ພາກລັດ ອະນຸມັດໃຫ້ ເຊໂປນ ມາຍນິ້ງ ຈຳກັດ ຂຸດຄົ້ນແຮ່ຄຳເຄົ້າ

ລັດຖະບານ ແຫ່ງ ສປປ ລາວ ແລະ ບໍລິສັດ ເຊໂປນ ມາຍນິ້ງ ຈຳກັດ, ໄດ້ຮ່ວມລົງນາມໃນສັນຍາວ່າດ້ວຍການຂຸດຄົ້ນ ແລະ ປຸງແຕ່ງແຮ່ຄຳເຄົ້າ, ຢູ່ເມືອງເຊໂປນ ແຂວງສະຫວັນນະເຂດ, ໃນເນື້ອທີ່ 206,72 ເຮັກຕາ. ຊຶ່ງໃນວາລະເຊັນສັນຍາເມື່ອວັນທີ 21 ກຸມພາ 2022, ທາງບໍລິສັດກໍໄດ້ມອບພັນທະລ່ວງໜ້າໃຫ້ລັດຖະບານ 3 ລ້ານໂດລາສະຫະລັດ.

ເຂົ້າຮ່ວມໃນພິທີເຊັນສັນຍາຄັ້ງນີ້ໂດຍ ທ່ານ ນາງ ຄຳຈັນ ວົງແສນບູນ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ບຸນເຫຼືອ ສິນໄຊວໍລະວົງ ຮອງລັດຖະມົນຕີກະຊວງການເງິນ, ທ່ານ ວຽງທະວີສອນ ເທບພະຈັນ ຮອງເຈົ້າແຂວງສະຫວັນນະເຂດ, ທ່ານ David Emest Moore ອຳນວຍການ ບໍລິສັດ ເຊໂປນ ມາຍນິ້ງ ຈຳກັດ, ທ່ານ ພິສິດ ໄຊຍະສິດ ຮອງອຳນວຍການ ບໍລິສັດ ເຊໂປນ ມາຍນິ້ງ ຈຳກັດ, ທ່ານ ຈັນທະວົງ ປັນຍາສິດ ຮອງຜູ້ອຳນວຍການ ບໍລິສັດ ເຊໂປນ ມາຍນິ້ງ ຈຳກັດ, ທ່ານ ວາລີຍະ ສີຈັນທອງທິບ ຫົວໜ້າພະແນກແຜນການ ແລະ ການລົງທຶນແຂວງສະຫວັນນະເຂດ ແລະ ທ່ານ ສົມບູນ ອິນທະປັດຖາ ຫົວໜ້າຫ້ອງການກະຊວງການເງິນ.

ນີ້ແມ່ນແຜນງານເກົ່າ ທີ່ກົມທໍລະນີສາດ ແລະ ແຮ່ທາດ ກະຊວງພະລັງງານ ແລະ ບໍ່ແຮ່, ໄດ້ເຊັນບົດບັນທຶກກ່ຽວກັບການຮ່ວມມືສຶກສາຂໍ້ມູນແຮ່ທາດ ຢູ່ເຂດເມືອງເຊໂປນ ກັບ ບໍລິສັດ ວິນແຮມ ມີເນໂຣສ ລາວ ຈໍາກັດ, ເມື່ອວັນທີ 9 ພຶດສະພາ 2014, ກໍານົດເວລາ 1 ປີ (ແຕ່ວັນທີ່ 9 ພຶດສະພາ 2014-8 ພຶດສະພາ 2015) ແຕ່ຍ້ອນວ່າໂຄງການດັ່ງກ່າວບໍ່ສາມາດຈັດຕັ້ງປະຕິບັດໜ້າວຽກເທຄນິຄສໍາເລັດຕາມແຜນການຂອງກອບເວລາບົດບັນທຶກ, ຈິ່ງສະເໜີຂໍຕໍ່ອາຍຸບົດບັນທຶກ. ຊຶ່ງຜ່ານມາກໍມີການຕໍ່ອາຍຸສັນຍາ 3 ຄັ້ງຄື: ຄັ້ງທີ 1 ກໍານົດ 2 ປີ ແຕ່ວັນທີ 19 ມັງກອນ 2016-18 ມັງກອນ 2018 (ໜັງສືແຈ້ງການຂອງກົມທໍລະນີສາດ ແລະ ແຮ່ທາດ ສະບັບເລກທີ 2015/ກຊສ.ກທຮ, ລົງວັນທີ 14ທັນວາ 2015) ຄັ້ງທີ 2 ກໍານົດ 2 ປີ ແຕ່ວັນທີ 19 ມັງກອນ 2018-18 ມັງກອນ 2020 (ໜັງສືແຈ້ງການຂອງກົມທໍລະນີສາດ ແລະ ແຮ່ທາດ ສະບັບເລກທີ 081/ພບ.ກທຮ, ລົງວັນທີ 19 ມັງກອນ 2018) ຫຼັງຈາກນັ້ນ ໄດ້ປ່ຽນຊື່ຈາກບໍລິສັດ ວິນແຮມ ມີເນໂຣສ ລາວ ຈຳກັດຜູ້ດຽວ ມາເປັນ ບໍລິສັດ ເຊໂປນ ມາຍນິ້ງ ຈຳກັດ, ໃນວັນທີ 1 ມີນາ 2018 ແລະ ຄັ້ງທີ 3(ຄັ້ງສຸດທ້າຍ) ກຳນົດ 18 ເດືອນ (ໜັງສືແຈ້ງກົນຂອງກົມທໍລະນີສາດ ແລະ ແຮ່ທາດ, ສະບັບເລກທີ 389/ພບ.ກທຮ, ລົງວັນທີ 25ມີນາ2020) ຄັ້ງວັນທີ 9 ພຶດສະພາ 2014 (ອາຍຸ MOU ຮອດວັນທີ 28 ກຸມພາ 2022).

ມາຮອດວັນທີ 21 ເດືອນ ກຸມພາ ປີ 2022, ບໍລິສັດ ເຊໂປນ ມາຍນິ້ງ ຈຳກັດ ແລະລັດຖະບານແຫ່ງ ສປປ ລາວ,ກໍໄດ້ເຫັນດີເປັນເອກະພາບຈັດຕັ້ງພິທີເຊັນສັນຍາວ່າດ້ວຍການຂຸດຄົ້ນ ແລະ ປຸງແຕ່ງແຮ່ຄໍາເຄົ້າ ຢູ່ເມືອງເຊໂປນ ຂຶ້ນຢ່າງເປັນທາງການ, ໂດຍທາງບໍລິສັດກໍໄດ້ດໍາເນີນການທຸກຢ່າງສອດຄ່ອງຕາມເງື່ອນໄຂ, ຂໍ້ຕົກລົງ ເລກທີ 107/ນຍ ທີ່ລັດຖະບານວາງອອກ. ຊຶ່ງຂັ້ນທີ 1 ບໍລິສັດຈະລົງທຶນກໍ່ສ້າງໂຮງງານຜະລິດ ແລະ ປຸງແຕ່ງແຮ່ຄຳປະມານ 15 ຫາ 20 ລ້ານໂດລາສະຫະລັດພາຍໃນປີ 2022, ຂັ້ນທີ 2 ປະມານ 35 ຫາ 50 ລ້ານໂດລາ ໃນປີ 2025 ແລະ ຂັ້ນທີ 3 ກໍຈະເພີ່ມຂຶ້ນຕາມປະລິມານແຮ່ຕົວຈິງ.

ທັງນີ້, ເຊໂປນ ມາຍນິ້ງ ກໍເຊື່ອໝັ້ນວ່າ: ບໍລິສັດຈະກາຍເປັນບໍລິສັດໜຶ່ງທີ່ມີທ່າແຮງໃນເລື່ອງການຜະລິດ ແລະ ປຸງແຕ່ງແຮ່ຄຳຢູ່ໃນ ສປປ ລາວ, ຊຶ່ງຈະເປັນການປະກອບພັນທະຕ່າງໆໃຫ້ກັບລັດຖະບານລາວ ທີ່ຈະໄດ້ຮັບຜົນປະໂຫຍດທັງທາງກົງ ແລະ ທາງອ້ອມ. ພ້ອມນັ້ນ, ປະຊາຊົນທີ່ຢູ່ເຂດໃກ້ຄຽງກໍຈະມີວຽກເຮັດງານທຳ ແລະ ມີຊີວິດການເປັນຢູ່ທີ່ດີຂຶ້ນ, ຊຶ່ງຄາດວ່າຈະມີການຈ້າງງານໃນພື້ນທີ່ ແລະ ບໍລິເວນໃກ້ຄຽງປະມານ 500 ກວ່າຄົນ. ສ່ວນການຜະລິດແຮ່ຄຳທີ່ໄດ້ຈາກການຂຸດຄົ້ນໂດຍບໍລິສັດຈະຕ້ອງໄດ້ຜະລິດ ແລະ ປຸງແຕ່ງຢູ່ພາຍໃນປະເທດລາວເທົ່ານັ້ນ.

แชร์