ເສີມຂະບວນລົດໄຟທໍາມະດາ ແລະ ເປີດຂົນສົ່ງສິນຄ້າສະຖານີຫຼວງພຣະບາງ
ເມື່ອວັນທີ 18 ກຸມພາ 2022, ຂະບວນລົດໄຟທໍາມະດາ ໄດ້ເດີນທາງມາຮອດສະຖານີນະ ຄອນຫຼວງວຽງຈັນ, ເພື່ອຮອງຮັບຈໍານວນຜູ້ໂດຍສານທີ່ນັບມື້ເພີ່ມຂຶ້ນຢ່າງຫຼວງຫຼາຍໂດຍສະເພາະກໍແມ່ນວັນເສົາ ກັບ ວັນອາທິດ ແລະໃນມື້ອື່ນນີ້, ສະຖານີຫຼວງພຣະບາງກໍຈະເປີດບໍລິການດຳເນີນທຸລະກຳຂົນສົ່ງສິນຄ້າເພື່ອເພີ່ມປະສິດທິພາບໃນດ້ານເຄື່ອນຍ້າຍສິນຄ້າໃຫ້ວ່ອງໄວທັນການ.
ໂດຍທ່ານ ວົງທອງ ສຸວັນທອງ ຮອງວິສະວະກໍາເອກ ບໍລິສັດລົດທາງໄຟລາວ-ຈີນ, ໄດ້ລະບຸວ່າ: ບໍລິສັດລົດໄຟ ມີແຜນຈະເປີດນໍາໃຊ້ລົດໄຟໂດຍສານຂະບວນທໍາມະດາທີ່ມີຄວາມໄວ 120 ກິໂລແມັດຕໍ່ຊົ່ວໂມງ ໃນເດືອນມີນາ 2022, ຊຶ່ງລາຄາປີ້ໂດຍສານຈະຖືກກວ່າລາຄາລົດໄຟຄວາມໄວສູງທີ່ພວມແລ່ນຢູ່ໃນປັດຈຸບັນ 30%.
ນອກນັ້ນ, ລົດໄຟລາວ-ຈີນ ຍັງມີແຜນຈະເພີ່ມຂະບວນໃຫ້ຫຼາຍຂຶ້ນເພື່ອໃຫ້ລູກຄ້າສາມາດເດີນທາງດ້ວຍລົດໄຟຕາມຈຸດຕ່າງໆຢ່າງສະດວກສະບາຍ. ຊຶ່ງເລີ່ມແຕ່ເປີດບໍລິການຂົນສົ່ງທາງລົດ ໄຟໃນທ້າຍປີ 2021 ເປັນຕົ້ນມາ, ບໍລິສັດລົດໄຟໄດ້ສ້າງວຽກເຮັດງານທໍາແກ່ແຮງງານລາວເປັນຈຳນວນຫຼວງຫຼາຍ, ຊຶ່ງໃນຈຳນວນພະນັກງານທັງໝົດ 1.206 ຄົນ, ໃນນັ້ນ ເປັນພະນັກງານລາວ 675 ຄົນ. ສ່ວນຢູ່ສໍານັກງານໃຫຍ່ຂອງບໍລິສັດມີ 81 ຄົນ, ເປັນຄົນລາວ 35 ຄົນ. ສຳລັບຕໍາແໜ່ງການຜະລິດ ແລະ ຂົນສົ່ງມີ 640 ຄົນ, ຊຶ່ງເປັນພະນັກງານລາວທັງໝົດທີ່ປະຈຳຢູ່ສູນຄຸ້ມຄອງ ແລະ ດໍາເນີນການ ນະຄອນຫຼວງວຽງຈັນ 563 ຄົນ ແລະ ຢູ່ສູນຄຸ້ມຄອງ ແລະບໍາລຸງຮັກສາ ຫຼວງພຣະບາງ 77 ຄົນ.
ພ້ອມນີ້, ບໍລິສັດທາງລົດໄຟລາວ-ຈີນ ກໍໃຫ້ຮູ້ວ່າ: ຈະເປີດໃຫ້ບໍລິການດຳເນີນທຸລະກຳຂົນສົ່ງສິນຄ້າ ຢູ່ສະຖານີຫຼວງພຣະບາງຢ່າງເປັນທາງການ ໃນວັນທີ 22 ກຸມພານີ້. ຊຶ່ງສະຖານີຫຼວງພຣະບາງ, ຕັ້ງຢູ່ພາກກາງຂອງແລວທາງລົດໄຟ ລາວ-ຈີນ, ເປັນສະຖານີຂົນສົ່ງໂດຍສານ ແລະ ຂົນສົ່ງສິນຄ້າທີ່ສຳຄັນຂອງເສັ້ນທາງລົດໄຟລາວ-ຈີນ. ສະຖານີດັ່ງກ່າວກວມເນື້ອທີ່ 156 ເຮັກຕາ, ມີເສັ້ນທາງລົດໄຟເຂົ້າ-ອອກ 4 ສາຍ; ໃນນັ້ນ, ເສັ້ນທາງຂົນສົ່ງສິນຄ້າ 2 ສາຍ, ເນື້ອທີ່ອາຄານສະຖານີກວມເອົາ 8 ພັນຕາແມັດ ແລະ ພື້ນທີ່ຂອງລານຂົນສົ່ງສິນຄ້າແມ່ນມີປະມານ 50 ພັນຕາແມັດ. ການຂົນສົ່ງສິນຄ້າຂອງສະຖານີຫຼວງພຣະບາງ ຫຼັກໆແມ່ນການຂົນສົ່ງສິນຄ້າຂາເຂົ້າ-ຂາອອກ ໂດຍມີເສັ້ນທາງຂົນສົ່ງສິນຄ້າ 2 ສາຍ, ຊຶ່ງໃນການເຮັດວຽກຄັ້ງໜຶ່ງຂອງເສັ້ນທາງຂົນສົ່ງສິນຄ້າທີ 1 ສາມາດຮອງຮັບ ແລະ ຂັບເຄື່ອນໄດ້ 25 ຕູ້ຄອນເທນເນີຣ໌, ເສັ້ນທາງຂົນສົ່ງສິນຄ້າທີ 2 ເຮັດວຽກເທື່ອໜຶ່ງໄດ້ 26 ຕູ້ຄອນເທນເນີຣ໌, ລານບັນຈຸຕູ້ຄອນເທນເນີຣ໌ສະຖານີຫຼວງພຣະບາງ ສາມາດບັນຈຸ ໄດ້ 1.568 ຕູ້. ຊຶ່ງໃນໄລຍະເລີ່ມຕົ້ນການຂົນສົ່ງນີ້, ສິນຄ້າຂາອອກຕົ້ນຕໍແມ່ນໂລຫະ, ແຮ່ ແລະ ຊີມັງ. ສ່ວນສິນຄ້າຂາເຂົ້າສ່ວນໃຫຍ່ແມ່ນຖ່ານຫີນ ແລະ ສິນຄ້າທົ່ວໄປ. ການເປີດທຸລະກຳຂົນສົ່ງສິນຄ້າຢູ່ສະຖານີຫຼວງພຣະບາງ ຈະເຮັດໃຫ້ເວລາສົ່ງອອກສິນຄ້າສັ້ນລົງ, ເຊັ່ນການສົ່ງອອກແປ້ງມັນຕົ້ນ, ແຮ່ເຫຼັກ ແລະ ອື່ນໆ ຊຶ່ງຈະຊ່ວຍໃຫ້ການຂົນສົ່ງສິນຄ້າມີຄວາມເຂັ້ມແຂງຫຼາຍຂຶ້ນ.
ນັບແຕ່ເລີ່ມເປີດການຂົນສົ່ງຜູ້ໂດຍສານມາແຕ່ວັນທີ 4 ທັນວາ 2021 ເຖິງວັນທີ 13 ເດືອນກຸມພາ 2022, ຂະບວນລົດໄຟຂົນສົ່ງຜູ້ໂດຍສານໄດ້ແລ່ນທັງໝົດ 128 ຄູ່, ຂົນສົ່ງຜູ້ໂດຍສານໄດ້ 124.225 ເທື່ອຄົນ, ສະເລ່ຍ 1.721 ຄົນຕໍ່ວັນ, ການຂົນສົ່ງຜູ້ໂດຍສານສູງສຸດຕໍ່ວັນແມ່ນ 2.804 ຄົນ. ສ່ວນຂະບວນລົດໄຟຂົນສົ່ງສິນຄ້າ ໄດ້ແລ່ນທັງໝົດ 145 ຄູ່ ຫຼື 290 ຖ້ຽວ, ຈໍານວນສິນຄ້າສະສົມທີ່ຂົນສົ່ງແມ່ນ 157.568 ໂຕນ, ສະເລ່ຍສິນຄ້າທີ່ຂົນສົ່ງຕໍ່ວັນແມ່ນ 2.188 ໂຕນ, ຂົນສົ່ງສິນຄ້າສູງສຸດຕໍ່ວັນແມ່ນ 6.748 ໂຕນ. ສ່ວນສະຖານີຂົນສົ່ງສົ່ງສິນຄ້າທີ່ເປີດບໍລິການແລ້ວມີ ສະຖານີວຽງຈັນໃຕ້, ສະຖານີນາເຕີຍ, ສະຖານີວັງວຽງ ແລະ ສະຖານີຫຼວງພຣະບາງ.
