7 ກໍລະກົດ ກຳນົດເປີດເຂດທ່ອງທ່ຽວສີຂຽວທົ່ວປະເທດ

​ລັດຖະບານ ແຫ່ງ ສປປ ລາວ, ກຳລັງເລັ່ງກຽມຄວາມພ້ອມເພື່ອຕ້ອນຮັບນັກທ່ອງທ່ຽວເຂົ້າມາໃນເຂດທ່ອງທ່ຽວສີຂຽວຊຶ່ງໄດ້ເລີ່ມໄລຍະທີ 1 ມາແຕ່ວັນທີ 1 ມັງກອນ ຫາ 30 ມີນາ 2022 ແລະ ຈະເປີດໄລຍະທີ 2 ໃນຕົ້ນເດືອນເມສາ ຫາທ້າຍມິຖຸນາ, ຫຼັງຈາກນັ້ນຄືນັບແຕ່ວັນທີ 1 ກໍລະກົດເປັນຕົ້ນໄປ ກໍຈະແມ່ນໄລຍະທີ 3 ຊຶ່ງເປັນການເປີດທົ່ວປະເທດ.

​ທັງນີ້, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ກໍໄດ້ມີຄຳແນະນຳສະບັບເລກທີ 61/ຖວທ, ລົງວັນທີ 16 ກຸມພາ 2022 ກ່ຽວກັບ 15 ຂໍ້ແນະນຳເລື່ອງການຈັດຕັ້ງປະຕິບັດແຜນເປີດຕ້ອນຮັບນັກທ່ອງທ່ຽວເຂົ້າມາ ສປປ ລາວ ໃນເຂດທ່ອງທ່ຽວສີຂຽວ.

​ຄຳແນະນຳຫຼັກໆແມ່ນເນັ້ນໃຫ້ປະຊາຊົນໃນແຂວງທີ່ກຳນົດເປັນເຂດທ່ອງທ່ຽວສີຂຽວຕ້ອງສັກວັຄຊີນຄົບໂດສໄດ້ຫຼາຍກວ່າ 70%, ສ່ວນນັກທ່ອງທ່ຽວທີ່ມີຈຸດປະສົງເຂົ້າມາ ສປປ ລາວ ກໍຕ້ອງສັກວັຄຊີນຄົບໂດສ, ມີປະກັນໄພຊີວິດ/ປະກັນໄພໂຄວິດ, ມີການຢັ້ງຢືນກວດຫາເຊືອດ້ວຍລະບົບ RT-PCR ທີ່ໃຫ້ຜົນເປັນລົບບໍ່ເກີນ 72 ຊົ່ວໂມງກ່ອນມາເຖິງ ສປປ ລາວ ແລະ ຕ້ອງຈຳກັດບໍລິເວນອີກ 48 ຊົ່ວໂມງ (2 ວັນ) ຖ້າຜົນກວດເປັນລົບກໍສາມາດທ່ອງທ່ຽວໄດ້.

​ສຳລັບບໍລິສັດທ່ອງທ່ຽວຢູ່ ສປປ ລາວ ທີ່ມີຈຸດປະສົງນຳເຂົ້ານັກທ່ອງທ່ຽວ, ຕ້ອງກຽມສຳນວນເອກະສານຂໍອະນຸຍາດເຊັ່ນ: ໜັງສືສະເໜີຂອງບໍລິສັດ, ສຳເນົາໜັງສືເດີນທາງ, ໃບຈອງໂຮງແຮມ, ລາຍການທ່ອງທ່ຽວ, ສຳເນົາໃບຢັ້ງຢືນສັກວັຄຊີນ ແລະສຳເນົາເອກະສາປະກັນໄພທີ່ມີວົງເງິນບໍ່ຫຼຸດ 50 ພັນໂດລາສະຫະລັດ; ຍື່ນສຳເນົາເອກະສານທັງໝົດໃຫ້ພະແນກ ຖວທ ແຂວງ/ນະຄອນຫຼວງວຽງຈັນ, ຫຼັງຈາກກວດກາເອກະສານຄົບຖ້ວນແລ້ວຈິ່ງສົ່ງໃຫ້ພາກສ່ວນຕຳຫຼວດທ່ອງທ່ຽວເພື່ອອະນຸມັດ; ຈາກນັ້ນໃຫ້ຍື່ນກົມກົງສຸນ, ສະຖານກົງສຸນ ຫຼືໜ່ວຍງານວີຊາກັບດ່ານຕາມການແນະນຳຂອງກະຊວງການຕ່າງປະເທດເພື່ອອະນຸມັດວີຊາເຂົ້າປະເທດເປັນຂັ້ນຕອນສຸດທ້າຍ.

​ກໍລະນີຫາກພົບນັກທ່ອງທ່ຽວບໍ່ສະບາຍ, ມີອາການຄ້າຍຄືຕິດເຊື້ອ, ຈະບໍ່ອະນຸຍາດໃຫ້ສືບຕໍ່ທ່ອງທ່ຽວຕາມແຜນທີ່ຍັງເຫຼືອ, ໃຫ້ຈຳກັດຕົນເອງຢູ່ຫ້ອງນອນຈົນກວ່າແພດຈະມາກວດສຸຂະພາບ ແລະເກັບຕົວຢ່າງ, ຖ້າຜົນກວດອອກມາເປັນບວກ ແມ່ນຈະຖືກນໍາສົ່ງໄປປິ່ນປົວຢູ່ໂຮງໝໍລັດ ຫຼືໂຮງໝໍເອກະຊົນທີ່ຖືກຮັບຮອງຕາມອາການໜັກ ຫຼືເບົາຂອງຄົນເຈັບ. ສ່ວນຄ່າໃຊ້ຈ່າຍທັງໝົດແມ່ນໃຫ້ບໍລິສັດປະກັນໄພໂຄວິດ-19 ຮັບຜິດຊອບ, ຊຶ່ງທາງສະມາຄົມປະກັນໄພຈະຕ້ອງເຮັດສັນຍາກັບໂຮງໝໍນັ້ນໆ.

​ຢ່າງໃດກໍດີ,ໃນໄລຍະນີ້ຊຶ່ງຖືເປັນກຳນົດເປີດເຂດທ່ອງທ່ຽວສີຂຽວໄລຍະທີ 1, ໂດຍມີນະຄອນຫຼວງວຽງຈັນ, ແຂວງຫຼວງພຣະບາງ ແລະເມືອງວັງວຽງ ແຂວງວຽງຈັນ; ສໍາລັບເສັ້ນທາງທ່ອງທ່ຽວສີຂຽວແມ່ນກຳນົດຢູ່ 5 ແຂວງ (ອຸດົມໄຊ, ໄຊຍະບູລີ, ຊຽງຂວາງ, ຄຳມ່ວນ ແລະ ຈຳປາສັກ); ສໍາລັບດ່ານສາກົນເຂົ້າ-ອອກ ມີສະໜາມບິນສາກົນວັດໄຕ ແລະດ່ານສາກົນຂົວມິດຕະພາບ 1 (ນະຄອນຫຼວງວຽງຈັນ-ໜອງຄາຍ). ສ່ວນໄລຍະທີ 2 ມີ 9 ແຂວງ (ນະຄອນຫຼວງວຽງຈັນ, ວຽງຈັນ, ຫຼວງພຣະບາງ, ອຸດົມໄຊ, ໄຊຍະບູລີ, ຊຽງຂວາງ, ຄຳມ່ວນ, ສະຫວັນນະເຂດ ແລະຈຳປາສັກ), ສໍາລັບເສັ້ນທາງທ່ອງທ່ຽວສີຂຽວ ແມ່ນໄດ້ກໍານົດຢູ່ 4 ແຂວງ (ເມືອງຫ້ວຍຊາຍ ແຂວງບໍ່ແກ້ວ, ຫຼວງນ້ຳທາ, ເຊກອງ ແລະສາລະວັນ); ສຳລັບດ່ານສາກົນເຂົ້າ-ອອກ ມີ 9 ດ່ານຄື: ສະໜາມບິນສາກົນວັດໄຕ, ສະໜາມບິນສາກົນຫຼວງພຣະບາງ, ດ່ານບໍ່ຫານ-ບໍ່ເຕັນ (ລາວ-ຈີນ), ຂົວມິດຕະພາບ 1  (ນະຄອນຫຼວງວຽງຈັນ-ໜອງຄາຍ),ຂົວມິດຕະພາບ (ທ່າແຂກ-ນະຄອນພະນົມ), ຂົວມິດຕະພາບ (ສະຫວັນນະເຂດ-ມຸກດາຫານ), ດ່ານຊ່ອງເມັກ (ປາກເຊ-ອຸບົນຣາຊທານີ), ດ່ານລາວບາວ (ລາວ-ຫວຽດນາມ) ແລະ ດ່ານຫຼັກຊາວ (ລາວ-ຫວຽດນາມ). ສຳລັບໄລຍະທີ 3 ແມ່ນຈະເປີດທົ່ວປະເທດ.

แชร์