ລາວ ໄດ້ຮັບວັຄຊີນ ແອສຕຣາເຊເນກາ ກວ່າ 5,9 ແສນໂດສ໌ ຈາກໂຄແວກຊ໌

ສປປ ລາວ ໄດ້ຮັບວັຄຊີນປ້ອງກັນພະຍາດໂຄວິດ-19 ຊະນິດ ແອສຣາເຊເນກາ (AstraZeneca/Oxford) ຈຳນວນ 594.000 ໂດສ໌ ຈາກໂຄງການ COVAX Facility ຊຶ່ງເປັນການຮ່ວມມືລະຫວ່າງ ອົງການພັນທະມິດຮ່ວມມືດ້ານນະວັດຕະກໍາ ເພື່ອຮັບມືກັບພະຍາດລະບາດ (CEPI), ອົງການກາວີ (Gavi) ແລະ ອົງການອະນາໄມໂລກ (WHO) ໂດຍມີ ອົງການຢູນິເຊຟ ເປັນຄູ່ຮ່ວມງານສຳຄັນໃນການຈັດສົ່ງ.

ການຈັດສົ່ງວັຄຊີນຊຶ່ງມາຮອດ ສປປ ລາວ ເມື່ອວັນທີ 18 ກຸມພາ 2022, ກໍເພື່ອຮັບປະກັນໃຫ້ແກ່ການເຂົ້າເຖິງວັຄຊີນປ້ອງກັນພະຍາດໂຄວິດ-19 ຢ່າງເທົ່າທຽມໃນທົ່ວໂລກ ເເລະ ເປັນການຈັດສົ່ງວັຄຊີນຊຸດທີ 10 ຈາກ COVAX ໃຫ້ເເກ່ ສປປ ລາວ, ຊຶ່ງເມື່ອບໍ່ດົນມານີ້ ທາງໂຄງການ ກໍໄດ້ມີການບໍລິຈາກວັຄຊີນ Pfizer BioNTech ປະມານ 1,7 ລ້ານໂດສ໌ ໃຫ້ເເກ່ ສປປ ລາວ ໂດຍຜ່ານໂຄງການ COVAX Facility ເຊັ່ນດຽວກັນ, ລວມຈຳນວນວັຄຊີນທີ່ໄດ້ຮັບຈາກໂຄງການ COVAX Facility ມາຮອດປັດຈຸບັນຈິ່ງນັບໄດ້ວ່າ ສປປ ລາວ ມີວັຄຊີນພຽງພໍທີ່ຈະໃຫ້ການສັກຄົບໂດສ໌ ຕາມຄໍາແນະນໍາໃຫ້ແກ່ປະຊາຊົນຫຼາຍກວ່າ 4,1 ລ້ານຄົນ ຫຼື ປະມານ 56% ຂອງປະຊາກອນ.

ຕາມແຜນການສັກວັຄຊີນກັນໂຄວິດ-19 ແຫ່ງຊາດ, ຊຶ່ງວັຄຊີນ AstraZeneca ຊຸດນີ້ຈະໄດ້ນໍາໃຊ້ປ້ອງກັນແກ່ກຸ່ມບຸລິມະສິດເຊັ່ນ: ຜູ້ອາຍຸສູງ 60 ປີຂຶ້ນໄປ, ຄົນທີ່ມີພະຍາດປະຈຳຕົວ, ແມ່ຍິງຖືພາ ແລະ ພະນັກງານດ້ານສາທາລະນະສຸກ. ພ້ອມນັ້ນ, ວັຄຊີນເຫຼົ່ານີ້ຍັງຈະໄດ້ນຳໃຊ້ກັບປະຊາກອນກຸ່ມເປົ້າໝາຍອື່ນໆໃນເຂດຫ່າງໄກສອກຫຼີກ, ເຂດທີ່ເຂົ້າເຖິງໄດ້ຍາກ ແລະ ຈະໄດ້ນໍາໃຊ້ເພື່ອໃຫ້ການປ້ອງກັນເພີ່ມເຕີມ (ໂດສ໌ທີ 3) ເເກ່ບຸກຄົນທີ່ມີຄວາມສ່ຽງສູງຕໍ່ພະຍາດໂຄວິດ-19.

ວັຄຊີນ AstraZeneca ຊຸດນີ້, ຈະຊ່ວຍເລັ່ງໃຫ້ ສປປ ລາວ ບັນລຸປົ້າໝາຍການສັກວັຄຊີນໃຫ້ໄດ້ 87,25% ຂອງປະຊາກອນ ພາຍໃນທ້າຍປີ 2022, ຊຶ່ງມາຮອດວັນທີ 16 ກຸມພາ 2022 ມີປະຊາກອນລາວປະມານ 65,83% ໄດ້ຮັບການສັກວັຄຊີນປ້ອງກັນພະຍາດໂຄວິດ-19 ຢ່າງໜ້ອຍ 1 ເຂັມ ແລະ ປະມານ 58% ໄດ້ຮັບຄົບໂດສ໌ຕາມຄໍາແນະນໍາເເລ້ວ.

แชร์