ໄຂກອງປະຊຸມລັດຖະບານ ສະໄໝສາມັນປະຈຳເດືອນກຸມພາ

​ກອງປະຊຸມລັດຖະບານ ສະໄໝສາມັນປະຈຳເດືອນກຸມພາ 2022 ໄດ້ໄຂຂຶ້ນຢ່າງເປັນທາງການໃນຕອນເຊົ້າມື້ນີ້ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງ ທ່ານ ພັນຄຳ ວິພາວັນ ນາຍົກລັດຖະມົນຕີ, ມີບັນດາຮອງນາຍົກລັດຖະມົນຕີ ແລະສະມາຊິກລັດຖະບານ ເຂົ້າຮ່ວມຢ່າງພ້ອມພຽງ, ຊຶ່ງວາລະປະຊຸມຈະດຳເນີນເປັນເວລາ 2 ວັນ (ວັນທີ 21-22 ກຸມພາ). 

ກອງປະຊຸມຄັ້ງນີ້ ຈະໄດ້ຄົ້ນຄວ້າ, ປະກອບຄໍາຄິດເຫັນເພື່ອພິຈາລະນາຮັບຮອງເອກະສານສຳຄັນຈຳນວນໜຶ່ງເຊັ່ນ: ສະຫຼຸບການປະຕິບັດວຽກງານຈຸດສຸມ ປະຈຳເດືອນກຸມພາ ແລະທິດທາງແຜນວຽກຈຸດສຸມ ປະຈຳເດືອນມີນາ 2022 ຂອງລັດຖະບານ; ລາຍງານກ່ຽວກັບການຄົ້ນຄ້ວາສ້າງແຜນການລົງທຶນຂອງລັດ ປະຈຳປີ 2022; ຮ່າງກົດໝາຍວ່າດ້ວຍການສົ່ງເສີມວິສາຫະກິດຂະໜາດນ້ອຍ ແລະ ຂະໜາດກາງ (ສະບັບປັບປຸງ); ຮ່າງດຳລັດວ່າດ້ວຍການຄຸ້ມຄອງການຄ້າຂາຍຊະນິດພັນສັດນໍ້າ, ສັດປ່າ ແລະພືດປ່າທີ່ໃກ້ຈະສູນພັນລະຫວ່າງຊາດ; ຮ່າງດຳລັດວ່າດ້ວຍສະຖາບັນການເງິນຈຸລະພາກ (ສະບັບປັບປຸງ); ຮ່າງຍຸດທະສາດການພັດທະນາຕະຫຼາດທຶນຂອງ ສປປ ລາວ 10 ປີ (2021-2030) ແລະວິໄສທັດຮອດປີ 2035 (ສະບັບປັບປຸງ); ຮ່າງຍຸດທະສາດການພັດທະ ນາການບິນພົນລະເຮືອນ 2021-2025 ແລະ ວິໄສທັດຮອດປີ 2030; ການສ້າງລະບົບຄຸ້ມຄອງຕົວຕົນທາງດິຈີຕອລ (DIGITAL ID) ແລະ ຮ່າງແຜນຄຸ້ມຄອງອ່າງຮັບນໍ້າ, ນໍ້າອູ, ນໍ້າງື່ມ ແລະ ນໍ້າເທິນ-ນໍ້າກະດິງ.

ຢ່າງໃດກໍດີ, ໃນເດືອນກຸມພານີ້ ກໍມີຫຼາຍເຫດການສໍາຄັນທີ່ພົ້ນເດັ່ນຢູ່ປະເທດເຮົາ. ໃນນັ້ນລັດຖະບານໄດ້ແຕ່ງຕັ້ງ, ຍົກຍ້າຍ ແລະສັບປ່ຽນຄວາມຮັບຜິດຊອບຂອງສະມາຊິກລັດຖະບານ ແລະພະນັກງານຂອງບັນດາກະຊວງຈຳນວນໜຶ່ງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່. ສຳລັບການພັດທະນາເສດຖະກິດ-ສັງຄົມພາຍໃນປະເທດ, ເຖິງວ່າພະຍາດໂຄວິດ-19ຍັງລະບາດໃນຊຸມຊົນ; ແຕ່ພາຍຫຼັງທີ່ມີການເປີດນໍາໃຊ້ເສັ້ນທາງລົດໄຟລາວ- ຈີນ ຕັ້ງແຕ່ຕົ້ນເດືອນທັນວາ 2021 ເປັນຕົ້ນມາ, ບັນຍາກາດການລົງທຶນ ແລະ ການຟື້ນຟູເສດຖະກິດ ກໍມີທ່າອ່ຽງທີ່ດີຂຶ້ນຢ່າງຕັ້ງໜ້າ; ຂະນະທີ່ການແກ້ໄຂບັນຫາປິ່ນອ້ອມການຈັດຕັ້ງປະຕິບັດ 2 ວາລະແຫ່ງຊາດ, ເປັນຕົ້ນແມ່ນການແກ້ໄຂບັນຫາຂັ້ນຂອດທີ່ເປັນອຸປະສັກຕໍ່ການລົງທຶນ ແລະ ການແກ້ໄຂບັນຫາອື່ນໆ, ລວມເຖິງການກໍານົດມາດຕະການໃນການປ້ອງກັນ, ຄວບຄຸມ ແລະ ສະກັດກັ້ນການລະບາດຂອງພະຍາດໂຄວິດ-19 ກໍຖືເປັນໜ້າວຽກບຸລິມະສິດທີ່ລັດຖະບານ ແຫ່ງ ສປປ ລາວ ຈະໄດ້ບຸກບືນສູ້ຊົນເພື່ອເຮັດໃຫ້ການພັດທະນາເສດຖະກິດ-ສັງຄົມ ມີທ່າກ້າວຂະຫຍາຍຕົວດີຂຶ້ນນັບມື້.  

ຂອບໃຈຂໍ້ມູນຈາກ: ກົມປະຊາສຳພັນ ຫສນຍ.

แชร์