ເປັນເຜດແຕ່ຍັງບໍ່ຕາຍ! ໂຈນສາຍວັດ ລັກຊັບຕາມອາຮາມ

   ສອງໜຸ່ມໄວ 35 ເຄື່ອນໄຫວຫາລັກຊັບຕາມວັດວາອາຮາມເປັນອາຈີນ, ດ້ວຍຫວັງໂລບໃນສິ່ງທີ່ພຸດທະສາສະນິກກະຊົນສົ່ງທານເພື່ອສ້າງປາລະມີ, ນີ້ລະນໍເພິ່ນວ່າ ເປັນເຜດຕັ້ງແຕ່ຍັງບໍ່ຕາຍ; ແຕ່ສຸດທ້າຍກໍຖືກຜີຂາຍໜ້າ ຈິ່ງສາລະພາບວ່າຮ່ວມກັນໄປຊອກລັບຊັບມາແລ້ວຫຼາຍວັດໃນເຂດນະຄອນຫຼວງ; ຊຶ່ງເງິນຈາກການລັກອັນເປັນທານຕາມວັດວາອາຮາມ, ທັງສອງໂຈນແມ່ນນຳໄປໃຊ້ຈ່າຍຫຼິ້ນເກມສ໌ ແລະ ຊື້ຢາບ້າມາເສຍຈົນໝົດ.

   ລາຍງານຂ່າວຂອງກຳລັງປ້ອງກັນຄວາມສະຫງົບ ເມື່ອວັນທີ 17 ກຸມພາ 2022, ໃຫ້ຮູ້ວ່າ: ພັຕ ພອນໄຊ ອ່າງມັດສາ ຫົວໜ້າໜ່ວຍງານຄະດີອາຍາ-ເສດຖະກິດ ພະແນກຕຳຫຼວດ ກອງບັນຊາ ການ ປກສ ເມືອງຫາດຊາຍຟອງ ນະຄອນຫຼວງວຽງຈັນ, ໄດ້ເປີດເຜີຍລາຍຄະດີຊຶ່ງເຈົ້າໜ້າທີ່ເຂົ້າແກ້ໄຂໃນເວລາ 11:30 ໂມງ ຂອງວັນທີ 11 ກຸມພາ 2022, ສາມາດກັກຕົວເປົ້າໝາຍລັກຊັບໄດ້ 2 ຄົນຊື່ ທ້າວ ຄວາຍຄໍ ອາຍຸ 35 ປີ ຢູ່ບ້ານທ່າພະລານໄຊ ເມືອງສີສັດຕະນາກ ແລະ ທ້າວ ກ໋ອກ ໄຊຍະວົງ ອາຍຸ 35 ປີ, ອາຊີບກຳມະກອນ ບ້ານດົງໂພນເລົາ ເມືອງຫາດຊາຍຟອງ. ພ້ອມເຄື່ອງຂອງກາງປະກອບມີ ລົດຈັກ 2 ຄັນ ປ້າຍທະບຽນ ຍກ 0551 ກຳແພງນະຄອນ ແລະ ອີກຄັນໜຶ່ງບໍ່ມີປ້າຍທະບຽນ, ເງິນກີບ 1,2 ລ້ານກີບ, ແຫວນຄ້າຍຄືຄໍາ 1 ວົງ, ຕຸ້ມຫູຄ້າຍຄືຄຳ 1 ຄູ່, ເສື້ອລາຍ ແລະ ໝວກກໍ່ສ້າງສີເຫຼືອງ.

   ຜ່ານການສືບສວນ, ທັງສອງໃຫ້ການຮັບສາລະພາບວ່າ: ພາກັນກໍ່ເຫດລັກຊັບຢູ່ວັດມາແລ້ວ 4 ເທື່ອຄື ເທື່ອທີ 1 ເມື່ອວັນທີ 31 ຕຸລາ 2021 ເວລາປະມານ 15 :00 ໂມງ ພວກກ່ຽວໄດ້ຂີ່ລົດຈັກເວບຈີນ ສີດຳ ປ້າຍທະບຽນ ຍກ 0551 ກຳແພງນະຄອນ, ເຂົ້າປະຕູດ້ານຫຼັງວັດບ້ານສົມສະນຸກ ແລະ ໄປງັດກຸດຕິວັດລັກເອົາຊັບສິນ ໄດ້ເງິນ 9,3 ລ້ານກີບ ແລະ 10 ພັນບາດ (ສະກຸນເງິນໄທ)  ກັບ 100 ໂດລາສະຫະລັດ; ພາຍຫຼັງໄດ້ຊັບສິນແລ້ວກໍແບ່ງປັນກັນໃຊ້ຈ່າຍຟຸມເຟືອຍ. ເທື່ອທີ 2 ໃນໄລຍະເດືອນພະຈິກ 2021 ພວກກ່ຽວໄດ້ຂັບຂີ່ລົດເວບຈີນ ປ້າຍທະບຽນ ຍກ 0551 ກຳແພງນະຄອນ ເຂົ້າໄປລັກຊັບຢູ່ວັດບ້ານ ຊຽງດາ ( ວັດທາງກວຽນ) ເມືອງໄຊເສດຖາ, ໄດ້ເງິນ 13 ພັນບາດ, 57 ໂດລາ ແລະ 5,7 ລ້ານກີບ; ເມື່ອໄດ້ຊັບສິນແລ້ວ ກໍພາກັນເອົາຕົວຫຼົບໜີມາບ້ານດົງໂພນເລົາ ແລ້ວເອົາເງິນມາແບ່ງປັນກັນ. ເທື່ອທີ 3 ໃນເດືອນພະຈິກ 2021 ເວລາ 8:00 ໂມງ ພວກກ່ຽວໄດ້ພະຍາຍາມເຂົ້າໄປລັກຊັບຢູ່ວັດບ້ານດົງຄໍາຊ້າງ, ແຕ່ໃນເວລາດຽວກັນກໍມີຈົວນ້ອຍມາເຫັນ ພວກກ່ຽວຈິ່ງພາກັນເອົາຕົວຫຼົບໜີ ແລະ ບໍ່ໄດ້ຊັບສິນຫຍັງ. ສ່ວນເທື່ອທີ 4 ໃນວັນທີ 9 ກຸມພາ 2022 ເວລາ ປະມານ 18:20 ໂມງ ພວກກ່ຽວໄດ້ເຂົ້າໄປງັດກຸດຕິວັດບ້ານດອນດູ່ ໄດ້ເງິນ 8,4 ລ້ານກີບ, 1 ພັນບາດ ພ້ອມໂທລະສັບ 1 ໜ່ວຍ.

แชร์