ອຸບັດເຫດອາດເຮັດໃຫ້ ໄທເກີຣ໌ ວູດສ໌ ຢຸດແຂ່ງກອລ໌ຟສາຍອາຊີບ

“ພະຍາເສືອ” ໄທເກີຣ໌ ວູດສ໌ ໃນໄວ 46 ປີ, ໄດ້ອອກມາຍອມຮັບວ່າ: ແມ່ນວ່າການຊິປ ຫຼື ພັຕຕ໌, ອາດຈະບໍ່ມີບັນຫາແລະເຫັນວ່າຍັງຄົງເຮັດໄດ້ດີ.ແຕ່ຖ້າຈະໃຫ້ໄດຣ໌ຟໃນໄລຍະໄກກໍຄົງຍາກ, ເພາະຂະໜາດຍ່າງກໍຍັງລຳບາກຊຶ່ງຕົນຕ້ອງໄດ້ນັ່ງລົດກອລ໌ຟແທນ. ໄວນີ້ແລ້ວທຸກຢ່າງແຕກຕ່າງໄປໝົດ, ຮ່າງກາຍເຮົາບໍ່ມີວັນເໝືອນເດີມຊຶ່ງມັນເປັນເລື່ອງທີ່ໜັກໃຈຫຼາຍ”.

ໂດຍພະຍາເສືອໄດ້ບອກກັບນັກຂ່າວໃນລະຫວ່າງການຖະແຫຼງຈັດງານແຂ່ງຂັນກອລ໌ຟ “Genesis Invitational”  ທີ່ຢູ່ໃນປະຕິທິນຂອງ ພີຈີເອ ທົວຣ໌, ຊຶ່ງທົວຣ໌ນາເມນຕ໌ຮັບເຊີນແບບນີ້ເປັນ 1 ໃນ 5 ຢູ່ໃນທົວຣ໌ຫຼັກຂອງສະຫະລັດອະເມຣິກາ. ແຕ່ຮູບແບບຈະເປັນໄປຢ່າງສະບາຍໆຄືຫຼຸດຈຳນວນຜູ້ຫຼິ້ນເຫຼືອ 120 ຄົນ, ສະໜາມກໍຈະນ້ອຍກວ່າປົກກະຕິ,ບໍ່ຕ້ອງມີການຈັດອັນດັບເພື່ອມາແຂ່ງ,ບໍ່ມີຮອບຄັດເລືອກ, ໂດຍຜູ້ກໍ່ຕັ້ງອີເວນຕ໌ນີ້ກໍຄື “ໄທເກີຣ໌ ວູດສ໌” ເອງ. ຊຶ່ງໃນປີ 2022 ນີ້ ຈະຈັດຂຶ້ນໃນລະຫວ່າງວັນທີ 17-20 ກຸມພາ ທີ່ ຣິເວຣ່າ ຄັນທຣີ ຄລັບ.

ສຳນັກຂ່າວຕ່າງປະເທດໄດ້ລາຍງານໃນວັນທີ 18 ກຸມພາ 2022 ວ່າ: ພະຍາເສືອຊຶ່ງມານັ່ງຖະແຫຼງຂ່າວແລະຈະລົງແຂ່ງຂັນດ້ວຍ. ຊຶ່ງຈະຖືເປັນການລົງສະໜາມຖັດຈາກທ້າຍປີທີ່ຜ່ານມາໂດຍການຈັບຄູ່ກັບລູກຊາຍ “ຊາຣ໌ລີ ວູດສ໌” ແລະ ຈົບທີ່ອັນດັບ2ຂອງກອລ໌ຟລາຍການພິເສດ (ພີເອັນຊີ ແຊມປຽນຊິຟ) ທີ່ ຟໍລຣິດາ ຊຶ່ງໄດ້ສ້າງຄວາມປະທັບໃຈໃຫ້ຜູ້ຊົມຢ່າງຫຼວງຫຼາຍ.

ຢ່າງໃດກໍຕາມ, ໃນໄລຍະຜ່ານມາ “ພະຍາເສືອ” ກໍໃຊ້ຮ່າງກາຍຢ່າງໜັກໄປກັບການຫຼິ້ນກີລາກອລ໌ຟ ແລະ ເມື່ອຕົ້ນປີ 2021, ໃນຂະນະທີ່ ໄທເກີຣ໌ ວູດສ໌ ຂັບລົດ ເອສຢູວີ ໄປຕາມຖະໜົນ ກໍໄດ້ເກີດອຸບັດເຫດພິກຂວ້ຳ ແລະ ຫວ່ຽງໄປຕຳຕົ້ນໄມ້ຈົນສະພາບລົດເພພັງໝົດ. ຈາກເຫດລົດເສຍຫຼັກພິກຂວ້ຳດັ່ງກ່າວ ກໍມີຜົນດ້ານລົບຕໍ່ຮ່າງກາຍ, ຊຶ່ງອະໄວຍະວະທີ່ໄດ້ຮັບບາດເຈັບໜັກທີ່ສຸດກໍຄືກະດູກໜ້າແຄ່ງ ແລະ ສົ້ນນ່ອງທີ່ແຕກຫຼາຍກວ່າ 2 ຈຸດ ແລະ ຜ່ານມາກໍມີການຜ່າຕັດທົ່ວຮ່າງ ກາຍອັນເກີດຈາກການຫຼິ້ນກີລາກອລຟ໌,ເປັນຕົ້ນກໍແມ່ນບໍລິເວນຫຼັງ ແລະ ຫົວເຂົ່າ.

ດັ່ງນັ້ນ, ການຄວ້າແຊມປ໌ຂອງ ໄທເກຣ໌ ວູດສ໌ ນັບຈາກນີ້ຄົງລືມໄປໄດ້ເລີຍ. ຢ່າງໃດກໍດີ, ສະຖິຕິທີພະຍາເສືອເຮັດໄວ້ກໍຄົງເປັນການຍາກທີ່ໃຜຈະທຳລາຍໄດ້ບໍ່ວ່າຈະເປັນແຊມປ໌ ພີຈີເອ ທົວຣ໌ ຫຼາຍທີ່ສຸດ 82 ລາຍການ, ແຊມປ໌ຢູໂຣປຽນ ທົວຣ໌ ຫຼາຍທີ່ສຸດເປັນອັນດັບ 3 ຄື 41 ລາຍການ ແລະ ແຊມປ໌ເມເຈີຣ໌ 15 ລາຍການ, ຊຶ່ງຫຼ້າສຸດກໍຄືແຊມປ໌ “ເດິ ມາສເຕີຣ໌ສ” ເມື່ອປີ2019.

แชร์