ພິດໂລກຮ້ອນ ສ້າງຄວາມແຫ້ງແລ້ງຮຸນແຮງໃນອະເມຣິກາ ຊີກແປຊີຟິກ

ນີ້ແມ່ນປາກົດການດ້ານລົບອັນເກີດຈາກຜົນກະທົບຂອງພາວະໂລກຮ້ອນ,ຊຶ່ງເຮັດໃຫ້ປະລິມານນໍ້າໃນທະວີບອະເມຣິກາເໜືອຝັ່ງມະຫາສະໝຸດແປຊິຟິກ, ເຫືອດແຫ້ງລົງຕໍ່າສຸດໃນຮອບ 1.200 ປີ; ສະຖານະການດັ່ງກ່າວນີ້, ມີສາເຫດມາຈາກບັນຫາສະພາບພູມີອາກາດປ່ຽນແປງ ຫຼື ພາວະໂລກຮ້ອນ, ຊຶ່ງພຶດຕິກຳຂອງມະນຸດແມ່ນເປັນປັດໄຈເລັ່ງຫຼັກໆ.

ຜົນການສຶກສານີ້, ໄດ້ຮັບການເຜີຍແຜ່ຜ່ານເວ໊ບໄຊຕ໌ Nature Climate Change ຊຶ່ງພົບວ່າ: ສະພາບພູມອາກາດຂອງສະຫະລັດອະເມຣິກາ ຊີກຕາເວັນຕົກ, ໃນລະຫວ່າງປີ 2000ເຖິງ 2021 ມີສະພາບແຫ້ງແລ້ງທີ່ສຸດໃນຮອບ 1.200 ປີ. ໃນນີ້, ສະພາບແຫ້ງແລ້ງເມື່ອປີ 2021ມີຄວາມຮຸນແຮງຫຼາຍ ແລະ ຄາດວ່າປີນີ້, ກໍຈະເປັນອີກໜຶ່ງປີທີ່ສະພາບອາກາດຈະມີຄວາມຮຸນແຮງໜັກໜ່ວງ.

ຜົນການສຶກສາພົບວ່າ: ສາເຫດຫຼັກຂອງປາກົດການໄພແລ້ງແມ່ນມາຈາກພາວະໂລກຮ້ອນທີ່ມີພຶດຕິກຳຂອງມະນຸດເປັນປັດໄຈຫຼັກ, ເຮັດໃຫ້ຄວາມແຫ້ງແລ້ງມີຄວາມຮຸນແຮງເຖິງ72% ເຊັ່ນອາຍຮ້ອນຈາກປະຕິກິລິຍາສັນດາບຊອງເຊື້ອເພີງຟອສຊິລ (ແກ໊ຊທຳມະຊາດ, ນ້ຳມັນ ແລະ ຖ່ານຫີນ). ຊຶ່ງປະຕິກິລິຍາສັນດາບ (ປາກົດການເຜົາໄໝ້ທີ່ເກີດຂຶ້ນ) ໄດ້ສົ່ງຜົນໂດຍກົງຕໍ່ປະລິມານນໍ້າຈືດໃນພື້ນທີ່ທີ່ຜະເຊີນກັບພາວະແຫ້ງແລ້ງຢ່າງໜັກຕະຫຼອດ 20 ປີທີ່ຜ່ານມາ.ຊຶ່ງຈະມີພຽງສະພາບຝົນຕົກໜັກຈິ່ງຈະສະທ້ອນເຖິງຄວາມບັນເທົາພາວະດັ່ງກ່າວໄດ້.

ໜຶ່ງໃນພື້ນທີ່ ທີ່ເຫັນໄດ້ຢ່າງຊັດເຈນເຖິງຜົນກະທົບໜັກກໍຄື ມະຫານະຄອນລອສແອງເຈລິສ ຫຼື ແອລເອ, ຊຶ່ງລັດແຄລິຟໍຣ໌ເນຍ ທີ່ເຄີຍເກີດຝົນຕົກໜັກເມື່ອເດືອນທັນວາ 2021 ໂດຍວັດແທກປະລິມານນ້ຳຝົນໄດ້ເຖິງ 10 ນິ້ວ ແລະ ນັບເປັນພາວະຝົນຕົກໜັກຄັ້ງທີສອງນັບແຕ່ມີການບັນທຶກຂອງອົງການບໍລິຫານມະຫາສະໝຸດ ແລະ ຊັ້ນບັນຍາກາດແຫ່ງຊາດ (NOAA)ແຕ່ກໍບໍ່ສາມາດບັນເທົາຄວາມແຫ້ງແລ້ງໄດ້; ແຕ່ຜົນກະທົບຍິ່ງຊັດເຈນຂຶ້ນໃນເດືອນມັງກອນປີນີ້,ຫຼັງຈາກທີ່ເກີດຝົນຕົກລົງມາພຽງເລັກໜ້ອຍທີ່ນະຄອນແອລເອ, ຊຶ່ງວັດແທກປະລິມານນ້ຳຝົນໄດ້ພຽງໜຶ່ງໃນສິບສ່ວນຂອງ 1 ນິ້ວ ແລະ ນີ້ກໍນັບເປັນສະພາວະແຫ້ງແລ້ງຫຼາຍສຸດທີ່ອັນດັບ 8ຂອງແອລເອ. ຫຼ້າສຸດໃນເດືອນກຸມພານີ້, ກໍຍິ່ງຮຸນແຮງໜັກລົງໄປອີກ ຈິ່ງຖືວ່າເປັນທ່າອຽງທີ່ບໍ່ດີຕັ້ງແຕ່ຕົ້ນປີມາເລີຍ.

ທັງນີ້,ສາດສະດາຈານ ເດວິດ ເຟລດ໌ແມນ ຜູ້ຊ່ຽວຊານດ້ານວິຊາຜັງເມືອງ ແລະນະໂຍບາຍພາກສັງຄົມມະຫາວິທະຍາໄລ ລັດແຄລິຟໍຣ໌ເນຍ, ກໍໄດ້ກ່າວວ່າ: ສະພາບອາກາດຫວ່ຽງໄປມາສຸດຂວັ້ນແບບນີ້ເປັນສັນຍານຂອງໂລກຮ້ອນ ແລະ ເກີດຂຶ້ນຢູ່ຫຼາຍພື້ນທີ່ທົ່ວໂລກ; ຂະນະທີ່ທ່ານ ພາຣ໌ກ ວິລລຽມສ໌ ຜູ້ນຳຄະນະນັກວິໄຈຊຸດນີ້, ກໍໄດ້ລະບຸວ່າ: ຄວາມແຫ້ງແລ້ງທີ່ເກີດຂຶ້ນນັ້ນ, ມັນຍາກທີ່ຈະແກ້ໄຂໄດ້ດ້ວຍປະລິມານນໍ້າຝົນສູງຜິດປົກກະຕິໃນປີດຽວ ແລະຄາດວ່າຈະຕ້ອງມີຝົນຕົກໜັກຕໍ່ເນື່ອງອີກຫຼາຍປີຈິ່ງຈະເຮັດໃຫ້ສະພາວະແຫ້ງແລ້ງສຸດຂວັ້ນ (Megadrought) ເບົາບາງລົງ.

แชร์