ເຜີຍຜົນດຳເນີນງານ ວຽກຕ້ານການຄ້າມະນຸດ

ລັດຖະບານແຫ່ງ ສປປ ລາວ, ໃຫ້ຄວາມສຳຄັນຕໍ່ວຽກງານຕອບຕ້ານບັນຫາການຄ້າມມະນຸດ. ໂດຍຄະນະຮັບຜິດຊອບໄດ້ເອົາໃຈໃສ່ເຜີຍແຜ່ແນວທາງຂອງພັກ-ລັດ, ບັນດານິຕິກຳ, ກົດໝາຍ, ລະບຽບການ, ສົນທິສັນຍາ, ຂໍ້ມູນຂ່າວສານ, ພ້ອມທັງຄົ້ນຄວ້າ, ປັບປຸງດຳລັດ, ອອກຂໍ້ຕົກລົງ ແລະວາງນະໂຍບາຍເພື່ອຕອບຕ້ານບັນຫາການຄ້າມະນຸດຢ່າງແຂງແຮງ.

ທັງນີ້, ເມື່ອວັນທີ 18 ກຸມພາ 2022 ທີ່ນະຄອນຫຼວງວຽງຈັນ, ຄະນະກໍາມະການຕ້ານການຄ້າມະນຸດລະດັບຊາດ ກໍໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານຕ້ານການຄ້າມະນຸດ ປະຈໍາປີ 2021 ແລະ ທິດທາງແຜນການປະຈໍາປີ 2022. ໂດຍການເປັນປະທານຂອງ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ທັງເປັນປະທານຄະນະກໍາມະການຕ້ານການຄ້າມະນຸດລະດັບຊາດ, ມີ ພົອ ວິໄລ ຫຼ້າຄໍາຟອງ ລັດຖະມົນຕີກະຊວງປ້ອງກັນຄວາມສະຫງົບ (ປກສ) ທັງເປັນຮອງປະທານຄະນະກໍາມະການຕ້ານການຄ້າມະນຸດລະດັບຊາດ, ພ້ອມດ້ວຍຄະນະກຳມະການຕ້ານການຄ້າມະນຸດຂັ້ນແຂວງ, ນະຄອນຫຼວງວຽງຈັນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໂດຍ ພັອ ແກ່ນຈັນ ພົມມະຈັກ ຮອງຫົວໜ້າກົມໃຫຍ່ຕໍາຫຼວດ ກະຊວງ ປກສ ທັງເປັນຫົວໜ້າກອງເລຂາຄະນະກຳມະການຕ້ານການຄ້າມະນຸດລະດັບຊາດ, ໄດ້ໃຫ້ຮູ້ວ່າ: ນັບແຕ່ເດືອນມັງກອນ 2021 ມີການແກ້ໄຂຄະດີຄ້າມະນຸດ 25 ເລື່ອງ, ສານປະຊາຊົນຕັດສິນແລ້ວ 5 ເລື່ອງ. ພ້ອມນີ້, ສູນກາງສະຫະພັນແມ່ຍິງລາວ ກໍໄດ້ຮ່ວມກັບເຈົ້າໜ້າທີ່ຕໍາຫຼວດສະກັດກັ້ນ ແລະ ຕ້ານການຄ້າມະນຸດ ດຳເນີນການສໍາພາດຜູ້ຖືກເຄາະຮ້າຍຈາກການຄ້າມະນຸດ ແລະ ກຸ່ມສ່ຽງ 23 ຄັ້ງ; ມີການປະສານສົມທົບກັບພາກສ່ວນທີ່ກ່ຽວຂ້ອງໃນການຕິດຕາມ, ຊຸກຍູ້ການດໍາເນີນຄະດີຕໍ່ຜູ້ກະທໍາຜິດ ແລະ ໄດ້ໃຫ້ການຊ່ວຍເຫຼືອທາງດ້ານສະຖານທີ່ພັກເຊົາຊົ່ວຄາວ, ໃຫ້ການຊ່ວຍ ເຫຼືອດ້ານກົດໝາຍ, ດ້ານການແພດ, ການສຶກສາ ແລະ ຝຶກວິຊາຊີບແກ່ຜູ້ຖືກເຄາະຮ້າຍ, ທັງໄດ້ສົ່ງກັບຄືນສູ່ຄອບຄົວ ແລະ ສັງຄົມ. ສິ່ງສຳຄັນແມ່ນໄດ້ນຳສົ່ງຜູ້ຖືກເຄາະຮ້າຍຈາກການຄ້າມະນຸດ ແລະ ກຸ່ມສ່ຽງເຂົ້າບຳບັດຟື້ນຟູຢູ່ສູນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ 37 ຄົນ (ສົ່ງກັບຄືນສູ່ຄອບຄົວແລ້ວ), ໃຫ້ການຊ່ວຍເຫຼືອເດັກທີ່ຈະນໍາສົ່ງໄປເປັນລູກລ້ຽງແບບບໍ່ຖືກຕ້ອງຕາມກົດໝາຍ ແລະ ໄດ້ສົ່ງກັບຄືນຄອບຄົວແລ້ວ 1 ຄົນ, ໄດ້ກວດສຸຂະພາບໃຫ້ຜູ້ຖືກເຄາະຮ້າຍ ແລະ ກຸ່ມສ່ຽງ 34 ຄົນ ຊຶ່ງສ່ວນຫຼາຍແມ່ນຖືກຄວາມຮຸນແຮງທາງເພດ ແລະ ຈິດໃຈ, ໄດ້ປະສານສົມທົບກັບພາກສ່ວນກ່ຽວຂ້ອງໃນການສ້າງກົນໄກປົກປ້ອງ ແລະ ຄຸ້ມຄອງແຮງງານທີ່ໄປເຮັດວຽກຢູ່ຕ່າງປະເທດ.

ອີກໜຶ່ງກິດຈະກຳສຳຄັນກໍຄື ມີການໂຄສະນາປູກຈິດສໍານຶກກ່ຽວກັບຜົນກະທົບ ແລະ ໄພອັນຕະລາຍຂອງການຄ້າມະນຸດ ໃຫ້ປະຊາຊົນ, ນັກຮຽນ ແລະ ພະນັກງານໃນຂອບເຂດທົ່ວປະເທດ; ທັງໂຄສະນາຜ່ານສື່ຕ່າງໆເຊັ່ນ: ໂທລະພາບ, ວິທະຍຸ, ໜັງສືພິມ, ເຟຊບຸກ, ຢູທູບ, ແອພຕິກຕ໊ອກ ແລະ ໂທລະໂຄ່ງປະຈໍາບ້ານ ຢ່າງເປັນປົກກະຕິ. ນອກນັ້ນ, ຍັງໄດ້ລະດົມທຶນນໍາພາກລັດ ຊຶ່ງໄດ້ຈາກ 11 ພາກສ່ວນ ແລະ ໄດ້ຈາກພາກເອກະຊົນ 38 ພາກສ່ວນ ໃນການສ້າງສູນຕ້ອນຮັບຊົ່ວຄາວສຳລັບຜູ້ຖືກເຄາະຮ້າຍຈາກການຄ້າມະນຸດ ທີ່ແຂວງຫຼວງນໍ້າທາ ຊຶ່ງສ້າງສໍາເລັດແລ້ວ 80%. ໄດ້ຈັດກິດຈະກຳແຂ່ງຂັນຮູບເງົາເລື່ອງສັ້ນ, ຫົວຂໍ້ໂຄສະນາ (ສະປອດ) ແລະ ເພງຮ້ອງຕ້ານການຄ້າມະນຸດ ໃຫ້ປະຊາຊົນໄດ້ຮັບຮູ້ເຂົ້າໃຈ ແລະ ມີສ່ວນຮ່ວມ ຊຶ່ງມີຜູ້ສົ່ງຜົນງານເຂົ້າຮ່ວມຢ່າງຫຼວງຫຼາຍ.

ສໍາລັບທິດທາງແຜນການ ປະຈໍາປີ 2022, ທາງຄະນະຮັບຜິດຊອບ ຈະປັບປຸງກົງຈັກການຈັດຕັ້ງ ແລະ ການເຄື່ອນໄຫວວຽກງານຂອງບັນດາຄະນະກໍາມະການຕ້ານການຄ້າມະນຸດຂັ້ນຕ່າງໆ ໃຫ້ມີຄວາມອາດສາມາດ ແລະ ເປັນເຈົ້າການເຮັດວຽກຕ້ານການຄ້າມະນຸດ, ເພື່ອເຮັດໃຫ້ຜູ້ຖືກເຄາະຮ້າຍ ບໍ່ວ່າຈະເປັນພົນລະເມືອງລາວ ແລະ ຊາວຕ່າງປະເທດໄດ້ຮັບການປົກປ້ອງ ແລະຊ່ວຍເຫຼືອ ໃຫ້ມີຄວາມປອດໄພ ແລະທັນເວລາ, ທັງຕິດຕາມຜູ້ກະທຳຜິດມາດໍາເນີນຄະດີ ແລະຮັບໂທດຕາມກົດໝາຍ.

แชร์