ໄຟຟ້າລາວ ເຜີຍປັດໄຈສຳຄັນດັນລາຄາຕົ້ນທຶນຜະລິດສູງ

ຖືເປັນປະເດັນທີ່ສັງຄົມວົງກວ້າງໃຫ້ຄວາມສົນໃຈເປັນຢ່າງຍິ່ງ, ຕໍ່ການດຳເນີນທຸລະກິດຂອງລັດວິສາຫະກິດໄຟຟ້າລາວຊຶ່ງມີຂ່າວອອກຫຼາຍແງ່ຫຼາຍມູມ. ຫຼ້າສຸດ, ໃນກອງປະຊຸມກ່ຽວກັບການດຳເນີນທຸລະກິດໄຟຟ້າລາວຢູ່ແຂວງຈຳປາສັກ, ໂດຍການເຂົ້າຮ່ວມຂອງ ທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງຈຳປາສັກ, ທ່ານ ຈັນທະບູນ ສຸກອາລຸນ ຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ແລະນັກວິຊາການຂອງພະແນກການອ້ອມຂ້າງແຂວງ, ພ້ອມດ້ວຍພະນັກງານກ່ຽວຂ້ອງ. ຊຶ່ງກອງປະຊຸມໄດ້ພ້ອມກັນຕີລາຄາດ້ານດີ ແລະຂໍ້ຄົງຄ້າງ, ໂດຍທ່ານຜູ້ອໍານວຍການໃຫຍ່ໄຟຟ້າລາວ, ກໍໄດ້ຍົກໃຫ້ເຫັນພາລະແບກຫາບຈາກຕົ້ນທຶນການຜະລິດທີ່ລັດວິສາຫະກິດໄຟຟ້າລາວກຳລັງຜະເຊີນຢູ່ໃນຂະນະນີ້.

ໃນວະລະດຳເນີນກອງປະຊຸມຊຶ່ງຈັດຂຶ້ນເມື່ອວັນທີ 21 ກຸມພາ 2022, ໂດຍທ່ານ ຈັນທະບູນ ສຸກອາລຸນ ໄດ້ກ່າວວ່າ: ໃນການສ້າງອຸດສາຫະກຳໄຟຟ້າ ໃຫ້ເປັນຂະແໜງການຫຼັກເພື່ອຊຸກຍູ້ການພັດທະນາເສດຖະກິດ-ສັງຄົມ ແລະ ສ້າງລາຍຮັບໃຫ້ແກ່ປະເທດ, ທັງສົ່ງເສີມຂະແໜງການປິ່ນອ້ອມເພື່ອສ້າງວຽກເຮັດງານທຳໃຫ້ປະຊາຊົນລາວບັນດາເຜົ່າ ແລະ ສ້າງເງື່ອນໄຂໃຫ້ສັງຄົມລາວໄດ້ຊົມໃຊ້ໄຟຟ້າໃນລາຄາທີ່ສົມເຫດສົມຜົນ. ທັງນີ້, ຖືເປັນພາລະໜ້າທີ່ອັນໜັກໜ່ວງຂອງລັດວິສາຫະກິດໄຟຟ້າລາວ ແລະ ຈຳເປັນຕ້ອງໃຊ້ທຶນຮອນອັນມະຫາສານ ເຂົ້າໃນການພັດທະນາລະບົບໂຄງລ່າງພື້ນຖານ ນັບຕັ້ງແຕ່ການລົງທຶນກໍ່ສ້າງແຫຼ່ງຜະລິດ, ການກໍ່ສ້າງສາຍສົ່ງ-ສະຖານີໄຟຟ້າແຮງສູງ, ກໍ່ສ້າງຕາຂ່າຍໄຟຟ້າແຮງກາງ ແລະ ແຮງຕໍ່າ, ໄປຈົນຮອດໝໍ້ນັບໄຟທີ່ຕິດຕັ້ງຢູ່ຕາມຄົວເຮືອນຂອງປະຊາຊົນ.

ຢ່າງໃດກໍດີ, ລັດວິສາຫະກິດໄຟຟ້າລາວກໍຖືເປັນວິສາຫະກິດຍຸດທະສາດຂອງປະເທດພາຍໃຕ້ການຄຸ້ມຄອງດ້ານເທຄນິຄ-ວິຊາການ ໂດຍກະຊວງພະລັງງານ ແລະບໍ່ແຮ່, ຊຶ່ງໄຟຟ້າລາວ ຖືເປັນວິສາຫະກິດທີ່ມີປະຫວັດຍາວນານ, ເຕີບໂຕຄຽງຄູ່ກັບການຂະຫຍາຍຕົວຂອງປະເທດຊາດນັບແຕ່ສະໄໝກ່ອນປົດປ່ອຍເຖິງປັດຈຸບັນ. ດັ່ງນັ້ນ, ຈິ່ງເວົ້າໄດ້ວ່າເປັນວິສາຫະກິດທີ່ມີມູນຄ່າຊັບສິນສູງທີ່ສຸດໃນປະເທດ ແລະປະຕິບັດຍຸດທະສາດທີ່ພັກ-ລັດ ມອບໝາຍໃຫ້,ໂດຍສະເພາະແມ່ນຮັບປະກັນໃຫ້ແກ່ການສະໜອງໄຟຟ້າແກ່ປະຊາຊົນລາວບັນດາເຜົ່າໃຫ້ມີໄຟຟ້າໃຊ້ໄດ້ຢ່າງພຽງພໍ ແລະ ທົ່ວເຖິງ ຕາມທິດທາງນະໂຍບາຍທີ່ລັດຖະບານກຳນົດໄວ້. ຊຶ່ງມາຮອດປັດຈຸບັນ, ປະຊາຊົນລາວສາມາດນໍາໃຊ້ໄຟຟ້າໄດ້ແລ້ວເຖິງ 95% ຂອງຈໍານວນຄົວເຮືອນທັງໝົດທົ່ວປະເທດ.

แชร์