ພົບແລ້ວກວ່າ 100 ສົບຈາກເຫດດິນເຈື່ອນເພາະຝົນຕົກໜັກທີ່ບຣາຊິລ

ຈຳນວນຜູ້ເສຍຊີວິດຈາກດິນເຈື່ອນເພາະຝົນຕົກໜັກໃນພື້ນທີ່ທາງຕາເວັນອອກຂອງປະເທດເພີ່ມເປັນຫຼາຍກວ່າ 100 ສົບ, ຊຶ່ງນັບເປັນເຫດທໍລະນີວິບັດໜັກໜ່ວງທີ່ສຸດໃນຮອບ 1 ສະຕະວັດຂອງບຣາຊິລ.

ອີງຕາມລາຍງານຂ່າວຕ່າງປະເທດໃນວັນທີ 18ກຸມພາ 2022 ຊຶ່ງອ້າງການເປີດເຜີຍຂໍ້ມູນຈາກເມືອງ ຣີໂອເດຈາເນໂຣ ປະເທດບຣາຊິລ ກ່ຽວກັບຄວາມຄືບໜ້າຂອງເຫດນ້ຳຖ້ວມແລະດິນເຈື່ອນ (ຖະຫຼົ່ມ) ກະທັນຫັນ ທີ່ເມືອງ ເປໂຕຣໂປລິສ ຊຶ່ງຕັ້ງຢູ່ຕາມເນີນພູໃກ້ກັບເມືອງ ຣີໂອເດຈາເນໂຣ ທາງຕາເວັນອອກສຽງໃຕ້ຂອງບຣາຊິລ. ເຫດດິນເຈື່ອນກະທັນຫັນຄັ້ງນີ້ເປັນຜົນມາຈາກສະພາບຝົນຕົກໜັກນັບແຕ່ວັນທີ 16 ກຸມພາ 2022 ສົ່ງຜົນໃຫ້ມີຜູ້ເສຍຊີວິດເພີ່ມຂຶ້ນເປັນຢ່າງໜ້ອຍ 117 ລາຍ ແລະ ຍັງມີທ່າອຽງທີ່ຈະເພີ່ມຂຶ້ນອີກເພາະຍັງມີລາຍງານຜູ້ສູນຫາຍອີກຫຼາຍສິບຄົນ.

ລາຍງານໃນວັນທີ 18 ກຸມພາ ລະບຸວ່າໃນຂະນະນີ້ຝົນຍັງຄົງຕົກລົງມາຢ່າງໜັກ, ໂດຍສຳນັກອຸຕຸນິຍົມວິທະຍາຂອງບຣາຊິລ, ມີການວັດແທກປະລິມານນໍ້າຝົນສະສົມໃນພື້ນທີ່ດັ່ງກ່າວເມື່ອວັນທີ 17 ກຸມພາ ໄດ້ສູງເຖິງ 6 ເຊນຕິແມັດແລະຄາດການປະລິມານນໍ້າຝົນໃນວັນທີ 18 ອາດຍັງສູງທີ່ລະດັບ 4 ເຊນຕິແມັດ.

ສະພາບຝົນຕົກໜັກແລະດິນຖະຫຼົ່ມທີ່ເມືອງເປໂຕຣໂປລິສໃນຄັ້ງນີ້, ຖືເປັນໄພພິບັດທາງທຳມະຊາດທີ່ເກີດຂຶ້ນໃນເມືອງທ່ອງທ່ຽວທີ່ມີຊື່ສຽງຂອງພູມີພາກ ຣີໂອເດຈາເນໂຣ, ຊຶ່ງມີຄວາມຮຸນແຮງທີ່ສຸດນັບຕັ້ງແຕ່ປີ ຄສ 1911. ຢ່າງໃດກໍຕາມ,ຫຼາຍພື້ນທີ່ຂອງບຣາຊິລກໍ່ຜະເຊີນກັບໄພທຳມະຊາດຢ່າງຕໍ່ເນື່ອງນັບຕັ້ງແຕ່ທ້າຍປີ 2021 ເປັນຕົ້ນມາ, ໂດຍສະເພາະແມ່ນພາກຕາເວັນອອກສຽງເໜືອ ແລະ ໃນລັດເຊົາເປົາລູທີ່ຢູ່ທາງຕາເວັນອອກສຽງໃຕ້.

แชร์