ຝົນແຮງຊຸຂົວນໍ້າຊອງພັງ ຢໍ້າສະຕິຕໍ່ແຈ້ງເຕືອນສະພາບອາກາດ

ຝົນຕົກໜັກກວມຫຼາຍພາກຂອງປະເທດນັບແຕ່ວັນທີ 18-20 ກຸມພາ 2022 ເຮັດໃຫ້ເກີດສະພາບນ້ຳນອງ ແລະ ດິນເຈື່ອນຫຼາຍຈຸດ. ຊຶ່ງກ່ອນຈະເກີດສະພາບດັ່ງກ່າວ, ກົມອຸຕຸນິຍົມແລະ ອຸທົກກະສາດ ກໍມີປະກາດແຈ້ງເຕືອນໃຫ້ປະຊາຊົນຈົ່ງລະວັງ ແລະ ກຽມພ້ອມຮັບມື;ຢ່າງໃດກໍຕາມ, ບາງກຸ່ມຄົນກໍບໍ່ສົນໃຈໃນຄຳແຈ້ງເຕືອນ ແລະ ເຄື່ອນໄຫວເຮັດກິດຈະກຳຕ່າງໆທ່າມກາງຄວາມສ່ຽງດ້ານສະພາບອາກາດ ແລະ ຫຼາຍຄົນກໍໄດ້ແຊຣ໌ພາບຄວາມເສຍຫາຍຂອງຂົວໄມ້ໃນລະນ້ຳຊອງ ເມືອງວັງວຽງ ແຂວງວຽງຈັນ ທີ່ບໍ່ສາມາດຕ້ານຢັນກະແສນ້ຳຊຸ. ເຖິງຈະຍັງບໍ່ມີລາຍງານການບາດເຈັບ ແລະ ເສຍຊີວິດ, ແຕ່ນີ້ກໍຄືພາບສະທ້ອນທີ່ຮຽກຮ້ອງເຖິງສະຕິລະວັງຕົວທີ່ຫຼາຍຄົນຄວນເອົາໃຈໃສ່ຕື່ມ.

ຫວນຄືນເມື່ອວັນທີ 17 ກຸມພາ2022, ກົມອຸຕຸນິຍົມ ແລະ ອຸທົກກະສາດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ກໍໄດ້ເຜີຍແຜ່ໜັງສືແຈ້ງເຕືອນສະບັບເລກທີ0232/ກອຕທ ກ່ຽວກັບສະພາບອາກາດ, ໂດຍຄາດວ່າຈະມີຝົນຕົກໜັກໃນລະຫວ່າງວັນທີ18 ຫາ21 ກຸມພາ 2022 ກວມພື້ນທີ່ຫຼາຍແຫ່ງຂອງແຂວງຜົ້ງສາລີ, ຫົວພັນ, ຊຽງຂວາງ, ຫຼວງນ້ຳທາ, ບໍ່ແກ້ວ, ອຸດົມໄຊ, ຫຼວງພຣະບາງ, ໄຊຍະບູລີ, ໄຊສົມບູນ, ວຽງຈັນ, ນະຄອນຫຼວງວຽງຈັນ,ບໍລິຄຳໄຊ, ຄຳມ່ວນ ແລະ ສະຫວັນນະເຂດ.

ໃນແຈ້ງເຕືອນດັ່ງກ່າວ ລະບຸໃຫ້ລະວັງຟ້າເຫຼື້ອມ, ໝາກເຫັບຕົກ, ລົມພັດແຮງ. ພ້ອມຢ້ຳເຕືອນຜູ້ທີ່ຈະເດີນທາງໄປແຂວງພາກເໜືອໃຫ້ລະວັງສະພາບດິນເຈື່ອນທີ່ຈະເກີດຂຶ້ນຈາກຝົນຕົກໜັກຕໍ່ກັນຫຼາຍວັນ.

ອີງໃສ່ແຈ້ງການສະບັບນີ້, ໄດ້ສະທ້ອນໃຫ້ເຫັນວ່າ: ອຳນາດການປົກຄອງທ້ອງຖິ່ນໃນເຂດທີ່ມີຄວາມສ່ຽງ, ຄວນຈະມີຄຳແນະນຳເພີ່ມເຕີມຕໍ່ປະຊາຊົນ, ຕໍ່ຜູ້ປະກອບການທຸລະກິດທ່ອງທ່ຽວ ເພື່ອໃຫ້ມີສະຕິລະວັງຕົວຕໍ່ສະພາບອາກາດ, ເພື່ອຫຼີກເວັ້ນຄວາມສ່ຽງ ແລະ ປ້ອງກັນອັນຕະລາຍຈາກໄພທຳມະຊາດທີ່ລັດຖະບານໄດ້ມີປະກາດເຕືອນເພື່ອຫຼຸດຜ່ອນຄວາມສູນເສຍ, ຊຶ່ງທຸກຄົນໃນທົ່ວສັງຄົມຕ້ອງມີສ່ວນຮ່ວມໂດຍບໍ່ຖືເບົາຕໍ່ແຈ້ງເຕືອນເລື່ອງສະພາບອາກາດ.

• 21/02/2022