຍ ກິຫຼຽນທອງ ແກ້ວນໍລະສິງ ຄະນະພັກ ເປັນເລຂາໜ່ວຍພັກ ແລະ ເປັນຫົວໜ້າກົມຄົ້ນຄວ້າ-ສັງລວມ; ສະຫາຍ ສີສຸນໄທ ແກ້ວໂພໄຊ ຄະນະພັກ ເປັນເລຂາໜ່ວຍພັກ ແລະ ເປັນຫົວໜ້າກົມເລຂານຸການ-ການນຳ; ສະຫາຍ ໄຊຍະລາດ ພົງຍາລັກ ເລຂາໜ່ວຍພັກ, ຮັກສາການຫົວໜ້າກົມພິພິທະພັນ ໄກສອນ ພົມວິຫານ ແລະ ອານຸສອນສະຖານ ຂຶ້ນເປັນຫົວໜ້າກົມພິພິທະພັນໄກສອນ ພົມວິຫານ.

ໂອກາດນີ້, ສະຫາຍ ທອງສະລິດ ມັງໜໍ່ເມກ ກໍໄດ້ສະແດງຄວາມເຊື່ອໝັ້ນວ່າບັນດາສະຫາຍທີ່ຮັບການແຕ່ງຕັ້ງກໍຄືພະນັກງານ ຫສພ, ຈະພ້ອມກັນອອກແຮງຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກຫ້ອງວ່າການສູນກາງພັກ ໃຫ້ປະກົດຜົນເປັນຈິງ, ປະຕິບັດໜ້າທີ່ວຽກງານດ້ວຍຄວາມຮັບຜິດຊອບສູງ, ສ້າງໃຫ້ຫ້ອງວ່າການສູນກາງພັກເຕີບໃຫຍ່ເຂັ້ມແຂງຂຶ້ນຕາມຄຳຂວັນ “ເສີມຂະຫຍາຍມູນເຊື້ອອັນດີງາມຂອງຫ້ອງວ່າການສູນກາງພັກ, ຍົກສູງຄວາມສາມາດນຳພາຂອງພັກໃຫ້ເຂັ້ມແຂງ, ຮັບປະກັນຄຸນນະພາບການເປັນເສນາທິການສັງລວມຂອງພັກໃຫ້ຊັດເຈນ, ທັນການ,ຕອບສະໜອງສິ່ງອຳນວຍຄວາມສະດວກຮັບໃຊ້ການນຳໃຫ້ດີຍິ່ງຂຶ້ນ.”

แชร์