ເຜີຍຜົນກວດກາຂອງ ອອປສ ໃນ 5 ປີຜ່ານມາ

ໃນໄລຍະ 5 ປີຜ່ານມາ, ຄະນະກວດກາຂອງອົງການໄອຍະການປະຊາຊົນສູງສຸດ (ອອປສ) ໄດ້ຕິດຕາມກວດກາຕາມຄຳສັ່ງຊຶ່ງມີ 7 ເປົ້າໝາຍ. ໃນນີ້, ພົວພັນເຖິງການປະຕິບັດໜ້າທີ່ຂອງພະນັກງານຢູ່ອົງການໄອຍະການປະຊາຊົນສູງສຸດ,ອົງການໄອຍະການປະຊາຊົນພາກກາງ,ອົງການໄອຍະການປະຊາຊົນແຂວງບໍ່ແກ້ວ, ອົງການໄອຍະການປະຊາຊົນແຂວງວຽງຈັນ, ອົງການໄອຍະການປະຊາຊົນແຂວງຜົ້ງສາລີ, ອົງການໄອຍະການປະຊາຊົນແຂວງອຸດົມໄຊ ແລະອົງການໄອຍະການປະຊາຊົນແຂວງຊຽງຂວາງ ແລະຕິດຕາມໂຄງການກໍ່ສ້າງລົງທຶນຂອງລັດແຕ່ຫົວທີ ຈໍານວນ 4 ໂຄງການ, ສ່ວນການຕິດຕາມກວດກາໂຄງການລົງທຶນຂອງລັດທີ່ມີມູນຄ່າ 10 ຕື້ກີບລົງມາໃນຂອບເຂດທົ່ວປະເທດ 14 ໂຄງການ ປັດຈຸບັນຢູ່ໃນຂັ້ນຕອນສະຫຼຸບລາຍງານ.

ຂໍ້ມູນດັ່ງກ່າວໄດ້ຮັບການເປີດເຜີຍຕໍ່ກອງປະຊຸມເຜີຍແຜ່ວຽກງານກວດກາທົ່ວປະເທດ ປະຈຳປີ 2020 ແລະ ທິດທາງແຜນການ ປີ 2021; ວຽກງານກວດກາ 5 ປີຜ່ານມາ (2016-2020) ແລະ ທິດທາງແຜນການ ປີ 2021-2025 ຂອງຄະນະກວດກາ ອອປສ ເມື່ອວັນທີ 17 ກຸມພາ 2022, ໂດຍການເປັນປະທານຂອງ ທ່ານ ບຸນທັນ ບຸນທະວິໄລ ຮອງຫົວໜ້າອົງການໄອຍະການປະ ຊາຊົນສູງສຸດ, ມີຄະນະພັກ-ຄະນະນຳ, ສະຖາບັນຄົ້ນຄວ້າ ແລະ ຝຶກອົບຮົມໄອຍະການ ແລະ ຫົວໜ້າພະແນກພາຍໃນອົງການໄອຍະການປະຊາຊົນສູງສຸດເຂົ້າຮ່ວມ.

ທັງນີ້, ທ່ານ ນາງ ພອນທິບ ສາວະລີ ຫົວໜ້າກົມກວດກາ, ອົງການໄອຍະການປະຊາຊົນສູງສຸດ ໄດ້ໃຫ້ຮູ້ວ່າ: ຜ່ານການກວດກາຕິດຕາມ 7 ເປົ້າໝາຍທີ່ມີການລະເມີດຕໍ່ລະບຽບກົດໝາຍ, ໄດ້ປະຕິບັດວິໄນຂັ້ນຕິຕຽນ 1 ຄົນ; ໂຈະການເລື່ອນຂັ້ນເງິນເດືອນ ແລະ ການຍ້ອງຍໍ 1 ຄົນ; ລໍຖ້າການຈັດຕັ້ງປະຕິບັດຜົນການຕົກລົງ 1 ຄົນ; 4 ຄົນແມ່ນສໍາຫຼວດກວດກາ (ກ່າວເຕືອນ); 4 ຄົນຖືກຍົກຍ້າຍບ່ອນປະຈໍາການ ແລະ ອີກ 2 ຄົນພວມດໍາເນີນການກວດກາ.

ສ່ວນການຕິດຕາມກວດກາ 4 ໂຄງການຄື: ໂຄງການກໍ່ສ້າງສຳນັກງານຫ້ອງການໄອຍະການເຂດ III ແຂວງ ຫຼວງພຣະບາງ, ໂຄງການຖົມດິນຂອງສະຖາບັນຝຶກອົບຮົມ ແລະ ວຽກງານໄອຍະການ, ໂຄງການກໍ່ສ້າງສຳນັກງານອົງການໄອຍະການປະຊາຊົນເຂດ IV ນະຄອນຫຼວງວຽງຈັນ ແລະ ໂຄງການກໍ່ສ້າງສຳນັກງານອົງການໄອຍະການປະຊາຊົນແຂວງໄຊສົມບູນ ເຫັນວ່າ 3 ໂຄງການແມ່ນໄດ້ຈັດຕັ້ງປະຕິບັດສໍາເລັດ, ຊຶ່ງບໍລິສັດຮັບເໝົາກໍ່ສ້າງ ໄດ້ປະຕິບັດຖືກຕ້ອງຕາມລະບຽບກົດໝາຍ ແລະ ຕາມສັນຍາທີ່ໄດ້ຕົກລົງກັນໄວ້. ສ່ວນໂຄງການກໍ່ສ້າງສຳນັກງານອົງການໄອຍະການປະຊາຊົນແຂວງໄຊສົມບູນ ແມ່ນໄດ້ກວດກາສໍາເລັດ ແລະ ມອບຮັບແລ້ວ.

ໃນໂອກາດນີ້, ຮອງຫົວໜ້າອົງການໄອຍະການປະຊາຊົນສູງສຸດ ໄດ້ໃຫ້ທິດຊີ້ນຳແກ່ພະນັກງານໃນກົມກວດກາຂອງ ອອປສ, ຈົ່ງເຊີດຊູຄວາມຮັບຜິດຊອບຂອງຕົນໃນການເຮັດຫຼ້ອນໜ້າທີ່ ທີ່ພັກ, ລັດ ແລະ ປະຊາຊົນມອບໝາຍໃຫ້; ຈົ່ງຮັບໃຊ້ຊາດ, ຮັບໃຊ້ປະຊາຊົນ ດ້ວຍຄວາມບໍລິສຸດໃຈ ແລະຕັ້ງໜ້າເຮັດໃຫ້ວຽກງານກວດກາຢູ່ອົງການໄອຍະການປະຊາຊົນ ພັດທະນາຕາມທິດກ້າວໜ້າ, ທັນສະໄໝ ແລະ ວິທະຍາສາດ. ພ້ອມນັ້ນ, ກໍໃຫ້ເອົາໃຈໃສ່ຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດ ເຂົ້າສູ່ວຽກງານໄອຍະການປະຊາຊົນ; ຍົກສູງຄຸນນະພາບໃນການຕິດຕາມກວດກາການປະຕິບັດກົດໝາຍ ແລະ ປະຕິບັດສິດກ່າວຟ້ອງຜູ້ຖືກຫາໃຫ້ສານຕັດສິນ ຖືກຕ້ອງ, ເປັນທໍາ ເພື່ອເຮັດໃຫ້ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ, ເສດຖະກິດຂະຫຍາຍຕົວຕໍ່ເນື່ອງ ແລະ ປະເທດຊາດຈະເລີນກ້າວໜ້າຢ່າງບໍ່ຢຸດຢັ້ງ.

แชร์