ບຸນມະໂຫລານ ກາເຟ-ຊາ ພູພຽງບໍລະເວນ ປີນີ້ເປີດຮ່ວມພິທີຍົກປ່າສະຫງວນ ດົງຫົວສາວ ແລະ ດົງເຊປຽນ ເປັນອຸທິຍານແຫ່ງຊາດ

ຖືເປັນວາລະສຳຄັນຍິ່ງເພາະໃນໂອກາດເປີດງານບຸນມະໂຫລານ ກາເຟ-ຊາ ພູພຽງບໍລະເວນ 2022 ໄດ້ຈັດພ້ອມພິທີປະກາດປ່າສະຫງວນ ດົງຫົວສາວ ແລະ ດົງເຊປຽນ ເປັນອຸທິຍານແຫ່ງຊາດ, ຊຶ່ງນອກຈາກການນຳສະເໜີຜົນງານພັດທະນາກາເຟ ແລະ ຊາ ທີ່ເປັນສິນຄ້າສົ່ງອອກຂອງລາວເຮົາແລ້ວ, ຍັງເປັນການຍົກລະດັບແຫຼ່ງທ່ອງທ່ຽວທາງທຳມະຊາດທີ່ຂຶ້ນຊື່ລືນາມດ້ວຍຄວາມອຸດົມສົມບູນ ແລະ ສວຍງາມຂອງພືດປ່າຊຶ່ງສາກົນຍົກຍ້ອງວ່າເປັນອຸທິຍານສະຫວັນເທິງດິນແດນໂລກມະນຸດ ແລະ ນີ້ຄືອີກໜຶ່ງຍຸດທະສາດດ້ານການທ່ອງທ່ຽວໂດຍອີງໃສ່ທ່າແຮງບົ່ມຊ້ອນຂອງພູມປະເທດໃນແຕ່ລະເຂດເປັນສີສັນ ແລະສະເໜດຶງດູດ.

ເຂົ້າຮ່ວມເປີດງານບຸນມະໂຫລານ ກາເຟ-ຊາ ພູພຽງບໍລະເວນ ປີ 2022 ແລະ ເປີດອຸທິຍານແຫ່ງຊາດດົງຫົວສາວ ແລະ ອຸທິຍານແຫ່ງຊາດເຊປຽນ ເມື່ອນວັນທີ 17 ກຸມພາ 2022 ທີ່ໂຮງແຮມເອລະວັນ, ນະຄອນປາກເຊ ແຂວງຈໍາປາສັກ, ໂດຍ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ, ທ່ານ ນາງ ນາລີ ສີສຸລິດ ພັນລະຍາເລຂາທິການໃຫຍ່ ປະທານປະເທດ, ມີທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ທ່ານ ເພັດ ພົມພິພັກ ລັດຖະມົນຕີກະຊວງກະສິກຳ ແລະ ປ່າໄມ້, ພ້ອມດ້ວຍຮອງລັດຖະມົນຕີກະຊວງອຸດສາຫະກຳ ແລະການຄ້າ, ເຈົ້າແຂວງສາລະວັນ, ເຊກອງ, ອັດຕະປື ແລະ ຮອງເຈົ້າແຂວງສະຫວັນນະເຂດ, ລວມເຖິງບັນດາການນໍາຈາກສູນກາງ ແລະ ພະແນກການທີ່ກ່ຽວຂ້ອງຂອງແຂວງ.

ໂດຍເຈົ້າແຂວງຈຳປາສັກ, ໄດ້ກ່າວວ່າ: ເພື່ອສົ່ງເສີມການຜະລິດເປັນສິນຄ້າຂອງຊາວສວນກາເຟ-ຊາ ແຂວງຈຳປາສັກ ແລະ ບັນດາແຂວງ, ລວມທັງຜູ້ປະກອບການທຸລະກິດກາເຟ-ຊາທົ່ວປະເທດ. ໂດຍຕິດພັນກັບການນຳສະເໜີປະຫວັດຄວາມເປັນມາຂອງກາເຟ-ຊາ ພູພຽງບໍລະເວນ, ຄວາມຫຼາກຫຼາຍດ້ານແນວພັນກາເຟ, ວິຖີຊີວິດຊາວສວນເມືອງປາກຊ່ອງ ທີ່ຕິດພັນກັບການສ້າງຄຸນຄ່າໃນການຜະລິດກາເຟ-ຊາ ຄຸນນະພາບດີ ແລະ ສ້າງຄ່ານິຍົມໃນໝູ່ຄົນລຸ້ນໃໝ່ໃຫ້ມີວັດທະນະທໍາການດື່ມກາເຟ-ຊາ ພູພຽງບໍລະເວນ. ຊຶ່ງຖືເປັນໜຶ່ງໃນການສ້າງຕ່ອງໂສ້ມູນຄ່າການຜະລິດ, ສົ່ງເສີມການຕະຫຼາດ ແລກປ່ຽນຊື້-ຂາຍ, ຈັບຄູ່ທຸລະກິດ ແລະ ການສົ່ງອອກ, ນັບແຕ່ຊາວສວນຜູ້ຜະລິດຜ່ານຂະບວນເທຄນິຄການຄັດເລືອກຄຸນນະພາບເມັດກາເຟ-ຊາ, ການຂົ້ວ, ໄປຈົນເຖິງສິລະປະ ການຊົງກາເຟທີ່ເປັນເອກະລັກ ແລະ ຄົງໄວ້ຊຶ່ງຣົດຊາດສະເພາະກາເຟ-ຊາ ພູພຽງບໍລະເວນ ທີ່ເປັນຜົນຜະລິດຂອງເມືອງປາກຊ່ອງຜືນແຜ່ນດິນຄໍາ ແລະ ດິນພູໄຟ ໃຫ້ກາຍເປັນຣົດນິຍົມທີ່ສົມຄໍາຊ່າລື ຈາກສວນ-ສູ່ຈອກຂອງຜູ້ຊົມໃຊ້.

ກາເຟ-ຊາ ແມ່ນສິນຄ້າຍຸດທະສາດຂອງແຂວງຈຳປາສັກ, ສ້າງລາຍຮັບທີ່ໝັ້ນທ່ຽງໃຫ້ແກ່ປະຊາຊົນກໍຄືຊາວສວນ ແລະລັດຖະບານ, ທັງເປັນສິນຄ້າສົ່ງອອກ. ສະເພາະປີ 2021 ແຂວງຈຳປາສັກ ສົ່ງອອກສິນຄ້າມູນຄ່າ 300 ລ້ານໂດລາສະຫະລັດ, ໃນນັ້ນ ກາເຟ-ຊາ ມີມູນຄ່າ 70 ລ້ານໂດລາ ກວມ 23,33% ຂອງການສົ່ງອອກໄປ 20 ປະເທດທົ່ວໂລກ.

ງານນີ້, ບັນດາຜູ້ເຂົ້າຮ່ວມໄດ້ພົບກັບການວາງສະແດງ ແລະ ຂາຍຜະລິດຕະພັນກາເຟ, ຊາ, ພືດຜັກເມືອງໜາວ ແລະ ສິນຄ້າ ODOP ຈາກບັນດາເມືອງອ້ອມຂ້າງແຂວງຈໍາປາສັກ. ຊິມຣົດຊາດການປຸງແຕ່ງກາເຟ-ຊາ ຂອງຮ້ານຊື່ດັງຈາກບັນດາແຂວງໃນທົ່ວປະເທດ.ມີການສໍາມະນາວິທະຍາສາດໃນຫົວຂໍ້ສໍາຄັນກ່ຽວກັບຍຸດທະສາດການພັດທະນາກາເຟລາວ, ກາລະໂອກາດການເຂົ້າເຖິງຕະຫຼາດ ແລະ ສິ່ງທ້າທາຍຕໍ່ການແຂ່ງຂັນໃນຕະຫຼາດກາເຟສາກົນ. ການປະກວດ ແລະແຂ່ງຂັນການຊົງ ແລະ ຊິມຄຸນນະພາບກາເຟ Barista. ການທ່ຽວຊົມສວນກາເຟ ແລະ ແຫຼ່ງທ່ອງທ່ຽວທຳມະຊາດທີ່ເມືອງປາກຊ່ອງພ້ອມສຳຜັດອາກາດໜາວເຢັນເທິງພູພຽງບໍລະເວນ.

ສຳລັບອຸທິຍານແຫ່ງຊາດ ດົງຫົວສາວ, ມີຄວາມໂດດເດັ່ນດ້ວຍທິວທັດທຳມະຊາດທີ່ສວຍງາມ ມີພູພຽງ, ພູສູງ, ຄວາມຫຼາກຫຼາຍຂອງສາຍນໍ້າ, ມີນ້ຳຕົກຕາດຫຼາຍແຫ່ງ ຊຶ່ງມີສາຍທານນໍ້າໄຫຼຕະ ຫຼອດປີ ແລະ ມີຄວາມຫຼາກຫຼາຍທາງດ້ານຊະນິດພັນສັດນ້ໍາ-ສັດປ່າ ແລະ ພືດປ່າ ໂດຍສະເພາະແມ່ນ ກຸ ຫຼາບພັນປີ ທີ່ຫາຍາກ, ຊຶ່ງເປັນທີ່ຍອມຮັບຂອງສາກົນເລື່ອງຄວາມອຸດົມສົມບູນທີ່ເຕັມໄປດ້ວຍຊີວະນາໆພັນລ້ຳຄ່າ, ມີຄວາມຫຼາກຫຼາຍຂອງຊະນິດພັນໄມ້ໃນລະບົບນິເວດປ່າໄມ້ເຂດຮ້ອນ ທີ່ເປັນເອກະ ລັກທາງດ້ານຄຸນຄ່າຊີວະວິທະຍາ ຊຶ່ງມີຄວາມສໍາຄັນຕໍ່ວົງຄະນະຍາດແຫ່ງຊາດ ແລະ ຕໍ່ໂລກ.

ສ່ວນອຸທິຍານແຫ່ງຊາດ ເຊປຽນ, ມີຄວາມໂດດເດັ່ນທາງດ້ານຊະນິດພັນສັດປ່າ ຈໍາພວກສະກຸນລີງ, ທະນີ ແລະ ນົກນ້ໍາຂະໜາດໃຫຍ່. ໂດຍເດັ່ນກໍຄືປ່າດົງດິບເຂດຮາບພຽງຂະໜາດໃຫຍ່ປະເພດປ່າແຄມນໍ້າ ຊຶ່ງເປັນບ່ອນອາໄສທີ່ມີຄຸນຄ່າຕໍ່ສັດນໍ້າ-ສັດປ່ານາໆຊະນິດ, ພ້ອມນີ້ໃນຂອບເຂດປ່າສະຫງວນ ເຊປຽນ ຍັງໄດ້ຊຸກຍູ້ສົ່ງເສີມໃຫ້ປະຊາຊົນສ້າງຄຸນຄ່າ ແລະປະໂຫຍດຈາກຄວາມອຸດົມສົມບູນຂອງລະບົບນິເວດໂດຍຕິດພັນກັບການອະນຸຮັກປ່າສະຫງວນແຫ່ງຊາດແຫ່ງນີ້.

แชร์