ມົນລະພິດ ພາກຊີວິດມະນຸດໄປປີລະ 9 ລ້ານ

ຂໍ້ມູນຂອງໜ່ວຍງານດ້ານສິ່ງແວດລ້ອມແຫ່ງສະຫະຊາຊາດ, ລະບຸວ່າ: ປະຊາກອນໂລກເສຍຊີວິດຈາກມົນລະພິດປະມານປີລະ 9 ລ້ານລາຍ, ດັ່ງນັ້ນ UNEP ຈິ່ງຮຽກຮ້ອງໃຫ້ທຸກຝ່າຍຍົກລະດັບຄວາມພະຍາຍາມເພື່ອບັນເທົາຄວາມຮຸນແຮງຂອງວິກິດນີ້.

​ສຳນັກຂ່າວຕ່າງປະເທດໄດ້ນຳສະເໜີໂດຍອ້າງລາຍງານຈາກເມືອງເຈນີວາ ປະເທດສະວິຕເຊີຣ໌ແລນດ໌, ເມື່ອວັນທີ 17 ກຸມພາ 2022 ວ່າ: ໂຄງການສິ່ງແວດລ້ອມແຫ່ງສະຫະປະຊາຊາດ(UNEP) ໄດ້ເຜີຍແຜ່ລາຍງານໃນສັບປະດານີ້ ກ່ຽວກັບມົນລະພິດຊຶ່ງເກີດຂຶ້ນຈາກສີມືມະນຸດ, ບໍ່ວ່າຈະເປັນການໃຊ້ສານເຄມີກຳຈັດແມງໄມ້ ແລະ ສັດຕູພືດ, ຂີ້ເຫຍື້ອພລາສຕິກ ແລະ ຂີ້ເຫຍື້ອອິເລັກໂທຣນິກສ໌ ຊຶ່ງ “ເປັນການລະເມີດສິດທິມະນຸດຊົນ” ແລະ ສົ່ງຜົນໃຫ້ມີຜູ້ເສຍຊີວິດປະມານປີລະ 9 ລ້ານລາຍ ເປັນຢ່າງໜ້ອຍ.

​ໂດຍທ່ານ ເດວິດ ບອຍດ໌ ຜູ້ລາຍງານພິເສດຂອງ UNEP, ຊຶ່ງເປັນຜູ້ເຮັດລາຍງານສະບັບນີ້ໄດ້ຢ້ຳວ່າ: ຂໍ້ມູນດັ່ງກ່າວສະທ້ອນໃຫ້ເຫັນຄວາມຫຼົ້ມເຫຼວຂອງທຸກຝ່າຍທີ່ກ່ຽວຂ້ອງ ໃນການບໍລິຫານຈັດການເພື່ອຫຼຸດຄວາມສ່ຽງຈາກມົນລະພິດ ແລະ ສານເຄມີທີ່ເປັນອັນຕະລາຍ, ຈິ່ງຖືເປັນການລະເມີດສິດທິຂອງພົນລະເມືອງ ທີ່ຈະມີຄຸນນະພາບຊີວິດທ່າມກາງສິ່ງແວດລ້ອມທີ່ສະອາດ, ດີຕໍ່ສຸຂະພາບ ແລະ ມີຄວາມຍືນຍົງ.

​ຂະນະທີ່ລາຍງານໂດຍອົງການອະນາໄມໂລກ (WHO) ກໍລະບຸວ່າ “ມົນລະພິດທາງອາກາດ ແລະ ການຄຸກຄາມຂອງສານເຄມີ, ຂ້າຊີວິດປະຊາກອນໂລກປີລະປະມານ 13,7 ລ້ານລາຍ ຫຼື ປະມານ 24,3% ຂອງປະຊາກອນໂລກທີ່ຕາຍໄປໃນແຕ່ລະປີ”.

แชร์