ປະຫວັດສາດໜ້າໃໝ່! U23 ລາວ ຜ່ານເຂົ້າຮອບຮອງຊະນະເລີດ ເຕະບານຊີງ​ແຊມປ໌​ອາຊຽນ

ທີມຊາດລາວ U23 ສ້າງປະຫວັດສາດໜ້າໃໝ່ໃຫ້ວົງການເຕະບານ, ໂດຍການເອົາຊະນະ ທີມຊາດມາເລເຊຍ 2-0 ປະຕູ ເມື່ອວັນທີ 21 ກຸມພາ 2022, ລວມຜົນ 2 ນັດ ທີມຊາດລາວ ຊະນະ ມາເລເຊຍ 4-1 ຜ່ານເຂົ້າສູ່ຮອບຮອງຊະນະເລີດການ​ແຂ່ງ​ຂັນ​ບານ​ເຕະຊາຍຊີງ​ແຊມ​ປ໌ອາ​ຊຽນ ຮຸ່ນ​ອາ​ຍຸ​ບໍ່​ເກີນ 23 ປິ ປະ​ຈຳ​ປີ 2022.
 
ການເອົາຊະນະ ທີມຊາດມາເລເຊຍ 2-0 ໃນນັດນີ້, ແມ່ນໄດ້ປະຕູຈາກຟຣີຄິກສຸດງາມຂອງ ບຸນພະຈັນ ບຸນກອງ ໃນນາທີ 43 ແລະ ສຸກສາຄອນ ບົວໄພວັນ ໃນນາທີ 86, ລວມຜົນ 2 ນັດ ທີມຊາດລາວ ຊະນະ ທີມຊາດມາເລເຊຍ 4-1. ຈາກໄຊຊະນະທັງ 2 ນັດດັ່ງກ່າວ, ສົ່ງຜົນໃຫ້ທີມຊາດລາວ ຜ່ານເຂົ້າຮອບຮອບຊະນະເລີດ, ລໍຖ້າພົບກັບທີມອັນດັບ 2 ທີ່ມີຄະແນນດີທີ່ສຸດຂອງ ກຸ່ມເອ ຫຼື ກຸ່ມຊີ. ຊຶ່ງຮອບຮອງຊະນະເລີດ ຈະມີຂຶ້ນໃນວັນທີ 24 ກຸມພາ 2022 ເວລາ 16:00 ໂມງ, ທີ່ສະໜາມ Morodok Techo National Stadium.
 
ຢ່າງໃດກໍດີ, ຜົນງານຂອງທີມຊາດລາວ ຮຸ່ນອາຍຸບໍ່ເກີນ 23 ປີ ໃນຄັ້ງນີ້, ກໍຖືເປັນການຂຽນປະຫວັດສາດໜ້າໃໝ່ໃຫ້ວົງການກີລາເຕະບານຂອງ ສປປ ລາວ. ທັງນີ້, ກໍຂໍເຊີນຊາວລາວທົ່ວປະເທດ ສົ່ງແຮງເຊຍແຮງໃຈໄປໃຫ້ຄະນະນຳ, ຄະນະຄູຝຶກ ແລະນັກກີລາເຕະບານທີມຊາດລາວ U23 ໃນການສູ້ເສິກລະດັບພູມີພາກຊຶ່ງທີ່ກຳລັງເປີດສາກຂຶ້ນທີ່ປະເທດກຳປູເຈຍ.

แชร์