ສະ​ມາ​ຄົມ​​ນັກ​ຂ່າວ ລາວ-ໄທ ຂະຫຍາຍຄວາມສຳພັນ ຮ່ວມກັນພັດທະນາສື່

ສະມາຄົມນັກຂ່າວ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ແລະ ສະມາຄົມນັກຂ່າວ ນັກໜັງສືພິມແຫ່ງປະເທດໄທ ໄດ້ເພີ່ມການພົວພັນ ແລະຮ່ວມມືກັນໃນຫຼາຍດ້ານ ຊຶ່ງຜົນສືບເນື່ອງມາຈາກກອງປະຊຸມທະວິພາຄີລະຫວ່າງ 2 ສະມາຄົມດັ່ງກ່າວ ເມື່ອກາງເດືອນພະຈິກ 2021 ຜ່ານມາ; ສະນັ້ນ, ໃນວັນທີ 21 ກຸມພາ ນີ້, ສະມາຄົມນັກຂ່າວແຫ່ງ ສປປ ລາວ ແລະສະມາຄົມນັກຂ່າວນັກໜັງສືພິມແຫ່ງປະເທດໄທ ຈຶ່ງໄດ້ຈັດກອງປະຊຸມພົບປະດ້ວຍ​ລະ​ບົບທາງໄກ ແລະ ຮ່ວມລົງນາມໃນບົດບັນທຶກຄວາມເຂົ້າໃຈຜ່ານລະບົບສື່ສານອີເລັກໂທຣນິຄ, ຊຶ່ງຝ່າຍລາວນໍາພາຄະນະໂດຍທ່ານ ສະຫວັນຄອນ ຣາຊມຸນຕຣີ ປະທານສະມາຄົມນັກຂ່າວແຫ່ງ ສປປ ລາວ ແລະຝ່າຍໄທນໍາພາຄະນະໂດຍ ທ່ານ ມົງຄົນ ບາງປຣະພາ ນາຍົກສະມາຄົມນັກຂ່າວນັກໜັງສືພິມແຫ່ງປະເທດໄທ.

ກອງປະຊຸມພົບປະໃນຄັ້ງນີ້, ຜູ້ຕາງໜ້າຂອງທັງສອງສະມາຄົມ ກໍໄດ້ມີການແລກປ່ຽນຮຽນຮູ້ ແລະ ປຶກສາຫາລືກ່ຽວກັບສະຖານະການຂອງສື່ມວນຊົນ ແລະ ການລາຍງານຂ່າວຂອງທັງສອງປະເທດ ລວມເຖິງກິດຈະກໍາທີ່ຈະປະຕິບັດຮ່ວມກັນໃນໄລຍະເວລາສອງປີຂ້າງໜ້າ; ໂດຍຜູ້ຕາງໜ້າຂອງທັງສອງສະມາຄົມ ກໍໄດ້ສະແດງເຖິງມິດຕະພາບ ແລະ ຄວາມສໍາພັນທີ່ດີຕໍ່ກັນ ຊຶ່ງເຕັມໄປດ້ວຍຄວາມສາມັກຄີ, ຄວາມສະເໝີພາບ, ຄວາມເຄົາລົບເຊິ່ງກັນ ແລະ ກັນ ແລະ ຄວາມເຂົ້າໃຈກັນ. ໂດຍຕ່າງຝ່າຍໄດ້ຄໍານຶງເຖິງຜົນປະໂຫຍດຂອງທັງສອງປະເທດ ທີ່ຈະໄດ້ຮັບ​ຫຼາຍທີ່ສຸດຮ່ວມກັນ; ດ້ວຍເຫດນັ້ນ, ຜູ້ຕາງໜ້າຂອງສະມາຄົມ ຈິ່ງໄດ້ເຮັດບົດບັນທຶກຄວາມເຂົ້າໃຈຮ່ວມກັນ ເພື່ອຮັດແໜ້ນ, ສົ່ງເສີມ ແລະ ເສີມຂະຫຍາຍຄວາມສໍາພັນທີ່ດີຕໍ່ກັນ, ເພື່ອຢືນຢັນວ່າທັງສອງສະມາຄົມ ຈະມີການຮ່ວມມືກັນໃນການຈັດຕັ້ງປະຕິບັດ ນັບແຕ່ວັນທີ 1 ກຸມພາ 2022 ຫາ ວັນທີ 31 ທັນວາ 2023.

ກອງປະຊຸມຄັ້ງນີ້, ຍັງໄດ້ບັນລຸການເຊັນບົດບັນທຶກຄວາມເຂົ້າໃຈ ໂດຍສະມາຄົມນັກຂ່າວແຫ່ງ ສປປ ລາວ ແລະ ສະມາຄົມນັກຂ່າວ ນັກໜັງສືພິມແຫ່ງປະເທດໄທ, ໄດ້ມີການແລກປ່ຽນຂໍ້ມູນສະຖານະການ, ການເຄື່ອນໄຫວຫຼ້າສຸດຂອງທັງສອງສະມາຄົມ ແລະ ຕິດຕາມຄວາມຄືບໜ້າຂອງກິດຈະກໍາຕ່າງໆ ທີ່ໄດ້ຮ່ວມກັນລົງນາມໃນບົດບັນທຶກຄວາມເຂົ້າໃຈໃນໂອກາດການພົບປະກັນເມື່ອຄັ້ງທີ່ຜ່ານມາ (ວັນທີ 11 ພະຈິກ 2021) ຜ່ານລະບົບສື່ອີເລັກໂທຣນິຄ; ໂດຍສອງສະມາຄົມນັກຂ່າວຍັງຄົງຢືນຢັນທີ່ຈະພັດທະນາ, ຮ່ວມມື, ປະສານຄວາມຮ່ວມມືດ້ານການຝຶກອົບຮົມ ແລະການສໍາມະນາ ເພື່ອຖອດຖອນບົດຮຽນຮ່ວມກັນກ່ຽວກັບສື່ໃໝ່ (NEW MEDIA) ລວມເຖິງຂໍ້ມູນດ້ານເທຄໂນໂລຢີແຫ່ງຂໍ້ມູນຂ່າວສານ (IT) ໃນລະດັບຜູ້ບໍລິຫານອົງການສື່ມວນຊົນ.

ຂອບໃຈຂໍ້ມູນຈາກ: ສະມາຄົມນັກຂ່າວແຫ່ງ ສປປ ລາວ

แชร์