ອຸດົມໄຊ ສະເຫຼີມສະຫຼອງຄົບຮອບ 25 ປີ ພຣະທາດໄຊມຸງຄຸນ ຣັດຕະນະມິ່ງເມືອງ

ແຂວງອຸດົມໄຊ ໄດ້ຈັດພິທີສະເຫຼີມສະຫຼອງ ວັດພຣະທາດໄຊມຸງຄຸນ ຣັດຕະນະມິ່ງເມືອງ ຄົບຮອບ 25 ປີ ໂດຍຕິດພັນກັບການສະເຫຼີມສະຫຼອງ ຫໍກອງ 1 ຫຼັງ ແລະ ປະຕູໂຂງ 3 ເບື້ອງ. ວາລະມຸງຄຸນນີ້ຈັດຂຶ້ນເມື່ອລະຫວ່າງວັນທີ 14-16 ກຸມພາ 2022 ທີ່ວັດພຣະທາດໄຊມຸງຄຸນ ຣັດຕະນະມິ່ງເມືອງ.

ໃນຕະຫຼອດໄລຍະ 3 ວັນ ໄດ້ມີການປະກອບພິທີທາງສະສະໜາຕາມຮີດຄອງປະເພນີ, ນັບຕັ້ງແຕ່ການຫ້າງຫາກະກຽມເຄື່ອງສັງຂະທານ, ຍອດຊໍ່ຟ້າ, ຜາສາດເຜິ້ງ, ຕົ້ນເຜິ້ງ, ກອງບຸນ, ຕົ້ນກັນ ເທດ, ຜາສາດມຸງຄຸນ ແລະ ອື່ນໆ. ຈາກນັ້ນ, ກໍໄດ້ມີພິທີແຫ່ເຄື່ອງສັງຂະທານ ໂດຍເລີ່ມຈາກພະແນກ ຖວທ ແຂວງອຸດົມໄຊ ໄປທີ່ວັດພຣະທາດໄຊມຸງຄຸນ ຣັດຕະນະມິ່ງເມືອງ, ພ້ອມທັງຖວາຍຍອດຊໍ່ຟ້າ ແລະ ເຄື່ອງສັງຂະທານຕ່າງໆຕາມຂັ້ນຕອນ ແລະ ສືບຕໍ່ພິທີໄຫວ້ພຣະຮັບສິນ, ສູດປະຣິຕະມຸງຄຸນ ໂດຍພຣະສົງ 13 ອົງ. ສ່ວນໃນວັນທີ 16 ກຸມພາ ຊຶ່ງເປັນມື້ຂຶ້ນ 15 ຄໍ່າ ເດືອນ 3, ໃນຕອນເຊົ້າໄດ້ມີພິທີ ໄຫວ້ພຣະຮັບສິນ, ບິນທະບາດ, ຖວາຍພັດຕາຫານ, ຖວາຍຫໍກອງ 1 ຫຼັງ, ພ້ອມດ້ວຍປະຕູໂຂງ 3 ເບື້ອງ, ກອງອັດຖະ ແລະ ເຄື່ອງສັງຂະທານແດ່ພຣະສົງ 47 ອົງ, ພ້ອມທັງຮັບຟັງເທສະໜາ ແລະ ຢາດນ້ຳອຸທິດສ່ວນບຸນກຸສົນ. ໃນຕອນຄໍ່າ, ໄດ້ສືບຕໍ່ໄຫວພຣະຮັບສິນ, ຖວາຍດອກໄມ້ທູບທຽນ, ວຽນທຽນອ້ອມຮອບພຣະທາດໄຊມຸງຄຸນ ຣັດຕະນະມິ່ງເມືອງ, ພ້ອມທັງຈູດບັ້ງໄຟດອກບູຊາ.

ຈຸດປະສົງຂອງການຈັດພິທີສະເຫຼີມສະຫຼອງ, ເພື່ອເປັນການສືບສານພຸດທະສາສະໜາ,ຮັກສາຮີດຄອງປະເພນີ ແລະ ວັດທະນະທຳດີງາມຂອງຊາດໄວ້ໃຫ້ຍືນຍົງ, ທັງເປັນການເຕົ້າໂຮມຄວາມສາມັກຄີຂອງປະຊາຊົນບັນດາເຜົ່າໃນເທສະບານແຂວງອຸດົມໄຊ. ເຂົ້າຮ່ວມໃນພິທີດັ່ງກ່າວ, ໂດຍມີການນໍາພັກ-ລັດ ຂັ້ນແຂວງ, ເມືອງ, ບ້ານ, ເຖົ້າແກ່ແນວໂຮມ, ຊາວໜຸ່ມ ຕະຫຼອດຮອດປະຊາຊົນບັນດາເຜົ່າ ຊາວແຂວງອຸດົມໄຊ.

• 18/02/2022