ກະກຽມໃຫ້ແກ່ການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ

ໂດຍຫ້ອງວ່າການສູນກາງພັກ, ໄດ້ຈັດກອງປະຊຸມປຶກສາຫາລືກ່ຽວກັບການກະກຽມສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022, ພາຍໃຕ້ການເປັນປະທານຂອງ ສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ປະທານຄະນະຊີ້ນໍາລະດັບຊາດ ເພື່ອສະເຫຼີມສະຫຼອງປີສາມັກຄີ ລາວ-ຫວຽດນາມ, ມີບັນດາສະຫາຍຮອງປະທານຄະນະຊີ້ນໍາລະດັບຊາດ ແລະຄະນະທັງໝົດເຂົ້າຮ່ວມຢ່າງພ້ອມພຽງ.

ວະລະປະຊຸມຈັດຂຶ້ນໃນວັນທີ 18 ກຸມພາ 2022, ຊຶ່ງມີການຜ່ານມະຕິຕົກລົງວ່າດ້ວຍການແຕ່ງຕັ້ງຄະນະຊີ້ນໍາລະດັບຊາດເພື່ອສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022; ມະຕິຕົກລົງວ່າດ້ວຍການແຕ່ງຕັ້ງຄະນະຊ່ວຍວຽກຄະນະຊີ້ນໍາລະດັບຊາດ ເພື່ອສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022; ຄໍາສັ່ງແນະນໍາຂອງຄະນະຊີ້ນໍາລະດັບຊາດ ວ່າດ້ວຍການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022; ແຜນການຈັດຕັ້ງປະຕິບັດການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022. ໂດຍໄດ້ກໍານົດ 8 ກິດຈະກຳໃຫຍ່ຄື: 1) ການເປີດ ແລະ ປິດປີສາມັກຄີມິດຕະພາບ 2022; 2) ການແລກປ່ຽນຄະນະຜູ້ແທນທຸກຂັ້ນ, ພົບປະສັງສັນ, ການຮ່ວມມືລະຫວ່າງບັນດາຂະແໜງການຂັ້ນສູນກາງ ແລະ ທ້ອງຖິ່ນ ຂອງສອງປະເທດ ແລະ ແລກປ່ຽນພົບປະມິດຕະພາບລະຫວ່າງປະຊາຊົນຂອງສອງປະເທດ; 3) ການຈັດງານໂຮມຊຸມນຸມມິດຕິງ (18 ກໍລະກົດ 2022); 4) ການແລກປ່ຽນສານອວຍພອນຂອງການນໍາທຸກຂັ້ນ; 5) ແລກປ່ຽນສິລະປະວັນນະຄະດີ, ວັດທະນະທໍາ, ການສຶກສາ ແລະ ກີລາ; 6) ການເຄື່ອນໄຫວເພີ່ມທະວີການຮ່ວມມືທາງດ້ານເສດຖະກິດ, ການຄ້າ-ການລົງທຶນ; 7) ການເຄື່ອນໄຫວທາງດ້ານໂຄສະນາເຜີຍແຜ່ຜ່ານສື່ມວນຊົນ ເຊັ່ນ: ພິມປຶ້ມວາລະສານ,ບົດຄວາມ, ໜັງສືພິມ, ສໍາພາດທາງວິທະຍຸ, ໂທລະພາບ ແລະ ອື່ນໆ; 8) ການຍ້ອງຍໍ (ການປະດັບຫຼຽນໄຊ ແລະ ຫຼຽນກາຕ່າງໆ).

ໂອກາດນີ້, ສະຫາຍ ບຸນທອງ ຈິດມະນີ ໄດ້ໃຫ້ທິດຊີ້ນຳກ່ຽວກັບການກະກຽມສະເຫຼີມສະຫຼອງສອງວັນປະຫວັດສາດຄັ້ງນີ້ ຊຶ່ງມີຄວາມໝາຍສໍາຄັນຫຼາຍສໍາລັບສອງພັກ-ສອງລັດ ກໍຄືປະຊາຊົນສອງຊາດ ລາວ-ຫວຽດນາມ ແລະ ເປັນການຫວນຄືນມູນເຊື້ອແຫ່ງສາຍພົວພັນມິດຕະພາບຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ນັບແຕ່ພາລະກິດຕໍ່ສູ້ປົດປ່ອຍຊາດ ແລະ ການສ້າງສາພັດທະນາໃນປັດຈຸບັນ, ທັງເປັນບັ້ນໃຫຍ່ໜຶ່ງໃນການສຶກສາອົບຮົມການເມືອງ-ແນວຄິດໃຫ້ທົ່ວສັງຄົມ ເປັນຕົ້ນແມ່ນ ສະມາຊິກພັກ, ພະນັກງານ, ທະຫານ, ຕຳຫຼວດ ແລະ ປະຊາຊົນລາວບັນດາເຜົ່າ, ໂດຍສະເພາະກໍຄືຄົນລຸ້ນໜຸ່ມ ໃຫ້ຮັບຮູ້, ເຂົ້າໃຈຖືກຕ້ອງ, ເລິກເຊິ່ງ ແລະໜັກແໜ້ນ; ໂດຍເນັ້ນໜັກໃຫ້ທຸກຂະແໜງການທັງສູນກາງ ແລະ ທ້ອງຖິ່ນ ຈົ່ງພ້ອມກັນກະກຽມ,ດ້ວຍການຫັນບັນດາກິດຈະກໍາຕ່າງໆໃຫ້ເປັນອັນລະອຽດ ແລະ ເປັນແຜນຈັດຕັ້ງປະຕິບັດໃນແຕ່ລະເດືອນ ແລະ ແຕ່ລະໄລຍະ. ຊຶ່ງການຈັດຕັ້ງປະຕິບັດໃຫ້ເນັ້ນໃສ່ເນື້ອໃນເປັນຕົ້ນຕໍ ແລະ ຮູບການເປັນອົງປະກອບສໍາຄັນ, ດ້ວຍຫຼາຍຮູບຫຼາຍສີສັນ, ທັງມີຄວາມເບີກບານມ່ວນຊື່ນ, ເປັນຂະບວນຟົດຟື້ນແລະ ກາຍເປັນສັນຍະລັກ ບົນພື້ນຖານຮັບປະກັນໄດ້ຄວາມສະຫງົບປອດໄພ ແລະ ປະຢັດມັດທະຍັດ.

แชร์