ຮອງປະທານ ສພຊ ຢ້ຽມຢາມສະຫວັນນະເຂດ

ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ແຂວງສະຫວັນນະເຂດ, ພ້ອມຄະນະ. ໂດຍສົມທົບກັບສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະສະມາຊິກສະພາປະຊາຊົນແຂວງ, ໄດ້ເຄື່ອນໄຫວພົບປະຜູ້ມີສິດເລືອກຕັ້ງເພື່ອເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ຜົນສໍາເລັດກອງປະຊຸມສະພາປະຊາຊົນແຂວງສະຫວັນນະເຂດ ຊຸດທີ II ທີ່ສະໂມສອນເມືອງວິລະບູລີ, ຈຸດສຸມກະແຕບ-ນາຜາດ່າງ ແລະເຂດຈຸດສຸມເມືອງວັງ.

ໃນໂອກາດເຄື່ອນໄຫວຂອງຄະນະຮອງປະທານ ສພຊ ເມື່ອລະຫວ່າງວັນທີ 14-17 ກຸມພາ 2022, ໂດຍໄດ້ຮັບການຕ້ອນຮັບຈາກ ທ່ານ ຄໍາຜຸຍ ສີບຸນເຮືອງ ເຈົ້າເມືອງວິລະບູລີ, ມີຄະນະນໍາຂອງເມືອງ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ, ພະນັກງານ-ລັດຖະກອນ, ຄະນະອໍານາດການປົກຄອງບ້ານເທສະບານອ້ອມຂ້າງເມືອງວິລະບູລີ ແລະ ພາກສ່ວນກ່ຽວຂ້ອງ.

ທັງນີ້, ທ່ານ ນາງ ສູນທອນ ໄຊຍະຈັກ ໄດ້ເຜີຍແຜ່ຜົນສໍາເລັດກອງປະຊຸມສະໄໝວິສາມັນເທື່ອທີ 1 ແລະ ຜົນສໍາເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ IX ຊຶ່ງໄຂຂຶ້ນລະຫວ່າງວັນທີ 1-17 ພະຈິກ 2021 ໂດຍໄດ້ພິຈາລະນາຮັບຮອງເອົາຫຼາຍບັນຫາສໍາຄັນຂອງຊາດ, ຂອງທ້ອງຖິ່ນ ແລະ ໄດ້ອອກເປັນຫຼາຍມະຕິກອງປະຊຸມ, ຊຶ່ງລັດຖະບານ ແລະອົງການປົກຄອງທ້ອງຖິ່ນກໍໄດ້ສຸມໃສ່ຈັດຕັ້ງປະຕິບັດ. ພ້ອມນີ້, ຮອງປະທານສະພາແຫ່ງຊາດກໍໄດ້ເນັ້ນໃຫ້ອໍານາດການປົກຄອງເມືອງ, ອໍານາດການປົກຄອງບ້ານຈຸດສຸມເອົາໃຈໃສ່ຈັດຕັ້ງປະຕິບັດວາລະແຫ່ງຊາດ, ລັດຖະທໍາມະນູນ, ກົດໝາຍ ແລະ ມະຕິຕ່າງໆຢ່າງເຂັ້ມງວດ. ໃນວາລະດຽວກັນ, ກໍໄດ້ຮັບຟັງຂໍ້ສະເໜີຕ່າງໆຈາກອົງການປົກຄອງບ້ານກໍຄືຂໍ້ຄິດເຫັນຂອງປະຊາຊົນໃນສອງເຂດຈຸດສຸມດັ່ງກ່າວ.

ໃນໂອກາດນີ້, ຮອງປະທານສະພາແຫ່ງຊາດກໍໄດ້ມອບເຄື່ອງຊ່ວຍເຫຼືອເຊັ່ນ: ຜ້າອັດປາກ-ດັງ, ເຈລລ້າງມື, ທິຊຊູປຽກ,ເຄື່ອງນຸ່ງຫົ່ມ, ຖົງພາຍ ແລະ ອຸປະກອນການຮຽນ (ປຶ້ມ, ສໍສີ, ຢາງລຶບ, ໄມ້ບັນທັດ) ແລະ ອຸປະກອນກີລາຈໍານວນໜຶ່ງ ລວມມູນຄ່າຫຼາຍກວ່າ 26 ລ້ານກີບ ໃຫ້ປະຊາຊົນ ແລະ ໂຮງຮຽນບ້ານກະແຕບ (ຈຸດສຸມກະແຕບ), ໂຮງຮຽນແກ້ວວິໄລ (ຈຸດສຸມເມືອງວັງ), ຫ້ອງວ່າການປົກຄອງເມືອງວິລະບູລີ ແລະ ສະພາປະຊາຊົນແຂວງສະຫວັນນະເຂດ ອີກດ້ວຍ.

ຫຼັງຈາກນັ້ນ, ທັງຄະນະກໍໄດ້ຢ້ຽມຢາມກຸ່ມຜະລິດໝາກກ້ຽງເພື່ອຢ້ຽມຊົມຜົນຜະລິດຂອງປະຊາຊົນທີ່ເປັນຄອບຄົວຕົວແບບດ້ານການຜະລິດຢູ່ເມືອງວິລະບູລີ ແລະ ຢ້ຽມຊົມບໍ່ຄໍາເຊໂປນ (ອ່າງນໍ້າຫາງແຫ່) ເພື່ອເກັບກໍາຂໍ້ມູນກ່ຽວກັບການບໍາບັດນໍ້າເສຍ ແລະຊຸກຍູ້ໃຫ້ບໍລິສັດຂຸດຄົ້ນບໍ່ແຮ່ຈົ່ງເອົາໃຈໃສ່ຮັກສາສິ່ງແວດລ້ອມ ແລະສ້າງເງື່ອນໄຂອໍານວຍຄວາມສະດວກໃຫ້ປະຊາຊົນໃນເຂດດັ່ງກ່າວ, ເປັນຕົ້ນກໍແມ່ນການປັບປຸງ-ປົວແປງ ແລະກໍ່ສ້າງຖະໜົນຫົນທາງໃຫ້ດີຂຶ້ນ.

แชร์